Dzo kpo yi emenuwo dzi

Dzo kpo yi emenuawo dzi

Nukatae Mele Tsralɛ Alea Gbegbe Ðo?

Nukatae Mele Tsralɛ Alea Gbegbe Ðo?

 Sɔhɛwo Biana Be . . .

Nukatae Mele Tsralɛ Alea Gbegbe Ðo?

JUSTIN le tsralɛ hele lãmesẽ me, gake mekpɔa dzidzɔ ɖe eƒe ametia ŋu bliboe o. Elɔ̃ ɖe edzi be “mele agbagba dzem be malolo ɖe dzi.” Eyata fifia eɖua nu zi atɔ̃, si me nuɖuɖumeŋusẽ si nye calory 4,000 le gbeɖeka. Gake edi be yealolo ɖe edzi be yeadzɔ atsu. Eyata egblɔ kpee be: “Mía kple xɔ̃nye míefɔna kaba yia kamedefefewɔƒe ɣeaɖewoɣi va kɔa nu kpekpewo hafi yia dɔme.”

Vanessa hã le tsralɛ. Gake eya ƒe kpekpeme dze eŋu. Vanessa gblɔ be: “Esime menɔ ɖevime la, ɖeviwo tsɔ megbeŋkɔ nam be ƒu ɖeɖe. Gake megaɖea fu nam o. Alesi mele la dze ŋunye.”

‘Alesi nèle nedze ŋuwò.’ Aɖaŋuɖoɖo nyui aɖee nye ma. Gake ɖewohĩ edziwɔwɔ asesẽ na wò. Esi nènye ƒewuivi ta la, anɔ eme be ‘èle ɖekakpui me tom.’ (Korintotɔwo I, 7:36) Ƒewuimenɔɣi koŋue tɔtrɔ gãwo vana le ametia me. Le ɣeyiɣi mawo me la, wò ŋutilã ƒe akpa vovovoawo anɔ tɔtrɔm, ɖesiaɖe kple etɔ; wò abɔwo, afɔwo, kple mo ƒe dzedzeme wɔa ɖeƒomevii. * Esia ana màvo le ɖokuiwò me o, àsusui be yemenya kpɔ o. Azɔ nyateƒe bubue nye be sɔhɛwo katã metsina ɖekae o. Eyata esime hatiwò bubuwo tsi eye ŋutsu kple nyɔnu ƒe dzedzeme ɖo wo ŋu la, àkpɔ ɖokuiwò be yele tsralɛ ne ètsɔ ɖokuiwò sɔ kple wo.

Togbɔ be woƒo nu geɖe tso sɔhɛ siwo susui be yewo lolo akpa ŋu hã la, zi geɖe woŋea aɖaba ƒua sɔhɛ siwo susu be yewole tsralɛ akpa dzi. Esia le alea vevietɔ le gbe aɖe dolawo kple dukɔ siwo me womebua ame tsralɛwo be wonya kpɔ o dome. Le teƒe mawo la, woate ŋu aɖe alɔme le nyɔnuvi si le tsralɛ ŋu be “eɖi ku.”

Ke ŋutsuviwo ya ɖe? Numekula Susan Bordo gblɔ be: “Numekuku si wowɔ do ŋgɔ na ƒe 1980 ƒeawo le alesi nyɔnuwo bua woƒe dzedzemee ŋu ɖee fia be ne nyɔnuwo kpɔ wo ɖokui le ahuhɔ̃e me la, wokpɔa kpɔtsɔtsɔ geɖe le wo ɖokui ŋu.” Ke ŋutsuwo ya ɖe? Bordo yi edzi be: “Ne ŋutsuwo kpɔ wo ɖokui le  ahuhɔ̃e me la, wokpɔnɛ be yewoƒe dzedzeme nyo alo yewo nya kpɔ wu alesi yewo susui gɔ̃ hã.” Gake le nyitsɔ laa ƒewo me la, nɔnɔme ma te tɔtrɔ. Bordo de dzesii be amesiwo yina be woawɔ dɔ atrɔ yewoƒe mo ƒe dzedzeme ƒe akpa si wu enelia nye ŋutsuwo, eye wògblɔ be anye ŋutsu si wobuna be enye ŋutsu “akuakua” si ƒe foto nɔa awutewuiwo dzi si wotsɔ doa bobloe le United States kple Ɣetoɖoƒedukɔ bubuwo me la gbɔe wòtso be ɖekakpuiwo va le dzi tsim ɖe woƒe dzedzeme ŋu. Esia kpɔ ŋusẽ ɖe ƒewuiviwo dzi. Eɖea fu na wo ne womedzɔ atsu abe ŋutsu siwo ƒe foto wozãna tsɔ doa boblo nudodowoe ene o.

Eyata ne èle tsralɛ la, ànɔ ɖokuiwò biam ɣeaɖewoɣi be, ‘Nukae le fu ɖem nam?’ Nyanyuiae nye be anɔ eme be naneke megblẽ le ŋuwò o.

Nusita Nèle Tsralɛ Ðo

Le sɔhɛ geɖe gome la, womekpɔ be naneke gblẽ le tsralɛnɔnɔ ŋu o. Zi geɖe la, enyea ɣeyiɣi kpui aɖe ƒe tɔtrɔ siwo vana kabakaba ne wole ƒewuiwo me tom la me tsonu ko. Zi geɖe tɔtrɔ mawo dzi aɖe akpɔtɔ ne èle tsitsim. Gake ne èle tsralɛ akpa togbɔ be nèɖua nu wòdana sɔna hã la, anyo be nàkpɔ wò ɖɔkta ne wòado wò kpɔ be dɔléle aɖe, abe suklidɔ ene, si na woɖia ku ye le fu ɖem na wò hã.

Steven Levenkron, si nye nuɖuɖukuxiŋutinunyala xɔŋkɔ gblɔ na Nyɔ! be: “Meɖo ŋku edzi be woɖo nyɔnuvi aɖe si ɖi ku ŋutɔ ɖe gbɔnye be nuɖuɖumadzroame le fu ɖem nɛ, eye eɖi amesi ŋu nuɖuɖukuxi le vavã. Gake medidi o mekpɔe be eƒe kuxia nye ŋutilãmetɔ, ke menye susume tɔ o. Dɔkavimedɔléle vɔ̃ɖi si woyɔna be Crohn dɔléle nɔ eŋu, gake woƒe ƒome ɖɔkta mete ŋu de dzesii o. Anye ne ŋuɖeɖi ma ate ŋu awu nyɔnuvia hafi.” Ne suklidɔ alo dɔléle bubu si na woɖia ku le ŋuwò la, nunya anɔ eme be nàzɔ ɖe wò ɖɔkta ƒe aɖaŋuɖoɖowo dzi pɛpɛpɛ.

Gake ɣeaɖewoɣi kuɖiɖi ate ŋu atso seselelãme gome nuteɖeamedzi aɖewo gbɔ. Ðk. Levenkron ƒo nu le eƒe agbalẽ si nye Anatomy of Anorexia me ku ɖe nya si numekula aɖewo gblɔ be “nuɖuɖukuxiwo abe eɖoɖo koŋ aɖu nutsu, nutsuɖuɖu si zu numame kple nuɖuɖumadzroame va ɖe fu na suklidɔléla siwo zãa suklidɔtike” la ŋu. Atikewɔla bibi ate ŋu anya ne nuɖuɖukuxi ma ƒomevi le ame ŋu. *

Aɖaŋuɖoɖo Siwo Wɔa Dɔ

Mítsɔe be èkpɔ wò ɖɔkta, eye wòbe èle tsralɛ gake èle lãmesẽ me. Nukae nàwɔ? Biblia gblɔ le Hiob 8:11 be: “Ðe nyɔnufɛgbe miena ɖe afisi [tsi] mele oa? Eye ɖe aƒla miena tsi makpɔmakpɔea?” Abe alesi ko numiemie hiã na nuto nyuitɔ kple nunyiame nyuitɔ hafi wòatsi ene la, nenema ke nèhiã nuɖuɖu si da sɔ be nàtsi azu amesi ŋu ŋusẽ le. Esia le vevie eɖanye be èle agbagba dzem be yealolo alo adu o.

Gake megadzro wò be nàdze aminuwo ɖuɖu kple susu be yealolo kaba o. Esi nuɖuɖuŋutinunyala Susan Kleiner nɔ numekuku wɔm le alesi kamedefefewɔlawo wɔna be woƒe lãme tona ŋu la, ede dzesii be woɖua nuɖuɖu si me nuɖuɖumeŋusẽ 6,000 le gbeɖeka! Gake Kleiner gblɔ be “nu ɖefuname si dze le numekuku sia mee nye be le mama dedie nu la, woɖua aminu si wu gram 200 gbeɖeka. Ema sɔ kple ami si le bɔta bablɛ eve me! Ema ɖuɖu ate ŋu ana ame geɖe nadze dɔ. Ne woɖu aminu gbogbo ma edziedzi ɣeyiɣi didi la, ate ŋu ana dzidɔ.”

United States ƒe Agblededɔwɔƒe (USDA), gblɔ be nu vevitɔ kekeake si hiã le nuɖuɖu si da sɔ mee nye nuɖuɖu siwo me goma le, abe abolo, nukuwo, mɔli, kple pasta ene. Esi kplɔe ɖoe nye detsiƒonuwo kple atikutsetsewo. USDA kafui be woaɖu adelã kple nuɖuɖu siwo wotsɔ nyinotsi wɔe ʋɛ aɖe ko.

Be nàlé ŋku ɖe nusi nèɖuna kple agbɔsɔsɔme si nèɖuna ŋu la, àte ŋu adze agbagba anɔ wo ŋlɔm ɖi. Kotokumegbalẽ sue aɖe nenɔ ŋuwò, eye nàŋlɔ nusianu si nàɖu kple ɣeyiɣi si nèɖui ɖe eme. Ðewohĩ awɔ mo yaa na wò be mèle nu ɖum wòsɔ gbɔ de alesi nèsusui nu o,  vevietɔ ne ènye amesi ŋu vovo menɔna o. Esi nènye ƒewuivi si ŋu ŋusẽ le ta la, àte ŋu azã nuɖuɖumeŋusẽ 3,000 alo esi wu nenema bɔbɔe gbesiagbe! Ðewohĩ àkpɔe hã be wò nuɖuɖu meda sɔ alesi dze o—le esi nuɖaɖɛwo abe abolo si me wode nuwoe kple pizza ene sɔ gbɔ, evɔ atikutsetsewo kple detsiƒonuwo ya mesɔ gbɔ o ta.

Ke nuɖuɖutike xɔasiwo ya ɖe? Womahiã o. Eŋutinunyala geɖe xɔe se be àte ŋu akpɔ nunyiame siwo katã wò ŋutilã hiã ne èɖua nuɖuɖu nyuiwo. Ƒo wo katã ta la, tsri yeaɖi mɔnuwo zazã be yeatsɔ akpɔ nɔnɔmea gbɔe, abe ŋusẽdoametike si nye anabolic steroids zazã ene. Nublanuitɔe la, menye ŋutsuvi ƒewuiviwo dome koe steroid zazã nye kuxi le o. The New York Times ka nya ta be: “[Steroids] zazã si va le bɔbɔm le nyɔnuviwo dome, si numekula aɖewo gblɔ be eƒe akpa aɖe tso nuɖuɖumadzroame ƒe nugbegblẽ gbɔ la yi dzi va ɖo alesi wònɔ le ŋutsuviwo gome le ƒe 1980 ƒeawo me.” Ewɔ nuku be nyɔnuvi ƒewuivi siwo ƒe xexlẽme nye 175,000 le United States lɔ̃ ɖe edzi be yewozã steroids. Wogblɔ be atike sia gblẽa nu geɖe le ame ŋu, si ƒe ɖewoe nye ɖa ƒe toto ɖe mo na ame, gbɔtotsitsi me kuxiwo, no me kansa le nyɔnuwo gome, aɖuɖɔtoe me kansa le ŋutsuwo gome, kple ʋukame xexe kpakple aklã me kansa le nyɔnuwo kple ŋutsuwo siaa gome. Mele be woazã steroids gbeɖe ne menye ɖɔktae ŋlɔe na ame alo le eƒe mɔfiafia te o.

Ðokuibɔbɔ Kple Susu Nyui ƒe Amesinɔnɔ

Biblia gblɔ na mí be ‘míabɔbɔ mía ɖokui ɖe anyi ahazɔ le mía Mawu ŋkume.’ (Mixa 6:8) Ðokuibɔbɔ bia be woanya ame ŋutɔ ƒe gbɔdzɔgbɔdzɔwo. Ðokuibɔbɔ akpe ɖe ŋuwò be susu nyui nanɔ asiwò le wò dzedzeme ŋu. Naneke megblẽ le didi be woanya kpɔ ŋu o. Gake dzitsitsi ɖe wò dzedzeme ŋu akpa maɖe vi na ame aɖeke o—negbe ɖewohĩ nudodo kple nuɖuɖu dɔwɔƒewo ko. Lãmesẽŋutinunyalawo lɔ̃ ɖe edzi be domenyiŋusẽmenugbagbevi si le ŋutsu akpa gãtɔ me menye esi tɔgbe ate ŋu ana eƒe lãme nakako wòazu abe kamedefefewɔla si tsɔa nu kpekpewo tɔ ene o, metsɔ le eme nuɖuɖu agbɔsɔsɔme si wòɖuna kple hehe si wòaxɔ o. Eye ne ènye nyɔnuvi la, anɔ eme be nuɖuɖu agbɔsɔsɔme kae nèɖaɖu o, màlolo akpɔ o.

Dzidzɔtɔe la, ŋkuléle ɖe wò nudodowo ŋu vie ate ŋu awɔ geɖe atsɔ akpɔ nusi nèsusu be enye kpɔtsɔtsɔ le yeƒe ametia ŋu la gbɔ. Tsri awu siwo ana wò ametia ƒe akpa si ŋu nètsi dzi ɖo nadze gaglã madzemadzee la dodo. Ame aɖewo ɖo aɖaŋu be woado awu siwo ƒe amadede ƒe mo kɔ, elabena amadede yibɔ naa ame tsralɛwo gadzena tsralɛ wu.

Ðo ŋku edzi hã be wò amenyenye le vevie sasasã wu wò dzedzeme. Ne míagblɔe ŋutɔŋutɔ la, alɔgbɔnukoko, nukoko xɔlɔ̃wɔwɔtɔe, kple nuwɔwɔ dɔmenyotɔe ɖe amewo ŋu awɔ geɖe be wò nu nadze amewo ŋu tsɔ wu be wò lãme nakako alo awu aɖe ƒomevi dodo. Ne xɔ̃wòwo ɖia gbɔ wò edziedzi le wò dzedzeme ta la, te ɖe amesiwo dea asixɔxɔ ŋuwò le amesi nènye le ememe ta la ŋu—nɔnɔme si Biblia yɔ be “dzime ƒe ame ɣaɣla.” (Petro I, 3:4) Mlɔeba mègaŋlɔ be gbeɖe o be “amegbetɔ kpɔa ŋku nu, ke Yehowa kpɔa keke dzi me ke.”—Samuel I, 16:7, 8.

[Etenuŋɔŋlɔwo]

^ mm. 5 Kpɔ nyati si nye “Sɔhɛwo Biana Be . . . Ðe Mele Tsitsim Alesi Dzea?” si dze le Eŋlisigbe me Nyɔ!, September 22, 1993, me.

^ mm. 12 Kpɔ nyati siwo nye “Sɔhɛwo Biana Be . . . Nukata Metsi Dzi Ðe Nye Kpekpeme Ŋu?” kple “Aleke Màwɔ Aɖu Dzitsitsi Ðe Nye Lolome Ŋu Dzii?,” siwo dze le míaƒe May 8 kple June 8, 1999, ƒe tatawo me.

[Nɔnɔmetata si le axa 14]

Sɔhɛ aɖewo léa fu wo ɖokui le esi wole tsralɛ ta