Dzo kpo yi emenuwo dzi

Dzo kpo yi emenuawo dzi

Tɔmanɔsiƒomewo—Ɣeyiɣiawo Ƒe Dzesi Wònye

Tɔmanɔsiƒomewo—Ɣeyiɣiawo Ƒe Dzesi Wònye

 Tɔmanɔsiƒomewo—Ɣeyiɣiawo Ƒe Dzesi Wònye

NUKAE nàgblɔ be eyae nye hadomekuxi si ɖe dzesi wu egbea? Gallup ƒe numekuku si wowɔ le United States ɖee fia be amesiwo wobia gbee dometɔ alafa memama 80 kloe bui be eyae nye “aƒe siwo me vifofo mele o.” Gallup ɖee fia be, ɖevi siwo wu miliɔn 27 le United States siwo mele wo fofowo ŋutɔŋutɔ gbɔ o, eye xexlẽme ma le dzidzim ɖe edzi kabakaba. Dukɔ Ƒoƒuawo ƒe Ðeviwo Ŋu Nyagbɔkpɔha ƒe nyatakaka aɖe gblɔ be yevuvi siwo wodzi le United States tso ƒe 1980 me dometɔ alafa memama 50 lɔƒo “anɔ dzilaɖekɛƒome me le woƒe ɖevimenɔɣi ƒe akpa aɖe. Le ameyibɔviwo gome la, memamaa nye 80 le alafa me lɔƒo.” Ale wɔ USA Today yɔ United States be enye “afisi tɔmanɔsiƒomewo bɔ ɖo wu le xexeame.”

Ke hã The Atlantic Monthly me nyati aɖe gblɔ be: “Menye Amerikatɔwo dome koe ƒomewo ƒe gbagbã ƒe dzidziɖedzia bɔ ɖo o. Ebɔ ɖe dukɔ deŋgɔwo katã kloe, si me Japan hã le me.” Eye togbɔ be kuxia ŋuti kɔntabubu mebɔ le dukɔ madeŋgɔwo me o hã la, edze abe woawo hã le eƒe fu kpem nenema ke ene. Magazine si nye World Watch gblɔ be, “zi geɖe la, ŋutsu siwo le [dukɔ dahewo me] gblẽa wo srɔ̃ kple wo viwo ɖi le ganyawo ƒe sesẽ ɖe edzi ta.” Le nyateƒe me la, numekuku aɖe si wowɔ le Carib-dukɔ aɖe me ɖee fia be vifofo alafa memama 22 siwo si ƒe enyi viwo le koe le wo viwo gbɔ ŋutɔŋutɔ.

Tɔmanɔsiviwo bɔ le Biblia ƒe ɣeyiɣiwo gɔ̃ hã me. (Mose V, 27:19; Psalmo 94:6) Gake le ɣemaɣi la, nusi koŋ na ɖeviwo zu tɔmanɔsiviwoe nye vifofowo ƒe ku. Agbalẽŋlɔla David Blankenhorn gblɔ be: “Egbea la, nusi koŋ le tɔmanɔamesi hem vɛ enye vifofo ƒe ame gbegblẽɖi.” Abe alesi míava kpɔe ene la, enye nyateƒe be alesi tɔmanɔsiviwo ƒe xexlẽme le dzidzim ɖe edzii ɖo kpe edzi be ame geɖe “melɔ̃a ame ƒe nya” egbea o. Le Biblia ƒe nya nu la, esia hã nye kpeɖodzi ɖeka be míele “ŋkeke mamlɛawo” me.—Timoteo II, 3:1-3.

Gake le ɖeviwo gome la, dzigbanyae vifofo ƒe bubu le woƒe agbe me nye na wo. Ehea vevesese kple dzigbaname si ate ŋu agblẽ nu le ame ŋu tegbee vɛ. Eyata le nyati siawo siwo tsiã ɖe wo nɔewo nu me la, míadzro nɔnɔme siawo siwo vana ɖe wo nɔewo yome la me, menye be míatsɔ agbã dzi na nuxlẽlawo o, ke boŋ be míana nyatakaka siwo ate ŋu akpe ɖe ƒomewo ŋu be woatsi nusia si gblẽa nu le ame ŋu la nu.