Psalmowo 22:1-31
Na henɔ la, ɖe “Agudzedzezinɔ”* ƒe gbe nu. David ƒe ha.
22 Nye Mawu, nye Mawu, nu ka ŋuti nègblẽm ɖi?+
Nu ka ŋuti mètsɔ gbɔnye axɔ nam o,Eye nèle adzɔge ʋĩi esi mele lãgbelãgbe dom?+
2 Oo, nye Mawu, meyɔa wò le ŋkeke me, gake mètɔna nam o;+Le zã me hã, ɖoɖoe mezina le nunye o.
3 Ke wò la, èle kɔkɔe,+Eye Israel ƒe kafukafu ƒo xlã wò godoo.*
4 Ŋuwòe mía fofowo ɖo ŋu ɖo;+Ŋuwòe woɖo dzi ɖo, eye nèxɔ na wo.+
5 Wòe wodo ɣli na, eye nèɖe wo;Ŋuwòe woɖo ŋu ɖo, eye ŋu mekpe wo o.+
6 Ke nye la, nyévi ko menye, menye amegbetɔ o,Amewo ɖea alɔme le ŋunye hedoa vlom.+
7 Ame siwo katã kpɔam la ɖua fewu le ŋunye;+Wogbigbia nu ɖe ŋunye heʋuʋua ta gblɔna be:+
8 “Etsɔ eɖokui na Yehowa. Nexɔ nɛ!
Neɖee, elabena eƒe nu nyo eŋu!”+
9 Ke wòe hem tso vidzidɔ me,+Wòe na menɔ dedie le danye ƒe no nu.
10 Wotsɔm de asi na wò tso esime wodzim;Wòe nye nye Mawu tso danye ƒe dɔ me ke.
11 Mèganɔ adzɔge tso gbɔnye o, elabena xaxa tum+Eye xɔnametɔ bubu aɖeke megali nam o.+
12 Nyitsu geɖewo ɖe to ɖem;+Basan-nyitsu sesẽwo ƒo xlãm.+
13 Woke woƒe nu baa ɖe ŋunye,+Abe dzata si le gbe tem hele eƒe nuléle vuvum ene.+
14 Wotrɔm kɔ ɖi abe tsi ene;Eye nye ƒuwo katã gli le wo kpeƒewo.
Nye dzi zu abe anyixe ene;+Elólo le dɔ me nam.+
15 Wɔna vɔ le ŋunye abe ze gbagbã ene;+Nye aɖe lé ɖe nye nyéwo ŋu;+Eye nètsɔm ɖo kudo nu.+
16 Avuwo ɖe to ɖem;+Ame vɔ̃ɖiwo ƒe ha xaxam ɖo.+Wodze nye asiwo kple nye afɔwo dzi abe dzata ene.+
17 Mate ŋu axlẽ nye ƒuwo katã.+
Amewo kpɔe, eye wofɔ ŋku ɖe dzinye.
18 Woma nye awuwo ɖe wo nɔewo dome,Eye wodzidze nu ɖe nye awu dzi.+
19 Ke wò, Oo Yehowa, mèganɔ adzɔge o.+
Oo, nye ŋusẽ; netsɔ nàva kpe ɖe ŋunye.+
20 Ðem* tso yi nu,Ðe nye agbe xɔasi la* tso avuwo si me;+
21 Ðem tso dzata ƒe nu me+ kple gbenyiwo ƒe dzowo nu;Tɔ nam, eye nàɖem.
22 Maɖe gbeƒã wò ŋkɔ na nɔvinyewo;+Makafu wò le amehawo dome.+
23 Mi ame siwo vɔ̃a Yehowa, mikafui!
Mi Yakob ƒe dzidzimeviwo katã, mitsɔ ŋutikɔkɔe nɛ!+
Eye mi Israel ƒe dzidzimeviwo katã, mivɔ̃e.
24 Elabena medo vlo alo nyɔ ŋu hiãtɔ la ƒe fukpekpe o;+Meɣla eƒe ŋkume ɖee o.+
Eye esi wòdo ɣli nɛ be wòaxɔ na ye la, esee.+
25 Makafu wò le ameha gãwo dome;+Maxe nye adzɔgbeɖefewo le ame siwo vɔ̃nɛ la ŋkume.
26 Ame fatuwo aɖu nu aɖi ƒo;+Ame siwo dia Yehowa la akafui.+
Mise vivi le agbe me tegbee.*
27 Anyigba ƒe mlɔenuwo katã aɖo ŋku Yehowa dzi, eye woatrɔ ɖe eŋu.
Dukɔwo ƒe ƒomewo katã ade ta agu ɖe ŋkuwòme.+
28 Elabena Yehowa tɔe nye fianyenye la;+Eye wòle fia ɖum ɖe dukɔwo dzi.
29 Ame siwo katã nu dze edzi na* le anyigba la dzi aɖu nu ade ta agu ɖe eŋkume;Ame siwo katã yina ketu me la ava dze klo le eŋkume;Eye wo dometɔ aɖeke mate ŋu axɔ eɖokui* ɖe agbe o.
30 Woƒe dzidzimeviwo* asubɔe;Woaƒo nu tso Yehowa ŋu na dzidzime si ava dzɔ la.
31 Woava gblɔ eƒe dzɔdzɔenyenye ŋu nya.
Woagblɔ nu siwo wòwɔ la na wo megbeviwo.
Etenuŋɔŋlɔ
^ Nya sia ate ŋu anye hagbe alo hadzidzi ƒe atsyã aɖe.
^ Alo, “Israel ƒe kafukafu domee nèli wò fiazikpui ɖo.”
^ Alo, “Ðe nye luʋɔ.”
^ Egɔmeɖeɖe tẽe, “nye nu ɖekɛ la,” eƒe luʋɔ alo agbee wòwɔnɛ.
^ Egɔmeɖeɖe tẽe, “Agbe neɖo miaƒe dziwo ŋu tegbee.”
^ Egɔmeɖeɖe tẽe, “Ame siwo katã da ami.”
^ Alo, “eƒe luʋɔ.”
^ Egɔmeɖeɖe tẽe, “dzidzimevi aɖe.”
