Yesaya 38:1-22

  • Hizkiya ƒe dɔléle kple hayahaya (1-22)

    • Ŋudzedzekpɔkpɔ ƒe ha (10-20)

38  Le ŋkeke mawo me la, Hizkiya dze dɔ de kuku ge kloe.+ Eya ta nyagblɔɖila Yesaya,+ Amoz vi, va egbɔ gblɔ nɛ be, “Ale Yehowa gblɔe nye esi: ‘Wɔ ɖoɖo na wò aƒemetɔwo, elabena èle kuku ge; màhaya o.’”+  Enumake Hizkiya trɔ mo ɖe gli ŋu hedo gbe ɖa na Yehowa be:  “Oo Yehowa, meɖe kuku, ɖo ŋku+ ale si mezɔ le ŋkuwòme le nyateƒe kple dzi blibo me,+ eye mewɔ nu si nyo le ŋkuwòme la dzi.” Eye Hizkiya fa avi hehehe.  Yehowa ƒe gbe va na Yesaya be:  “Trɔ yi nàɖagblɔ na Hizkiya be,+ ‘Ale Yehowa, tɔgbuiwò David ƒe Mawu la, gblɔe nye esi: “Mese wò gbedodoɖa.+ Mekpɔ wò aɖatsiwo.+ Kpɔ ɖa, matsɔ ƒe wuiatɔ̃ akpe wò agbenɔƒewo,*+  maɖe wò kple du sia tso Asiria-fia si me, eye maʋli du sia ta.+  Esiae nye dzesi na wò tso Yehowa gbɔ, be Yehowa awɔ nya si wògblɔ la dzi:+  Kpɔ ɖa, mana vɔvɔli si ɣe na wòdze Ahaz ƒe atrakpuiawo* dzi la nagbugbɔ ɖe megbe afɔ ewo.”’”+ Ale ɣe la gbugbɔ ɖe megbe afɔ ewo tso atrakpui siwo dzi wòva ɖo la.  Yuda-fia Hizkiya ƒe nya si wòŋlɔ, esime wòdze dɔ, eye wòhaya tso eƒe dɔlélea me lae nye esi: 10  Megblɔ be: “Le nye agbemeŋkekewo ƒe domedome la,Mage ɖe Tsiẽƒe* ƒe agbowo me. Woaxɔ nye agbenɔƒe susɔeawo le asinye.” 11  Megblɔ be: “Nyemakpɔ Yah,* Yah, le agbagbeawo ƒe anyigba dzi o.+ Nyemagakpɔ amegbetɔwo azɔ o,Ne mele ame siwo dome nu sia nu nu yi le la gbɔ. 12  Woho nye nɔƒe hetsɔe dzoe le gbɔnye+Abe alẽkplɔlawo ƒe agbadɔ ene. Meŋlɔ́ nye agbe abe ale si avɔlɔ̃la ŋlɔ́a avɔe ene.Etsom ɖa abe ale si avɔlɔ̃la tsoa kawo le agbati me ene. Ètsɔam dea asi zã kple keli.+ 13  Mefa dzi na ɖokuinye va se ɖe ŋdi. Egbãa nye ƒuwo katã abe dzata ene;Ètsɔam dea asi zã kple keli.+ 14  Mele fafam abe sagbadre kple tsãlɛ* ene;+Mele xɔxlɔ̃m abe ahɔnɛ ene.+ Nye ŋkuwo kpɔ dzi ʋuu nu te wo ŋu:+ ‘Oo, Yehowa mele nu xam ŋutɔ,Kpe ɖe ŋunye!’*+ 15  Nya kae magblɔ? Eƒo nu nam eye wòwɔe hã. Le nye agbemeŋkekewo katã me la, mazɔ ɖokuibɔbɔtɔeLe nye vevesesewo ta.* 16  ‘Oo Yehowa, nu siawo* tae ame nɔa agbe ɖo,Eye nu siawo mee nye gbɔgbɔ le agbe le. Àgana lãmesẽm, eye àxɔm ɖe agbe.+ 17  Kpɔ ɖa, veve sɔŋ xɔ ɖe tomefafa teƒe nam;Gake esi nèlɔ̃m* taÈɖem tso tsɔtsrɔ̃ ƒe do me.+ Ètsɔ nye nu vɔ̃wo katã ƒu gbe ɖe megbewò.*+ 18  Elabena Tsiẽƒe* mate ŋu ado wò ɖe dzi o,+Ku mate ŋu akafu wò o.+ Aʋlimeyilawo mate ŋu anɔ mɔ kpɔm na wò nyateƒetɔnyenye o.+ 19  Agbagbeawo, agbagbeawo koe akafu wò,Abe ale si mete ŋu le ewɔm egbe sia ene. Fofowo agblɔ wò nyateƒetɔnyenye na wo viwo.+ 20  Oo Yehowa, xɔ nam,Eye míatsɔ kasaŋkuwo aƒo nye hawo+Le míaƒe agbemeŋkekewo katã me le Yehowa ƒe aƒe la me.’”+ 21  Eye Yesaya gblɔ be: “Mitsɔ gbotsetse ƒuƒu kɔ vɛ, eye mitsɔe ɖo ƒoƒoe la dzi, ne wòahaya.”+ 22  Do ŋgɔ la, Hizkiya bia be: “Nu kae nye dzesi be magayi Yehowa ƒe aƒe la me?”+

Etenuŋɔŋlɔ

Egɔmeɖeɖe tẽe, “agbemeŋkekewo.”
Ðewohĩ wozãa atrakpui siawo tsɔ bua game, abe ale si wònɔna le ɣegaƒoƒofianu dzi ene.
Alo, “Sheol,” si nye ameƒomea ƒe yɔdo. Kpɔ Nya Tɔxɛwo Gɔmeɖeƒea.
“Yah” nye ŋkɔ Yehowa ŋɔŋlɔ kpuie.
Alo, “avese.”
Egɔmeɖeɖe tẽe, “da megbe nam.”
Alo, “luʋɔ ƒe vevesese ta.”
Efia, Mawu ƒe nyawo kple nuwɔnawo.
Alo, “nèlɔ̃ nye luʋɔ.”
Alo, “Èɖe nye nu vɔ̃wo ɖa le ŋkuwò me.”
Alo, “Sheol,” si nye ameƒomea ƒe yɔdo. Kpɔ Nya Tɔxɛwo Gɔmeɖeƒea.