Ezekiel 7:1-27

  • Nuwuwua ɖo (1-27)

    • Vɔ̃ aɖe si medzɔ kpɔ o (5)

    • Woatsɔ woƒe klosalo aƒu gbe ɖe ablɔwo dzi (19)

    • Woagblẽ kɔ ɖo na gbedoxɔa (22)

7  Yehowa ƒe gbe gava nam be:  “Amegbetɔvi, ale Aƒetɔ Dziɖulagã Yehowa gblɔ na Israel-nyigbae nye esi: ‘Nuwuwu ɖo! Nuwuwu ɖo na anyigba la ƒe dzogoe eneawo.  Azɔ wò nuwuwu la ɖo, eye mana nye dɔmedzoe nabi ɖe ŋuwò, madrɔ̃ ʋɔnu wò ɖe wò zɔzɔme nu, eye mabia akɔnta wò ɖe ŋunyɔnu siwo katã nèwɔ la ta.  Nye ŋku makpɔ nublanui na wò o, eye nye dɔme hã matrɔ ɖe ŋuwò o,+ elabena mahe wò zɔzɔme ava dziwò, eye àkpe fu ɖe wò ŋunyɔnu siwo nèwɔ la ta.+ Ne nàdze sii be, nyee nye Yehowa.’+  “Ale Aƒetɔ Dziɖulagã Yehowa gblɔe nye esi: ‘Kpɔ ɖa! Vɔ̃, vɔ̃ aɖe si medzɔ kpɔ o la gbɔna!+  Nuwuwu gbɔna; Nuwuwu la ava; atso* ɖe ŋuwò. Kpɔ ɖa! Egbɔna.  Eɖo dziwò,* wò anyigba la dzi nɔla. Ɣeyiɣi la gbɔna, ŋkeke la gogo.+ Zitɔtɔ ye li, ke menye aseyetsotso le towo dzi o.  “‘Eteƒe madidi o matrɔ nye dɔmedzoe aƒo ɖe dziwò,+ eye maɖe nye dziku blibo la ɖe ŋuwò,+ madrɔ̃ ʋɔnu wò ɖe wò zɔzɔme nu, eye mabia akɔnta wò ɖe ŋunyɔnu siwo katã nèwɔ la ta.  Nye ŋku makpɔ nublanui o, eye nye dɔme hã matrɔ ɖe ŋuwò o.+ Mahe wò nuwɔnawo me tsonuwo kple wò ŋunyɔnuwɔwɔwo me tsonuwo ava dziwò. Ne nàdze sii be, nye Yehowa ye le ƒowòm.+ 10  “‘Kpɔ ɖa, ŋkeke la! Kpɔ ɖa, egbɔna!+ Eɖo dziwò;* ameƒoti la ƒo se, eye ɖokuidodoɖedzi mie. 11  Ŋutasesẽ tsi zu vɔ̃ɖinyenye ƒe ameƒoti.+ Woawo ŋutɔwo, woƒe kesinɔnuwo alo woƒe amehawo loo alo woƒe ŋkɔxɔxɔ matsi anyi o. 12  Ɣeyiɣi la ava, ŋkeke la aɖo. Nuƒlela megatso aseye o, eye nudzrala megaxa nu o, elabena wodo dɔmedzoe ɖe eƒe ameha blibo la ŋu.*+ 13  Elabena nudzrala matrɔ ayi nu si wòdzra la gbɔ o, nenye be etsi agbe gɔ̃ hã, elabena eƒe ameha blibo la ŋue ŋutega la ku ɖo. Ame aɖeke matrɔ agbɔ o, eye le eƒe vodada* ta, ame aɖeke maɖe eƒe agbe o. 14  “‘Woku kpẽ,+ eye ame sia ame sɔ gbe, ke ame aɖeke maho ayi aʋa o, elabena medo dɔmedzoe ɖe ameha blibo la ŋu.+ 15  Yi le xexe,+ eye dɔvɔ̃ kple dɔwuame le xɔ me. Ame si le gbe me la atsi yi nu, eye ame si le du me la, dɔwuame kple dɔvɔ̃ atsrɔ̃e.+ 16  Woƒe agbetsila siwo te ŋu si la ayi towo dzi, eye wo dometɔ ɖe sia ɖe axlɔ̃ le eƒe vodada ta abe balimehɔnɛwo ene.+ 17  Woƒe alɔwo katã ado agblɔ, eye tsi atsyɔ le klowo katã nu.*+ 18  Woata akpanya,+ eye woaƒo kpakpakpa.* Ŋukpe alé ame sia ame, eye woƒe tawo katã abebe.*+ 19  “‘Woatsɔ woƒe klosalo aƒu gbe ɖe ablɔwo dzi, eye woƒe sika azu ŋunyɔnu na wo. Woƒe klosalo kple sika mate ŋu aɖe wo le Yehowa ƒe dzikudogbe la o.+ Womaɖi ƒo o,* eye woƒe ƒodo mayɔ o, elabena wozu* nukikli siwo kplɔ wo de vodada me. 20  Wodana ɖe woƒe atsyɔ̃ɖonuwo dzi, eye wotsɔ wo* wɔ ŋunyɔnu siwo nye woƒe legba nyɔŋuwo.+ Esia tae mana wòazu ŋunyɔnu na wo ɖo. 21  Matsɔe* ade asi na amedzrowo woaha, eye ame vɔ̃ɖi siwo le anyigba dzi la aɖe aboyoe, eye woagblẽ kɔ ɖo nɛ. 22  “‘Maɖe kɔ ɖa le wo ŋu,+ woagblẽ kɔ ɖo na nye teƒe ɣaɣla* la, eye adzodalawo age ɖe eme ahagblẽ kɔ ɖo nɛ.+ 23  “‘Wɔ kɔsɔkɔsɔ,*+ elabena kufiatsotso madzemadzee yɔ dua me taŋ,+ eye ŋutasesẽ yɔ dua me fũu.+ 24  Makplɔ dukɔ vɔ̃ɖitɔ kekeake avɛ,+ eye woaxɔ woƒe aƒewo,+ matsi ŋusẽtɔwo ƒe dada nu, eye woagblẽ kɔ ɖo na woƒe kɔkɔeƒewo.+ 25  Ne woƒe vevesegbe ɖo la, woadi ŋutifafa, gake manɔ anyi o.+ 26  Vɔ̃ akplɔ vɔ̃ ɖo, eye gbedeasi ava ɖe gbedeasi yome, woadi ŋutega tso nyagblɔɖila gbɔ,+ ke se* la abu ɖe nunɔla, eye aɖaŋuɖoɖo* abu ɖe ametsitsiwo.+ 27  Fia la axa nu,+ dzi aɖe le amegã la ƒo,* eye anyigba la dzi tɔwo ƒe asiwo aƒo tititi le vɔvɔ̃ ta. Mawɔ na wo ɖe woƒe zɔzɔme nu, eye madrɔ̃ ʋɔnu wo ɖe woƒe ʋɔnudɔdrɔ̃ nu. Ne woadze sii be, nyee nye Yehowa.’”+

Etenuŋɔŋlɔ

Egɔmeɖeɖe tẽe, “afɔ.”
Agate ŋu afia, “Seƒoƒotsihe la va ɖo na wò.”
Agate ŋu afia, “Seƒoƒotsihe la va ɖo na wò.”
Efia be anyigbaƒlelawo loo alo anyigbadzralawo makpɔ viɖe aɖeke o, elabena tsɔtsrɔ̃ la aƒo ɖe wo katã dzi.
Agate ŋu afia, “eƒe vodada.”
Efia, aɖuɖɔ agbɔ le ame ŋu le vɔvɔ̃ ta.
Egɔmeɖeɖe tẽe, “ŋɔdzi atsyɔ wo.”
Efia, woalũ ta le konyifafa ta.
Alo, “Woƒe luʋɔwo maɖi ƒo o.”
Efia, woƒe klosalo kple sika.
Efia, woƒe sikanuwo kple klosalonuwo.
Efia, woƒe klosalo kple sika siwo wotsɔ wɔa legbawo.
Edze ƒãa be Yehowa ƒe gbedoxɔa ƒe kɔkɔeƒewo ƒe kɔkɔeƒe ye wowɔnɛ.
Efia, kɔsɔkɔsɔ na aboyomeyiyi.
Alo, “nufiame.”
Alo, “adaŋudede.”
Alo, “gbegblẽ ado ŋɔdzi na amegã la.”