Dzo kpo yi emenuwo dzi

Dzo kpo yi emenuawo dzi

Ðe Agbe Va Le Nu Tsɛ Zum Wua?

Ðe Agbe Va Le Nu Tsɛ Zum Wua?

 Ðe Agbe Va Le Nu Tsɛ Zum Wua?

“Enye xexe si me agbe nye nu tsɛ le. Woate ŋu axe pound [sterling] alafa ʋɛ aɖewo ko adɔ woawu ame eye amesiwo alɔ̃ faa awɔ dɔ ma mele vevem o.”—The Scotsman.

Le amedzidzedze aɖe si ʋuʋu xexeame katã le April 1999 me la, ƒewuivi eve ge ɖe Columbine Kɔledzi, le Littleton, Colorado, U.S.A., hewu ame 15 tagbɔsesẽtɔe. Numekuku ɖee fia be Internet dzi nyatakakanɔƒe nɔ amedzidzelaawo dometɔ ɖeka si, si dzi wòŋlɔ ɖo be: “AME KUKUWO MEHEA NYA O!” Amedzidzela evea siaa ku le afɔkua me.

AMEWUWU bɔ ɖe afisiafi, eye ame gbogbo si womenya xexlẽme na o kuna veveseseku gbesiagbe. Le ƒe 1995 me la, South Africa, afisi wowua ame 75 le 100,000 ɖesiaɖe me le ye nye dukɔ si me wowu ame le wu le xexeame katã. Agbe megaɖi naneke kura le Anyiehe Amerika dukɔ aɖe me, afisi wowu amesiwo wu 6,000 le ƒe 1997 me le dunyahenyawo ta la me o. Ame dɔdɔ be woawu ame nye nusi bɔ. Nyatakaka aɖe gblɔ le dukɔ ma ŋu be: “Nukutɔe la, ɖeviwo wuwu hã dzi ɖe edzi le dukɔ ma me: Le ƒe 1996 me la, wowu ɖevi 4,322, si nye dzidziɖedzi 40 le alafa me le ƒe eve pɛ ko me.” Gake ɖeviwo gɔ̃ hã va le ame wum—wowua ɖevi bubuwo kple woawo ŋutɔ wo dzilawo. Agbe megaɖi naneke o vavã.

Nuka Gbɔe “Amewuwu ƒe Numamezuzu” Tso?

Nukae nudzɔdzɔ siawo kple akɔntabubuawo ɖe fia? Be ame geɖe megava le bubu dem agbe ŋu o. Amesiwo ŋusẽnɔƒe nɔnɔ kple ga biãa ŋu na wua amewo agɔ aɖeke madzemadzee. Atikevɔ̃ɖisitsala gãwo naa wowua ƒome blibowo. Wotrɔa ŋkɔ na woƒe amewuwuawo be megadze nu gbegblẽ boo o hezãa nya siawo abe amewo “gbagbã,” wo “tsɔtsrɔ̃,” wo “ɖeɖe ɖa,” alo wo “nu tsitsi” ene. Ameƒomevi aɖewo tsɔtsrɔ̃ ɖa kura  kple gbeɖekadolawo tsɔtsrɔ̃ ɖa kura va gblẽ nyaa ɖe edzi eye wòna amegbetɔ ƒe agbe zu fefenu. Ewɔe be amewuwu va zu nusi dzena gbesiagbe le television dzi nyatakakawo me le xexeame katã.

Ne míetsɔ ŋutasesẽ kple anyrawɔwɔ siwo wokafuna le television kple sinimawo me kpe ɖe esiawo ŋu la, edze ko abe ɖe ku va zu nudzɔdzɔ dziŋɔ aɖe si dzi míaƒe xexeame va nɔ te ɖo ene. Encyclopædia Britannica gblɔ le nusia ŋu be: “Le ƒe alafa 20 lia ƒe nuwuwu la, ewɔ nuku be ku va zu nyati si ŋu woƒoa nu le geɖe wu. Do ŋgɔ na ɣeyiɣi ma la, ewɔ nuku be womeƒoa nu tso eŋu ale le dzɔdzɔmeŋutinunya deŋgɔ me, kple le mɔ aɖe nu la, le xexemenunyawo me o.” Josep Fericgla, si nye amegbetɔwo ƒe dekɔnuwo ŋuti nufialagã si tso Catalonia gblɔ be “ame ƒe kue nye nya si ŋu woƒoa nu le wu le hadome eyata eva zu nu vevi siwo ŋu amewo gblɔa woƒe nukpɔsusu le wu ɖesiaɖe la dometɔ ɖeka.”

Ðewohĩ nusi ɖe dzesi wu le “amewuwu ƒe numamezuzu” sia ŋue nye dzixɔse si le ame geɖe si be ŋusẽ, gãnyenye, ga, kple dzidzɔkpɔkpɔ xɔ asi boo wu amegbetɔ ƒe agbe kple agbenyuinɔnɔ ŋuti dzidzenuwo.

Aleke “amewuwu ƒe numamezuzu” sia wɔna kakana? Nukae dzilawo ate ŋu awɔ atsɔ akpe akɔ kple ŋusẽkpɔɖeamedzi gbegblẽ sia si ƒo xlã wo eye wòle nu gblẽm le wo viwo ŋu lae? Esiawoe nye biabia siwo ŋu míaɖo le nyati siwo kplɔe ɖo me.

[Aɖaka/Nɔnɔmetata si le axa 4]

Ho Nenie Woxena ɖe Ame ƒe Agbe Ðeɖeɖa Ta?

▪ “Nuvlowɔha [siwo le Mumbai, India] me tɔ siwo nye ɖeviwo hiã ga ale gbegbe be woalɔ̃ awu ame ne woxe ga home si nye rupee 5,000 [dɔlar 115] pɛ ko na wo.”—Far Eastern Economic Review.

▪ “Ewu Ame aɖe si Tso Eme Va Yina le Esi Wògbe be Yemanae Sigaret O Ta.”Tanya gã si dze le La Tercera me le Santiago, Chile.

▪ “Ga si anɔ dɔlar 7,000 koe hiã be woawɔ ɖoɖo ɖe amewuwu ŋu le Russia [le ƒe 1995 me] . . . Dɔdɔ be woawu ame dzi ɖe edzi ŋutɔ le ganyawo ƒe tɔtrɔ si va le kɔmiunist ɖoɖoa ƒe gbagbã le Russia vɔ megbe.”—Moscow News si dona kwasiɖa ɖesiaɖe, abe alesi Reuters gblɔe ene.

▪ “Wolé xɔdzrala aɖe le Brooklyn . . . eye wotso enu be exe ga si nye dɔlar 1,500 ƒe akpa aɖe na ƒewuivi aɖe be wòawu ye srɔ̃nyɔnu funɔ kple nyɔnua dada.”—The New York Times.

▪ ‘Ga si woxena be woawu ame le England ƒe home le ɖiɖim. Ga si woxena be woawu ame ɖiɖi tso pound 30,000 si woxena ƒe atɔ̃ siwo va yi dzi va ɖo home si anya xe bɔbɔe, si nye pound 5,000 vaseɖe 10,000.’—The Guardian.

▪ ‘Balkantɔwo ƒe Nuvlowɔhawo Na Mafiawo Megaɖi Naneke O. Enye nuvlowɔha ƒomevi yeye si zãa ɖoɖo kple avuwɔnu yeyewo. Bɔmbwo kple tu siwo dana trena ɖe nu le wo si wote ŋu zãna faa.’—Guardian Weekly.