Psalmowo 68:1-35
Na henɔ la. David ƒe ha. Kafukafuha. Hadzidzi.
68 Mawu netso, ne eƒe futɔwo naka hlẽ,Eye ame siwo léa fui la nasi le eŋkume.+
2 Ale si ya kplɔa dzudzɔ dzonae la, nenemae nàkplɔ wo adzoe;Ale si anyixe lólona le dzo nui la,Nenemae ame vɔ̃ɖiwo nu ayi le Mawu ŋkume.+
3 Ke ame dzɔdzɔewo ya akpɔ dzidzɔ;+Woatso aseye le Mawu ŋkume;Eye woagli kple dzidzɔ.
4 Midzi ha na Mawu; midzi kafukafuha* na eƒe ŋkɔ.+
Midzi ha na Ame si to gbedzi* gbɔna,Eŋkɔe+ nye Yah!* Mitso aseye le eŋkume!
5 Tsyɔ̃eviwo fofo kple ahosiwo takpɔlae*+
Mawu nye, le eƒe kɔkɔeƒe la.+
6 Mawu naa nɔƒe ame tsiakogowo;+Eɖea ga gamenɔlawo henaa nu dzea edzi na wo.+
Ke tosẽlawo* ya atsi kuɖiɖinyigba dzi.+
7 Oo Mawu, esi nènɔ ŋgɔ na wò dukɔ,+Esi nèzɔ to gbegbe la, (Sela)
8 Anyigba ʋuʋu;+Dziƒo dza tsi le Mawu ŋkume;Sinai sia hã ʋuʋu le Mawu, Israel ƒe Mawu la ŋkume.+
9 Oo Mawu, èna tsi dza bababa,Ègado ŋusẽ wò ame* siwo ŋu ɖeɖi te belibeli la.
10 Wonɔ wò agbadɔwo me;+Oo Mawu, le wò nyuiwɔwɔ ta nèkpɔ ame dahewo dzi.
11 Yehowa ŋutɔe ɖe gbe;Nyɔnu nya nyui gblɔlawo de ha kpaŋ.+
12 Aʋakɔwo ƒe fiawo de afɔ du me,+ wode afɔ du me!
Nyɔnu si le aƒe me la hã xɔ aboyonuawo ƒe ɖe.+
13 Togbɔ be mi ŋutsuwo miemlɔ asaɖa ƒe dzowo* gbɔ hã la,Ahɔnɛ ƒe aʋala siwo ŋu wofa klosalo ɖo,Kple eƒe fu siwo ŋu wofa sika nyuitɔ ɖo lae miakpɔ.
14 Esi Ŋusẽkatãtɔ la ka eƒe fiawo hlẽ la,+Sno dza le Zalmon.*
15 Basan towo+ nye Mawu ƒe to;*To kɔkɔwoe Basan towo nye.
16 Mi to kɔkɔwo, nu ka tae miele ŋu biãmTo si dzi Mawu tia be yeanɔ la?+
Ɛ̃, afi mae Yehowa anɔ tegbee.+
17 Mawu ƒe aʋatasiaɖamwo le akpe nanewo, wonye akpe teƒe akpewo.+
Yehowa ŋutɔ tso Sinai va kɔkɔeƒe la.+
18 Èlia yi dzi ʋĩi;+Èkplɔ aboyomewo yii;Èxɔ nunana siwo nye amewo,+Ɛ̃, tosẽlawo gɔ̃ hã,+ be yeanɔ wo dome, Oo Yah, Mawu.
19 Woakafu Yehowa, ame si tsɔa míaƒe agbawo na mí gbe sia gbe,+Mawu vavã si nye míaƒe xɔnametɔ la. (Sela)
20 Mawu vavã la nye Mawu si xɔna na ame;+Eye Aƒetɔ Dziɖulagã Yehowae ɖea ame tso ku si me.+
21 Nyateƒee, Mawu agbã ta na eƒe futɔwo,Kple dzodome na ame sia ame si kpɔtɔ le eƒe fɔɖiɖi me.*+
22 Yehowa be: “Makplɔ wo tso Basan agbɔe;+Makplɔ wo tso atsiaƒu ƒe gogloeƒewo agbɔe,
23 Ne nàklɔ wò afɔ ɖe ʋu me,+Ne wò avuwo ƒe aɖe nakpɔ wo tɔ gome le futɔwo ŋu.”
24 Oo Mawu, wokpɔ wò aʋadziɖuɖu ƒe gbɔlɔhawo,Nye Mawu, nye Fia, ƒe aʋadziɖuɖu ƒe gbɔlɔhawo zɔ va kɔkɔeƒe la.+
25 Hadzilawo dze ŋgɔ, kasaŋkuƒolawo xe megbe;+Ðetugbui axatsɛƒolawo le wo titina.+
26 Mikafu Mawu le ameha gãwo dome;*Mikafu Yehowa, mi ame siwo dzɔ tso Israel ƒe Tsidzɔƒe+ la.
27 Benyamin,+ si nye woƒe suetɔ la, le wo dzi ɖum,Yuda-megãwo kple woƒe ame hahooawo,Kpakple Zebulon-megãwo kple Naftali-megãwo hã.
28 Wò Mawu ɖoe be ŋusẽ naɖo ŋuwò.
Oo Mawu, wò, ame si wɔe na mí, ɖe wò ŋusẽ fia.+
29 Le wò gbedoxɔ si le Yerusalem ta,+Fiawo atsɔ nunanawo avɛ na wò.+
30 Blu ɖe gbemelã siwo le aɖawo me,Ðe nyitsuwo+ kple nyiviwo ƒe ha la ta,Va se ɖe esime dukɔwo natsɔ ɖokuibɔbɔ alɔ klosalo vɛ.*
Ka dukɔ siwo lɔ̃a aʋawɔwɔ la ya hlẽ.
31 Woatsɔ gadzẽnuwo atso Egipte avɛ;*+Kus aɖe abla atsɔ nunanawo ɖe asi avɛ na Mawu.
32 Oo, anyigbadzifiaɖuƒewo, midzi ha na Mawu,+Midzi kafukafuha* na Yehowa, (Sela)
33 Na Ame si bɔbɔ nɔ dziƒowo ƒe dziƒo si li tso tititi.+
Kpɔ ɖa! Eɖe gbe, ena eƒe gbe sesẽ la ɖi.
34 Miɖe gbeƒã Mawu ƒe ŋusẽ.+
Eƒe gãnyenye le Israel dzi,Eye eƒe ŋusẽ le dziŋgɔli* me.
35 Ŋɔdzi le Mawu ŋu le eƒe kɔkɔeƒe gã la.*+
Israel ƒe Mawu wònye,Ame si naa ŋusẽ kple ŋutete dukɔ la.+
Woakafu Mawu.
Etenuŋɔŋlɔ
^ Alo, “miƒo ha.”
^ Agate ŋu afia “le alilikpowo dzi.”
^ Yah nye ŋkɔ Yehowa ŋɔŋlɔ kpuie.
^ Egɔmeɖeɖe tẽe, “ƒe ʋɔnudrɔ̃lae.”
^ Alo, “aglãdzelawo.”
^ Egɔmeɖeɖe tẽe, “wò domenyinu.”
^ Agate ŋu afia, “lãkpɔwo.”
^ Alo, “Enɔ abe ɖe sno dza ɖe Zalmon ene.”
^ Alo, “nye to gã si nya kpɔ.”
^ Alo, “kpɔtɔ le zɔzɔm le fɔɖiɖi me.”
^ Egɔmeɖeɖe tẽe, “le takpekpewo me.”
^ Agate ŋu afia, “dukɔwo nanya avuzi le klosalo dzi.”
^ Alo, “Ame dɔdɔwo atso Egpite ava.”
^ Alo, “Miƒo ha.”
^ Egɔmeɖeɖe tẽe, “alilikpowo.”
^ Egɔmeɖeɖe tẽe, “Mawu, ŋɔdzi le ŋuwò le wò kɔkɔeƒe gã la.”
