Lododowo 12:1-28
12 Ame si lɔ̃a amehehe la, elɔ̃a sidzedze,+Ke ame si lé fu mokaname la, menyaa nu o.+
2 Ame nyui ƒe nu dzea Yehowa ŋu,Ke ebua fɔ ame si ɖoa susu vɔ̃wo ɖe tame.+
3 Nu vɔ̃ɖi wɔwɔ mana ame nali ke akpɔ o,+Ke womaho ame dzɔdzɔe ya gbeɖe o.
4 Srɔ̃nyɔnu zazɛ̃ nye fiakuku na srɔ̃a,+Ke srɔ̃nyɔnu ŋukpenanuwɔla nye ŋuɖui le ƒutome na srɔ̃a.+
5 Ame dzɔdzɔewo ƒe tamesusuwo le eteƒe,Ke ame vɔ̃ɖiwo ƒe mɔfiafia nye beble ɖeɖe sɔŋ.
6 Ame vɔ̃ɖiwo ƒe nyawo trea azã ɖi,*+Ke nu dzɔdzɔe wɔlawo ƒe nyawo xɔa wo ɖe agbe.+
7 Ne woho ame vɔ̃ɖiwo la, womaganɔ anyi o,Ke ame dzɔdzɔewo ya ƒe aƒe anɔ te ɖaa.+
8 Woakafu ame si kea eƒe nu le nunya me,+Ke woado vlo ame si ƒe dzi metoa mɔ ɖeka o.+
9 Ame si wobuna ame tsɛe, gake subɔvi le esi laNyo wu ame si ƒoa adegbe, gake nuɖuɖu mele esi o.*+
10 Ame dzɔdzɔe léa be na eƒe aƒemelãwo,*+Gake ame vɔ̃ɖiwo ƒe nublanuikpɔkpɔ gɔ̃ hã nye tagbɔsesẽ.
11 Ame si dea eya ŋutɔ ƒe agble la, aɖu nu aɖi ƒo,+Ke ame si tia nu maɖinuwo yome la, tagbɔ mele esi o.*
12 Nu si nu vlo wɔlawo lé la le ŋu biãm na ame vɔ̃ɖi,Ke ame dzɔdzɔe la le abe ati si tsea ku ene.
13 Ame vɔ̃ɖi ƒe nya vlowo nyea mɔ̃ ɖenɛ,+Ke ame dzɔdzɔe ya dona le xaxa me.
14 Ame ƒe nu ƒe kutsetse hea nu nyuiwo vana nɛ taŋtaŋ,+Eye eƒe asinudɔwɔwɔ ahe viɖe geɖe avɛ nɛ.
15 Bometsila ƒe mɔ dzɔna le eya ŋutɔ ŋkume,+Ke nunyala xɔa aɖaŋuɖoɖo.+
16 Bometsilae mesaa dzikudodo o,*+Ke aɖaŋudzela ya doa toku dzudzu.*
17 Ðasefo nyateƒetɔ gblɔa nya si le eteƒe,*Ke aʋatsoɖasefo daa alakpa.
18 Nuƒoƒo eŋumabumabui le abe yitɔame ene,Ke nunyalawo ƒe aɖe daa gbe le ame ŋu.+
19 Nyateƒenuyi ali ke tegbee,+Ke aʋatsoɖe ya nu mesẽna yina o.+
20 Beble le dzi me na ame siwo ɖoa nu vɔ̃ɖi wɔwɔ,Ke ame siwo doa ŋutifafa ɖe ŋgɔ* la kpɔa dzidzɔ.+
21 Vɔ̃ aɖeke maɖi kpe ame dzɔdzɔe o,+Ke vɔ̃ aƒo go ame vɔ̃ɖiwo wòade edeƒe.+
22 Yehowa nyɔa ŋu alakpanuyiwo,+Ke ame siwo wɔa nuteƒe la ƒe nu dzea eŋu.
23 Aɖaŋudzela dzraa eƒe sidzedze ɖo,Ke bometsila ƒe dzi doa boblo eƒe bometsitsi.+
24 Veviedola ƒe asie aɖu dzi;+Ke kuviatɔ ƒe asie awɔ kluvidɔ.+
25 Nuxaxa le dzi me ɖe wòtea ame ƒe dzi ɖe anyi,*+Ke nya nyui nana dzi kpɔa dzidzɔ.+
26 Ame dzɔdzɔe ƒe ŋku nɔa eƒe lãnyiƒe ŋu,Ke ame vɔ̃ɖiwo ƒe mɔ kplɔa wo tranae.
27 Kuviawɔwɔ mekplɔa ame yia adegbe o,+Ke veviedodo la, nu xɔasi wònye na ame.
28 Dzɔdzɔenyenye ƒe mɔ kplɔa ame yia agbe me;+Eƒe mɔ menye kumɔ o.
Etenuŋɔŋlɔ
^ Egɔmeɖeɖe tẽe, “dea xa ɖi ɖe ʋukɔkɔɖi ŋu.”
^ Egɔmeɖeɖe tẽe, “gake abolokoe le ewɔm.”
^ Alo, “kpɔa eƒe aƒemelãwo ƒe luʋɔ ta.”
^ Egɔmeɖeɖe tẽe, “dzi nyanu mele esi o.”
^ Egɔmeɖeɖe tẽe, “Bometsilae doa dziku gbe ma gbe ke.”
^ Egɔmeɖeɖe tẽe, “tsyɔa nu dzudzu dzi.”
^ Egɔmeɖeɖe tẽe, “nya dzɔdzɔe.”
^ Egɔmeɖeɖe tẽe, “ame siwo ɖoa ŋutifafaɖaŋu.”
^ Alo, “ɖe wònana ame léa blanui.”
