Dzo kpo yi emenuwo dzi

Dzo kpo yi emenuawo dzi

Nukae Dzɔ Ðe “Agbemedɔwɔɖui” Dzi?

Nukae Dzɔ Ðe “Agbemedɔwɔɖui” Dzi?

 Nukae Dzɔ Ðe “Agbemedɔwɔɖui” Dzi?

GRAHAM * wɔ dɔ na Australia adzɔha gã aɖe ƒe 37 sɔŋ. Le eƒe ƒe 50-awo ƒe nuwuwu lɔƒo la, woŋlɔ agbalẽ nɛ le vome nae kwasiɖa ʋɛ aɖewo be wòadzudzɔ dɔ. Míate ŋu akpɔ alesi wòatɔtɔ, eƒe mo nawɔ yaa eye wòatsi dzi ɖe eƒe etsɔme ŋu vevie la le susume. Graham bia eɖokui be: ‘Nukae dzɔ ɖe nye “agbemedɔwɔɖui” si mebu be anɔ dedie vaseɖe esime maɖo dzudzɔxɔɣi la dzi?’

Ele eme baa be menye numadzɔkpɔ alo nu yeyee dɔ ƒe gege le ame si nye o. Gake ame  gbogbo siwo si dɔ le gegem le le xexeame godoo nye nu yeye na dzidzime sia me dɔwɔlawo. Ðikekemanɔmee la, susu siwo ta dɔ gena le amewo si sɔ gbɔ, ke hã edze abe vevitɔwo dometɔ ɖekae nye nusi woyɔna be dɔwɔlawo dzi tsotso. Nukae nye dɔwɔlawo dzi tsotso, eye aleke wɔ wova le ezãm?

Tɔtrɔ Siwo Wowɔ le Dɔwɔƒewo

Dukɔwo ƒe gaŋutiɖoɖowo va le ƒome dom kple xexeame katã tɔ. Esia va ɖe dzesi vevietɔ le United States le ƒe 1970-awo ƒe nuwuwu lɔƒo esime adzɔhawo va kpɔ be nuƒlela siwo ƒe xexlẽme le dzidzim ɖe edzi le ʋuwo, elektriknuzazãwo, kple adzɔnu bubu geɖe siwo wowɔ le duta ƒlem.

Be Amerika adzɔhawo nate ŋu aʋli ho kple adzɔha bubuwo eye woaɖe gazazã dzi akpɔtɔ ta la, wodze egɔme va nɔ dɔwɔlawo ƒe xexlẽme dzi tsom eye wova nɔ asi trɔm le woƒe dɔwɔmɔnuwo kple mɔ̃wo ŋu. Mɔnu si wozã tsɔ ɖe dɔwɔlaawo dzi kpɔtɔ yɔmee wova le be dɔwɔlawo dzi tsotso. Woɖe mɔnua me be efia “habɔbɔ aɖe ƒe dɔwɔlawo ƒe agbɔsɔsɔme dzi ɖeɖe kpɔtɔ, zi geɖe to asiɖeɖeleameŋu, dzudzɔxɔxɔledɔme kaba ƒe amenublemɔnuwo, ameɖeɖe yi afi bubu, kple nudzɔdzɔ siwo zia ame dzi be wòadzudzɔ dɔ ene dzi.”

Ƒe geɖe va yi la, asinudɔwɔlawo koŋ ŋue woɖea asi le. Gake le ƒe 1980-awo ƒe nuwuwu kple le ƒe 1990-awo ƒe gɔmedzedze la, wova nɔ asi ɖem le ɔfis dɔwɔlawo hã ŋu, vevietɔ dɔwɔla siwo mekpɔ zu dɔmemegãwo haɖe o. Medidi o nɔnɔme sia va kpɔ ŋusẽ ɖe dukɔ deŋgɔwo katã dzi. Eye esi ganyawo kpɔtɔ le sesẽm ta la, dziɖuɖuwo kple dɔtɔ bubuwo dia mɔnu siwo dzi woato aɖe gazazãwo dzi akpɔtɔ to dɔwɔlawo dzi ɖeɖe kpɔtɔ ƒe mɔnu bubuwo dzi.

Le dɔwɔla geɖe gome la, womegakana ɖe dɔwɔɖui ƒe dedienɔnɔ dzi o. Dɔwɔlawo ƒe habɔbɔ ƒe amegã aɖe gblɔ be: “Amesiwo wɔ dɔ nuteƒewɔwɔtɔe na dɔwɔƒewo ƒe 10, 15, alo 20, ƒe dɔwɔɖui si wobu be anɔ yewo si ɖaa va gena le wo si eye woɖea asi le wo ŋu le vome.” Le Delorese Ambrose ƒe agbalẽ si nye Healing the Downsized Organization me la, eɖe nu me be woto nya si nye “habɔbɔ ƒe ame” vɛ le ƒe 1956 me tsɔ ɖɔa amesi woxɔ ɖe dɔ me. Egblɔ kpee be: “Eɖanye dɔwɔla dzro alo amegã le habɔbɔa me ye o, etsɔa eƒe ganyawo ƒe kelili, hadomegbenɔnɔ, kple nuteƒewɔwɔ naa habɔbɔa ɖɔlia dedienɔnɔ—si nye agbemedɔwɔɖui. Edze ƒã be ɖekawɔwɔ sia dome gblẽ le egbegbe asitsahawo me.”

Dɔwɔlawo dzi tsotso wɔe be dɔ ge le dɔwɔla miliɔn geɖe si le xexeame katã, eye dɔwɔlawo ƒe ha aɖeke meto le eme o. Le United States ɖeɖe la, dɔwɔla siwo si dɔ ge le sɔ gbɔ ŋutɔ, eye wo dometɔ miliɔn geɖe bu woƒe agbemedɔwɔɖuiwo. Woɖe asi le dɔwɔla geɖe ŋu nenema ke le dukɔ bubu geɖewo me. Eŋutikɔntabubu gbɔlo siawo ɖeɖe meɖea nɔnɔme wɔnublanui siwo wòhe va amewo dzi fia o.

Nusiwo Wògblẽna

Graham si míeyɔ le nyati sia ƒe gɔmedzedze gblɔ be: “Àtɔtɔ le susu me vevie ŋutɔ.” Etsɔ alesi woɖe asi le eŋu le dɔme la sɔ kple “dɔdzeamedzi alo alesi woaƒo ame eƒe lãme nagbãe.”

Ne adzɔhawo meɖo dɔwɔlawo ƒe nuteƒewɔwɔ teƒe na wo o la, wotsia yaa elabena wobunɛ be womede asixɔxɔ aɖeke fu si wokpe wɔ dɔ na wo ŋu o. Womegakana ɖe ame dzi o, vevietɔ ne woxe ga gbogbo na dɔmemegãwo ɖe adzɔhaa ƒe dɔwɔlawo dzi tsotso ta. Gakpe ɖe eŋu la, eva sesẽna na amesi si dɔ ge le be wòaxe ga siwo wòdo, axe fe bubuwo, akpɔ eƒe ƒomea ƒe lãmesẽnyawo gbɔ, axe sukufewo, eye wòanɔ agbe abe alesi wòdi ene, aɖe modzaka, ahakpɔ nunɔamesiwo dzi le dɔwɔɖui si ge le esi le vome ta. Esia hea mɔkpɔkpɔbuɖeame kple viɖemanɔameŋu ƒe seselelãmewo vɛ.

Esi wònye dɔwɔɖui nyui si nɔa ame si ɖaa nana wosena le ame ɖokui me be asixɔxɔ le ame ŋu ta la, kpɔ nusi gbegbe dɔmakpɔwɔe gblẽna le nuwɔametɔwo, asinudɔmanɔsitɔwo, alo amesiwo tsi ŋui ɖa le susu me. Numekuku aɖe si wowɔ le Australia ɖee fia be amesiwo xɔ tso ƒe 45 vaseɖe 59 koŋ ŋue woɖea asi le le dɔ me. Evɔ amesiawo boŋue tɔtrɔ ɖe nɔnɔmea ŋu sesẽna na.

Egbɔkpɔnu aɖewo lia? Godoo la, ɣeyiɣi aɖe ƒe dɔwɔɖui si ƒe fetu le ʋɛ kpɔkpɔ nyo wu dɔmakpɔwɔe. Gake ema awɔe be woanɔ agbe si  bɔbɔ ɖe anyi wu. Eye wode dzesii be dɔwɔla siwo ŋu woɖe asi le ƒe akpa etɔ̃lia lɔƒo koe gava kpɔa dɔ si ƒe fetu nyona abe tsãtɔa ene. Esia wɔe be ƒomegbenɔnɔ gava sesẽna ɖe edzi.

Dɔwɔɖui ƒe amesinɔnɔ fifia kura gɔ̃ hã mana ame navo le susu me o. Elabena eŋububu be dɔ ate ŋu age le ame si gblẽa nu le ame ŋu vevie le adzame. Agbalẽ si nye Parting Company gblɔ be: “Tamebubu le dɔ si ava ge le ame si ŋu sɔ kple mɔ nyuitɔ si dzi ʋu naƒo ame toe tiatia. Màkpɔ ɣeyiɣi aɖeke atsɔ ado susu nyuitɔ kekeake si ava tame na wò gɔ̃ hã kpɔ o, elabena màkpɔ ʋua—alo ase aflui aɖeke—do ŋgɔ hafi wòava lɔ wò o.”

Aleke dɔmakpɔwɔe gblẽa nu le sɔhɛwo ŋui? Le sukudede kple dzɔdzɔmeŋutinunya dɔwɔƒe aɖe ƒe numekuku wɔwɔ vɔ megbe la, wogblɔ be: “Ame tsitsi zuzu ƒe gotagomekpeɖodzi veviwo dometɔ ɖekae nye ɣeyiɣiawo katã ƒe dɔwɔɖui kpɔkpɔ, si nye dzeside be wodze ame tsitsi gbenɔnɔ ‘ŋutɔŋutɔ’ gɔme, le ame tsitsiwo dome, le ame tsitsiwo ƒe nukpɔsusu nu, eye be gazazã ƒe ablɔɖe su ame si.” Eyata ne wobui be dɔwɔɖui kpɔkpɔe nye dzeside be wodze ame tsitsi gbenɔnɔ ŋutɔŋutɔ gɔme la, ke dɔmakpɔwɔe ate ŋu agblẽ nu le sɔhɛwo ŋu vevie ŋutɔ.

Tenɔnɔ Ðe Dɔgeleamesi Nu

Wotsɔ tenɔnɔ ɖe dɔ ƒe gege le ame si nu sɔ kple zɔzɔ le teƒe siwo woɖi tomebɔmbwo ɖo. Agbalẽ si nye Parting Company yɔ dzikudodo, ŋukpe, vɔvɔ̃, blanuiléle, kple fɔbubu ame ɖokui be wonye seselelãme siwo ɖea fu na amesiawo wu. Tenɔnɔ ɖe nusiawo nu mele bɔbɔe o. Agbalẽa ŋlɔla gblɔ be: “Wode dɔ manyatalenu aɖe asi na wò—si nye nyametsotso wɔwɔ le wò etsɔme ŋu. Menye wòe bia dɔdasi sia o, eye ɖewohĩ mènya alesi nàkpɔ nyaa gbɔe o, kasia àse le ɖokuiwò me be yetsi akogo.” Eye alesi dɔwɔla siwo ŋu woɖe asi le le vome awɔ agblɔe na woƒe ƒomea nyea kuxi sesẽ siwo wodzea ŋgɔe la dometɔ ɖeka.

Gake tenɔnɔ ɖe asiɖeɖeleameŋu le dɔwɔƒe ƒe nugbegblẽ le ame ŋu nu ƒe mɔnu siwo wɔa dɔ li. Afɔ gbãtɔ si nàɖee nye be nàwɔ asitɔtrɔ le alesi nènɔa agbee ŋu, anɔ agbe si le bɔbɔe wu esi ma wò tsã.

Aɖaŋuɖoɖo aɖewoe nye si, eye ne womekpɔ nɔnɔmea gbɔ na wò keŋkeŋ o hã la, woate ŋu akpe ɖe ŋuwò nànɔ te ɖe wo nu. Gbã la, de dzesii be dɔwɔɖui ƒe gege le ame si le vome nye nusi bɔ le ɣeyiɣi siawo me. Eyata eɖanye ƒe kae nèxɔ alo nuteƒekpɔkpɔ kae le asiwò o, wɔ ɖoɖo do ŋgɔ fifia ɖe alesi nànɔ agbee ŋu be nàte ŋu anɔ te ɖe nuɖiɖeame ma tɔgbe nu.

Evelia, kpɔ nyuie be nusiwo mehiã kokoko le nunyiame kple avɔtata gome o ƒe fe gã aɖeke naganɔ ŋuwò o. Nɔ agbe ɖe nusiwo le asiwò nu, eye mègabui be yeate ŋu ava xe fe siwo anɔ ye ŋu to fetu si nèle mɔ kpɔm be woava xe na ye ne èxɔ ŋgɔyiyi alo ne woda ɖe fetu dzi na wò o. Nusi dzi egbegbe ƒe ganyawo le gbe tem ɖo na míe nye be mele be míaɖo ŋu ɖe etsɔme ŋu be ato mɔ ɖeka ɖaa o.

Etɔ̃lia, di mɔ siwo dzi nàto ana wò agbenɔnɔ nabɔbɔ eye nàɖe fe siwo le ŋuwò dzi kpɔtɔ. Esia bia hã be màgatsɔ nusiwo mehiã o ado agba na ɖokuiwò o, be nànɔ agbe bɔbɔe si sɔ alesi wòanya wɔ.

Enelia, gbugbɔ lé ŋku ɖe wò agbemetaɖodzinuwo, gbɔgbɔmetɔ kple ŋutilãmetɔwo ŋu, nàtrɔ asi le wo ŋu be nàte ŋu aɖo wo gbɔ. Emegbe àte ŋu awɔ wò nyametsotsowo katã woada asɔ kple wò taɖodzinuwo eye nàlé ŋku ɖe alesi woakpɔ ŋusẽ ɖe wò agbe dzii ŋu.

Mlɔeba la, mègana amesiwo le wò nutoa me siwo zãa ga geɖe ƒe agbenɔnɔ nadzro wò o, ne menye nenema o la woƒe nunɔamesiwo abiã ŋu na wò eye woable wò de woƒe agbenɔnɔ me.

Esiawoe nye aɖaŋuɖoɖo ʋɛ siwo ate ŋu akpɔ mia kple wò ƒomea ta tso kesinɔnuwo ƒe dediemanɔmanɔ le xexe si ɖo kudonu ƒe mɔ̃ me eye be miavo tso dzimaɖitsitsi si tsoa agbenɔnɔ siwo me amewo ƒo wo ɖokui ɖo egbea me.

Felix Rohatyn, si nye gadzraɖoƒedɔwɔla tsã gblɔ be: “Nu vevi aɖe gblẽ le míaƒe nuɖoanyi sia si ame aɖe ƒe dɔmakpɔwɔe naa ame bubu zua kesinɔtɔ la ŋu.” Wɔna vɔ le nuɖoanyi sia ŋu ale gbegbe be madidi o xexe aɖe si me gɔmesese si meva susu me na mí egbea kpɔ o la ava nɔ nyagbɔgblɔ si nye “agbemedɔwɔɖui” ŋu le axɔ ɖe eteƒe.—Yesaya 65:17-24; Petro II, 3:13.

[Etenuŋɔŋlɔ]

^ mm. 2 Míetrɔ ŋkɔa.