Ezekiel 29:1-21

  • Nya ɖe Farao ŋu (1-16)

  • Woatsɔ Egipte ana Babilon abe fetu ene (17-21)

29  Le ƒe ewolia me, le ɣleti ewolia ƒe ŋkeke wuievelia dzi la, Yehowa ƒe gbe va nam be:  “Amegbetɔvi, trɔ nàdze ŋgɔ Egipte-fia Farao nàgblɔ nya ɖi ɖe eya kple Egipte blibo la ŋu.+  Gblɔ be, ‘Ale Aƒetɔ Dziɖulagã Yehowa gblɔe nye esi: “Egipte-fia Farao, kpɔ ɖa, metso ɖe ŋuwò,+Wò, ƒumelã klitsu si dra ɖe wò Nil-tɔsisi* me+ Hele gbɔgblɔm be, ‘Tɔnyee Nil-tɔsisi la nye,Nye ŋutɔe wɔe na ɖokuinye.’+   Matsɔ ƒu* aƒo ɖe alɔgo me na wò, eye mana Nil-tɔsisia me lãwo nalé ɖe wò tsrokpa ŋu. Mahe wò ado goe tso wò Nil-tɔsisi me hekpe ɖe wò Nil-tɔsisi me lã siwo katã lé ɖe wò tsrokpa ŋu la ŋuti.   Matsɔ wò aƒu gbe ɖe gbegbe, wò ŋutɔ kple wò Nil-tɔsisi me lãwo katã.+ Àva dze gbe me akaka, eye womafɔ wò aƒo ƒu o. Matsɔ wò ana gbemelãwo kple dziƒoxewo woaɖu.+   Ekema Egiptetɔwo katã adze sii be nyee nye Yehowa,Elabena menye ziɔɖeŋu gbagbe aɖekee wonye na Israel ƒe aƒe la o, aƒla dzro ko wonye.   Esi woku ɖe wò alɔ ŋu la, èŋe,Eye nèna woƒe abɔta gli. Esi woziɔ ɖe ŋuwò la, èŋe,Eye nèna woƒe afɔwo* le ʋuʋum.”+  “‘Eya ta ale Aƒetɔ Dziɖulagã Yehowa gblɔe nye esi: “Kpɔ ɖa, mehe yi ɖe ŋuwò,+ eye matsrɔ̃ amegbetɔwo kple lãwo siaa ɖa le mewò.  Egipte-nyigba azu aƒedo kple gbegbe;+ ne woadze sii be, nyee nye Yehowa, elabena ègblɔ be, ‘Tɔnyee Nil-tɔsisi la nye, eye nye ŋutɔe wɔe.’+ 10  Eya ta kpɔ ɖa, metso ɖe wò kple wò Nil-tɔsisi la ŋu, eye mana Egipte-nyigba nazu gbegbe, aƒu kplakplakpla, azu aƒedo+ tso Migdol+ va ke ɖe Siene+ yi ɖase ɖe Etiopia ƒe liƒo dzi. 11  Amegbetɔ alo aƒemelã aɖeke ƒe afɔ mato edzi o,+ eye ame manɔ edzi o ƒe blaene. 12  Mana Egipte-nyigba nazu gbegbewo ƒe gbegbe, eye eƒe duwo azu aƒedowo ƒe aƒedo ƒe blaene;+ makaka Egiptetɔwo ɖe dukɔwo dome, eye maka wo ahlẽ ɖe anyigbawo dzi.”+ 13  “‘Elabena ale Aƒetɔ Dziɖulagã Yehowa gblɔe nye esi: “Le ƒe blaene megbe la, maƒo Egiptetɔwo nu ƒu tso dukɔ siwo dome woka wo hlẽ ɖo la,+ 14  eye makplɔ Egiptetɔwo ƒe aboyomewo agbɔe ava Patros-nyigba,+ si nye wo denyigba la dzi, eye woazu fiaɖuƒe gblɔe aɖe le afi ma. 15  Egipte abɔbɔ ɖe anyi wu fiaɖuƒe bubuwo, eye magaɖu aƒetɔ ɖe dukɔ bubuwo dzi azɔ o,+ mana woanɔ sue ale gbegbe be womagate ŋu aɖu dukɔ bubuwo dzi azɔ o.+ 16  Israel ƒe aƒe la magaɖo ŋu ɖe wo ŋu azɔ o,+ ke boŋ woaɖo ŋku edzi be, vodadae yewowɔ be yewotrɔ ɖe Egipte ŋu hedi eƒe kpekpeɖeŋu. Eye woadze sii be, nyee nye Aƒetɔ Dziɖulagã Yehowa.”’” 17  Le ƒe blaeve vɔ adrelia ƒe ɣleti gbãtɔ ƒe ŋkeke gbãtɔ dzi la, Yehowa ƒe gbe va nam be: 18  “Amegbetɔvi, Babilon-fia Nebukadnezar*+ na eƒe aʋakɔ wɔ dɔ sesẽ aɖe ɖe Tiro ŋu.+ Woƒe tawo katã bebe, eye abɔtawo katã tre. Ke eya kple eƒe aʋakɔ la mekpɔ fetu aɖeke tso Tiro gbɔ ɖe dɔ si wòwɔ ɖe eŋu la ta o. 19  “Eya ta ale Aƒetɔ Dziɖulagã Yehowa gblɔe nye esi: ‘Kpɔ ɖa, metsɔ Egipte-nyigba le asi dem na Babilon-fia Nebukadnezar;*+ alɔ eƒe kesinɔnuwo adzoe, akpɔ aboyonu geɖe, eye wòahae keŋkeŋ; esia azu fetu na eƒe aʋakɔ la.’ 20  “‘Matsɔ Egipte-nyigba la anɛ wòanye dɔ si wòwɔ ɖe eŋu* la ŋuti fetu, elabena nyee wowɔ dɔa na,’ Aƒetɔ Dziɖulagã Yehowa ye gblɔe. 21  “Gbe ma gbe la, mana dzo aɖe nato na Israel ƒe aƒe la,*+ eye mana mɔnukpɔkpɔ wò nàƒo nu le wo dome; ne woadze sii be, nyee nye Yehowa.”

Etenuŋɔŋlɔ

Le afi sia kple kpukpui bubu siwo gbɔna me la, Nil-tɔsisia kple eƒe tɔʋu siwo woɖe tsɔ dea tsi agblewo ye wowɔnɛ.
Alo, “akpoŋ.”
Egɔmeɖeɖe tẽe, “aliwo.”
Egɔmeɖeɖe tẽe, “Nebukadrezar,” esia nye ŋkɔ Nebukadnezar ŋɔŋlɔ bubui.
Egɔmeɖeɖe tẽe, “Nebukadrezar,” esia nye ŋkɔ Nebukadnezar ŋɔŋlɔ bubui.
Efia, ɖe Tiro ŋu.
Alo, “mana ŋusẽ naɖo Israel ƒe aƒe la ŋu.”