Dzo kpo yi emenuwo dzi

Dzo kpo yi emenuawo dzi

Ŋkuléle Ðe Wò Taɖa Ŋu Nyuie

Ŋkuléle Ðe Wò Taɖa Ŋu Nyuie

 Ŋkuléle Ðe Wò Taɖa Ŋu Nyuie

NUMEKUGBALẼ aɖe gblɔ be: “Le dzidzime kple nuto ɖesiaɖe me la, taɖa ƒoa nu le amesi ƒe ta wòle ŋu.” Eyata mewɔ nuku kura o be ame akpa gãtɔ tsia dzi ɖe woƒe taɖa ŋu be ŋusẽ nanɔ eŋu eye wòanya kpɔ.

Nyɔ! bia nya aɖewo siwo amewo lɔ̃a biabia le ɖa ƒe nɔnɔme kple beléle nɛ ŋu la ɖawɔla bibi ene. Nusi wogblɔ ɖee fia be wò taɖa ƒe nɔnɔme yi ŋgɔ wu alesi ŋku ate ŋu akpɔ.

Taɖa ƒe Toto Kple Eƒe Vɔvɔ

Biabia (B): Alekee nye taɖa ƒe wɔwɔme?

Ŋuɖoɖo (Ŋ): Nusi le taɖa mee nye keratin, si nye protein wɔka aɖe. Ða ɖesiaɖe tona toa do sue aɖe si le tayia ŋu si woyɔna be ɖado la me. Nusi woyɔna be ɖatsoƒe si me ʋu geɖe nɔna la le ɖado ɖesiaɖe gɔme. Ðatsoƒea dzia ɖamenugbagbevi siwo toa ɖadoa me dona eye wova sẽna hezua ɖa.

B: Ame geɖe xɔe se be ɖa tona kabakaba ne wokpae. Nyateƒe yea?

Ŋ: Ao. Amewo buna be ɖa xɔa nunyiame tsoa ametia me abe alesi  ati ƒe alɔwo xɔa nunyiame tsoa atia me ene. Gake ne ɖa nya do tso tayia me ko la, ezua nu kuku. Eyata ɖakpakpa mekpɔa ŋusẽ aɖeke ɖe eƒe toto dzi o.

B: Nukata ɖa ƒoa wɔ?

Ŋ: Nane le ɖa tome si me eƒe amadede tsona. Ne nugbagbevi siwo le amadedetsoƒea ku la, ɖa ƒoa wɔ; enye nusi dzɔna ne ame le tsitsim. Ne amesi metsi o ƒo wɔ la, ate ŋu anye be ɖe wònyi eƒe dome loo alo dɔléle gbɔe wòtso. Gake nya si amewo gblɔna be taɖa ƒoa wɔ le zã ɖeka me la nye nya kpakpa. Amadedetsoƒe nɔa tayia te. Eyata ebia ɣeyiɣi hafi ɖa si ƒo wɔ nato (etona sentimeta 1.25 lɔƒo le ɣleti ɖeka me) ahado ɖe ta.

B: Nukae na ame aɖewo ƒe taɖa nɔa vɔvɔm?

Ŋ: Taɖa ƒe vɔvɔ nye nɔnɔme siwo me ɖa tona le dzɔdzɔmenu ƒe akpa aɖe. Amesiame ƒe ɖa 50 vaseɖe 80 nyɔna gbesiagbe le  mama dedie nu. Gake ŋutsuwo ƒe tabebe nye nusi dome wonyina eye edze abe lãmetsiŋusẽ ƒe dɔmawɔmawɔ nyuie, si wɔnɛ be ta bebena keŋkeŋ la gbɔe wòtsona ene. Woyɔa taɖa ƒe nyɔnyɔ si mebɔ o be tabebedɔ. *

B: Ame aɖewo gblɔna be taɖa ɖea ame ƒe lãmesẽ fiana. Miede dzesi esia?

Ŋ: Ẽ. Taɖa xɔa nunyiame tsoa ʋu si le tayia te gbɔ. Eyata taɖa si ŋu ŋusẽ le ate ŋu aɖee fia be exɔa nunyiame geɖe tso ʋua gbɔ. Gake amesi meɖua nu nyui o alo noa aha fũ ate ŋu akpɔe be yeƒe ɖa va le wodzoe eye megasẽ o, elabena nunyiame boo aɖeke megale eƒe ʋu me taɖa nakpɔ o. Taɖa ƒe vɔvɔ alo eƒe masẽmasẽ ate ŋu anye dɔléle alo fufɔfɔ ƒe dzesi gbãtɔwo gɔ̃ hã.

Belelé na Wò Tayi Kple Taɖa

B: Miƒo nu tso alesi woklɔa ɖa me kple tayia ŋu na mi.

Ŋ: Nuteƒekpɔkpɔ ɖee fia be amesiwo ƒe tayi ƒuna wònye kuxi na wo la ƒe akpa gãtɔ klɔa ɖame kple adzalẽ kabakaba akpa. Enye nyateƒe be ami si le wò ɖa me léa ɖi kple tamefofo eye woate ŋu axe amitoƒe siwo le ɖadoa me. Eyata ehiã be woaklɔ ɖa me edziedzi. Gake dzɔdzɔmemi sia hã kpɔa wò ŋutilã ta tso dɔlékui vɔ̃ɖiwo me eye wònaa tsi si hiã nɔa eme. Ne èklɔ ɖame edziedzi la, takpɔnu sia maganɔ wò tayia ŋu o eye ahe kuxi siwo ƒe ɖewoe nye tayi ƒe ƒuƒu vɛ. Ðaŋutinunyala akpa gãtɔ kafui be woaklɔ tayia alo ɖame ne eƒo ɖi. Ele be amesiwo ami geɖe le ɖame na naklɔ ɖame edziedzi wu amesiwo tɔ me ami mesɔ gbɔ ɖo o alo amesiwo ƒe ɖame ƒuna.

Ne èle ɖame klɔm la, lili asi ɖe wò tayia ŋu. Esia ɖea nugbagbevi kukuwo ɖa le tayia ŋu eye wòna ʋu sina le taɖaa gɔme nyuie, ale be taɖaa kpɔa nunyuiame. Ðo ŋku edzi nàkpalae nyuie! Ne ètsɔ adzalẽ klɔ asi vɔ eye mekpalae o la, wò asi aƒu kplakplakpla ahanɔ wowóm. Nenema ke tayia aƒu ahanɔ fofomee ne womekpala ɖaa me nyuie o.

B: Aleke woakpɔ ɖa gɔme si ƒu kplakplakpla gbɔe?

Ŋ: No tsi geɖe, eye nàɖu nusiwo me nunyiame le. Esia naa tsi nɔa wò ŋutilã me eye wònaa ʋu sua ametia. Zã adzalẽ siwo nu mesẽ o tsɔ klɔ emee, eye lili asi ɖe wò tayia ŋu edziedzi. Ame aɖewo hã zãa ɖaɖotike kple ami siwo mevɔna le ɖame o be tsi nanɔ tayia ŋu.

Atsyãdodo na Wò Ða

B: Nukae wòle be wòanɔ ame ƒe susu me ne eyina ɖawɔla gbɔ?

Ŋ: Ne èdi be yeatrɔ atsyã na wò ɖa la, tsɔ atsyã si nèdi la ƒe foto kple ɖewohĩ atsyã si mèdi o hã tɔ ɖe asi. Gblɔ wò didiwo kple ɣeyiɣi didime si nàdi be yeazã atsɔ atrɔ asi le yeƒe ɖa ŋu gbesiagbe, elabena beléle na ɖawɔwɔ ƒe atsyã aɖewo biaa ɣeyiɣi geɖe wu bubuwo. Nenɔ wò susu me be àyi ɖawɔla gbɔ zi eve alo zi etɔ̃ hafi wòate ŋu anya alesi wò ɖa le eye be kadodo nyui nanɔ mia dome. Eyata mègatrɔ wò ɖawɔlawo kabakaba o!

Nusi Wò Taɖa Ðena Fiana

Wote ŋu toa beléle na ɖa kple atsyãdodo nɛ me ɖea ame ƒe nɔnɔme fiana. Wokpaa ɖa, didinɛ ɖe edzi, dzɔnɛ, wɔnɛ, dea amae, hedoa atsyã vovovowo nɛ be wòasɔ ɖe nusi le tsia dzi, mawusubɔsubɔdzixɔsewo, kple hadomegbenɔnɔ kpakple dunyahehe me nukpɔsusuwo gɔ̃ hã nu. Gbugbɔ ŋku lé ɖe wò ɖa ŋu. Nukae wòɖena fiana le ŋuwò? Ða nyui si wodo atsyã na wòsɔ la ɖoa atsyɔ̃ na amesi ƒe ta wòle eye ame bubuwo kpɔa dzidzɔ ɖe eŋu.

[Etenuŋɔŋlɔ]

^ mm. 12 Àkpɔ nyatakaka bubuwo le April 22, 1991, Eŋlisigbe me Nyɔ! ƒe nyati si nye “Alopecia—Living in Silence With Hair Loss,” (Tabebedɔ—Tenɔnɔ Ðe Enu Kpoo) me.

[Nɔnɔmetata siwo le axa 26]

Nusiwo me nunyiame le ɖuɖu kple tsi geɖe nono ate ŋu aɖe tayi si ƒuna ƒe kuxia ɖa

[Nɔnɔmetata si le axa 26]

Wɔƒoƒo nye nusi dzɔna ne wole tsitsim

[Nɔnɔmetata si le axa 26]

Ðamekɔklɔ kabakaba akpa ate ŋu ana ami si nye takpɔnu navɔ le wò tayia ŋu