Psalmowo 69:1-36
Na henɔ la; ɖe “Dzogbenyawo” ƒe gbe nu. David ƒe ha.
69 Oo Mawu, xɔ nam, elabena nye agbe ɖo afɔku me le tsiawo me.*+
2 Meɖo ba yi to, afi si afɔɖoƒe aɖeke mele o.+
Mege ɖe tɔ goglowo me,Eye tɔsisi kplɔm yina.+
3 Medo ɣli ʋuu ɖeɖi te ŋunye;+Nye gbe me xe.
Mele mɔ kpɔm na nye Mawu ʋuu nu te nye ŋkuwo ŋu.+
4 Ame siwo lé fum dzodzro+ laSɔ gbɔ wu nye taɖa.
Ame siwo di be ɖoɖoe nazi le nunye,Siwo nye nye futɔ vɔ̃ɖiwo* la, va sɔ gbɔ ŋutɔ.
Wozi dzinye meɖe asi le nu si nyemefi o la ŋu.
5 Oo Mawu, ènya nye bometsitsi,Eye nye fɔɖiɖiwo mele ɣaɣla ɖe wò o.
6 Mègana ame siwo kpɔa mɔ na wò la naɖu ŋukpe le tanye o,Oo, Aƒetɔ Dziɖulagã, aʋakɔwo ƒe Yehowa.
Mègana ame siwo dia wò la naɖu ŋukpe le tanye o,Oo, Israel ƒe Mawu.
7 Elabena tawòe wole vlo domem ɖo;+Eye ŋukpe lém.+
8 Mezu amedzro na nɔvinyeŋutsuwo,Kple ame tutɔ na danyeviwo.+
9 Elabena ŋuʋaʋã ɖe wò aƒe ŋu le bibim le menye abe dzo ene,+Eye ame siwo le vlo dom wò la ƒe vlodoamewo va dzinye.+
10 Esi mebɔbɔ ɖokuinye* ɖe anyi hetsi nu dɔ* la,Vlododo ko wòzu nam.
11 Esi meta akpanya la,Alɔmeɖenu* ko meva zu na wo.
12 Ame siwo bɔbɔ nɔ dugbo la me le nu ƒom le ŋunye,Eye ahanomunɔwo kpa ha dem.
13 Ke nye gbedodoɖa ɖo gbɔwò,Oo Yehowa, eɖo gbɔwò le amenuveɣi.+
Oo Mawu, tɔ nam le wò lɔlɔ̃ si nu metsina gbeɖe o la nu,Le wò xɔxɔdɔ siwo medana le edzi o la nu.+
14 Ðem tso ba me;Mègana mayi to o.
Ðem tso ame siwo lé fum la si me,Eye nàɖem tso tɔ goglowo me.+
15 Mègana tɔɖɔɖɔ nakplɔm dzoe,+Alo tɔ goglowo namim loo,Alo aʋli* natu eƒe nu ɖe dzinye o.+
16 Oo Yehowa, tɔ nam, elabena wò lɔlɔ̃ si nu metsina o la nyo ŋutɔ.+
Trɔ ɖe ŋunye le wò nublanuikpɔkpɔ sɔgbɔ la ta,+
17 Eye mègaɣla wò mo ɖe wò subɔla o.+
Tɔ nam kaba, elabena meɖo xaxa me.+
18 Te ɖe ŋunye nàxɔ nam;*Ðem, le nye futɔwo ta.
19 Wò ŋutɔ ènya nye vlododo, nye ŋukpe kple ale si woɖi gbɔm.+
Wò ŋkuwo le nye futɔwo katã ŋu.
20 Vlododo gbã dzi nam, eye hayahaya mele eŋu o.*
Menɔ mɔ kpɔm be ame aɖe ase veve ɖe nunye, ke ɖeke meli o,+Mekpɔ mɔ na akɔfalawo hã, ke nyemekpɔ ɖeke o.+
21 Ke boŋ wotsɔ aɖi* nam ɖe nuɖuɖu teƒe,+Eye esi tsikɔ wum la, wona aha tsitsim be mano.+
22 Na woƒe kplɔ̃ nazu ɖɔ na wo,Eye woƒe dzidzedzekpɔkpɔ nazu mɔ̃ aɖe wo.+
23 Na woƒe ŋkuwo dzi natsyɔ ne woagakpɔ nu o,Eye na woƒe aliwo nanɔ ƒoƒom tititi ɖaa.
24 Trɔ wò dziku kɔ ɖe wo dzi,Eye wò dɔmedzoe netu wo.+
25 Woƒe nɔƒewo* nezu aƒedo;Ame aɖeke meganɔ woƒe agbadɔwo me o.+
26 Elabena wole ame si nèƒo la yome tim,Eye woléa ame siwo ŋu nède abii la ƒe vevesesewo ɖe nu nɔa yiyim.
27 Bu fɔ wo nàgabu fɔ wo ɖe edzi,Eye mègana wò dzɔdzɔenyenye ƒe gome aɖeke wo o.
28 Na woatutu woƒe ŋkɔ ɖa le agbagbeawo ƒe agbalẽ* la me,+Eye womegaŋlɔ woƒe ŋkɔ ɖe ame dzɔdzɔewo dome o.+
29 Ke nye la, mele fu kpem, le veve sem.+
Oo Mawu, wò xɔname nekpɔ tanye.
30 Madzi kafukafuha na Mawu ƒe ŋkɔ,Eye matsɔ akpedada adoe ɖe dzi.
31 Esia adze Yehowa ŋu wu nyitsu,Wu nyitsu si ƒe dzowo do, eye afɔkli me fe nɛ.+
32 Ame fafawo akpɔe eye dzi adzɔ wo.
Mi ame siwo le Mawu dim la, miaƒe dzi negbɔ agbe.
33 Elabena Yehowa ɖoa to ame dahewo,+Eye mado vlo eƒe ame siwo woɖe aboyoe la o.+
34 Dziƒo kple anyigba nekafui,+Atsiaƒuwo kple nu siwo katã ʋãna le wo me la hã nekafui.
35 Elabena Mawu axɔ na Zion,+Eye wòagbugbɔ Yuda duwo atso,Woanɔ afi ma, eye wòazu wo tɔ.*
36 Eƒe subɔlawo ƒe dzidzimeviwo atsɔe anyi domee,+Eye ame siwo lɔ̃a eƒe ŋkɔ+ la anɔ eme.
Etenuŋɔŋlɔ
^ Alo, “elabena tsiawo de nye luʋɔ gbɔ ke.”
^ Alo, “Siwo lé fum madzemadzee.”
^ Alo, “luʋɔnye.”
^ Agate ŋu afia, “Esi mefa avi hetsi nu dɔ.”
^ Egɔmeɖeɖe tẽe, “lodonu.”
^ Alo, “vudo.”
^ Alo, “Te ɖe nye luʋɔ ŋu ne nàxɔe.”
^ Alo, “eye dzi ɖe le ƒonye vɔ kloe.”
^ Alo, “aɖigbe.”
^ Alo, “nɔƒe siwo ŋu wotɔ kpɔ ɖo.”
^ Alo, “agbegbalẽ.”
^ Efia, anyigba la.
