Nyaɖeɖefia 14:1-20

  • Alẽvi la kple ame 144,000 (1-5)

  • Gbedeasi tso mawudɔla etɔ̃awo gbɔ (6-12)

    • Mawudɔla si le yame eye nya nyui le esi (6, 7)

  • Dzidzɔtɔwoe nye ame siwo ku le Kristo me (13)

  • Anyigba dzi nuŋeŋe eveawo (14-20)

14  Mekpɔ Alẽvi+ la le tsitre ɖe Zion+ To la dzi, eye ame akpe alafa ɖeka blaene vɔ ene,+ siwo ƒe ŋgonu woŋlɔ eƒe ŋkɔ kple Fofoa+ ƒe ŋkɔ ɖo la, le eŋu.  Eye mese gbe aɖe tso dziƒo abe tsi geɖewo ƒe gbeɖiɖi ene, abe dziɖegbe sesẽ ƒe ɖiɖi ene; eye gbe si mese la le abe hadzilawoe le saŋku ƒom ɖe ha dzi ene.  Eye wole ha aɖe si ɖi ha yeye+ dzim le fiazikpui la ŋgɔ kple nu gbagbe+ eneawo kpakple ametsitsiawo+ ŋkume, eye ame aɖeke mete ŋu srɔ̃ ha la o, negbe ame akpe alafa ɖeka blaene vɔ ene,+ siwo woƒle tso anyigba dzi la ko.  Ame siawo meƒo ɖi wo ɖokuiwo kple nyɔnuwo o; le nyateƒe me la, wole abe ɖetugbui leaƒewo ene.+ Ame siawoe dzea Alẽvi la yome yia afi sia afi si wòyina.+ Woƒle ame siawo+ tso amegbetɔwo dome be woanye kutsetse gbãtɔ+ na Mawu kple Alẽvi la,  eye womekpɔ aʋatsokaka aɖeke le woƒe nu me o; mokaka mele wo ŋu o.+  Eye mekpɔ mawudɔla bubu aɖe wòle dzodzom le yame, eye nya nyui mavɔ aɖe le esi wòagblɔ na ame siwo le anyigba dzi, kple dukɔ sia dukɔ kple to sia to kple gbegbɔgblɔ sia gbegbɔgblɔ kpakple ame ɖe sia ɖe ƒomevi.+  Eye wòle gbɔgblɔm kple gbe gã aɖe be: “Mivɔ̃ Mawu, eye mitsɔ ŋutikɔkɔe nɛ, elabena eƒe ʋɔnudrɔ̃gaƒoƒo la ɖo,+ eye mide ta agu na Ame si wɔ dziƒo kple anyigba kple atsiaƒu+ kple tsidzɔƒewo.”  Mawudɔla bubu aɖe, si nye evelia, dze eyome le gbɔgblɔm be: “Emu loo! Babilon Gã+ la mu,+ eya si na dukɔwo katã no eƒe ahasiwɔwɔ* ƒe dzodzro sesẽ* ƒe wain la!”+  Mawudɔla bubu aɖe, si nye etɔ̃lia, dze wo yome hele gbɔgblɔm kple gbe gã aɖe be: “Ne ame aɖe de ta agu na lã wɔadã+ la kple eƒe legba la, eye wòxɔ dzesi ɖe eƒe ŋgonu alo ɖe eƒe asi ŋu la,+ 10  ano Mawu ƒe dziku ƒe wain si wometɔ tsii o, si wokɔ ɖe Eƒe dɔmedzoekplu me la hã ƒe ɖe,+ eye woatsɔ dzo kple dzokpe+ awɔ fui vevie le mawudɔla kɔkɔewo ŋkume kple Alẽvi la ŋkume. 11  Eye woƒe fuwɔame ƒe dzudzɔ la anɔ tutum yi dzi tegbetegbe.+ Ame siwo dea ta agu na lã wɔadã la kple eƒe legba la kpakple ame sia ame si xɔa eƒe ŋkɔ ƒe dzesi la, makpɔ gbɔɖeme o zã kple keli.+ 12  Afi siae ame kɔkɔewo+ ƒe dzidodo hiã le, ame siwo léa Mawu ƒe sewo kple Yesu dzi xɔse+ me ɖe asi.” 13  Eye mese gbe aɖe tso dziƒo wògblɔ be, “Ŋlɔ bena: Dzidzɔtɔwoe nye ame siwo ku le Aƒetɔ+ la me tso fifia dzi. Ɛ̃, gbɔgbɔ la gblɔ be, mina woagbɔ ɖe eme tso woƒe agbagbadzedzewo me, elabena woƒe dɔwɔwɔwo dze wo yome enumake.” 14  Eye mekpɔ alilikpo ɣi aɖe, eye ame si le abe amegbetɔvi+ ene la bɔbɔ nɔ alilikpo la dzi, sikafiakuku le ta nɛ, eye hɛ gobɛ ɖaɖɛ aɖe le esi. 15  Mawudɔla bubu aɖe do tso gbedoxɔ la ƒe kɔkɔeƒe la, eye wòdo ɣli kple gbe gã aɖe ɖo ɖe ame si bɔbɔ nɔ alilikpo la dzi be: “Do wò hɛ gobɛ la ɖa nàŋe nu, elabena gaƒoƒo la de be woaŋe nu, elabena anyigbadzinukuwo ɖi keŋkeŋ.”+ 16  Eye ame si bɔbɔ nɔ alilikpo la dzi la do eƒe hɛ gobɛ la ɖe anyigba dzi, eye wòŋe anyigbadzinukuwo. 17  Mawudɔla bubu aɖe gado tso gbedoxɔ la ƒe kɔkɔeƒe si le dziƒo, eye hɛ gobɛ ɖaɖɛ le eya hã si. 18  Mawudɔla bubu aɖe, si kpɔ ŋusẽ ɖe dzo dzi la, do tso vɔsamlekpui la me. Edo ɣli kple gbe gã aɖe ɖo ɖe ame si si hɛ gobɛ ɖaɖɛa le la be: “Do wò hɛ gobɛ ɖaɖɛ la ɖa nàtso anyigbadziwainka la ƒe kpowo, elabena eƒe tsetseawo ɖi.”+ 19  Eye mawudɔla la do eƒe hɛ gobɛ la ɖe anyigba dzi, eye wòtso anyigbadziwainka la tsɔ ƒu gbe ɖe Mawu ƒe dziku ƒe wainfiãnu gã la me.+ 20  Eye wofanya waintsetse si le wainfiãnu la me le dua godo, ʋu do le wainfiãnu la me eye wòɖɔ va ɖo keke sɔwo ƒe numegawo ŋuti ke, eye wòde stadio akpe ɖeka alafa ade.*

Etenuŋɔŋlɔ

Helagbe, pornia. Kpɔ Nya Tɔxɛwo Gɔmeɖeƒea.
Alo, “ƒe dziku.”
Anɔ kilometa 296. Stadio ɖeka anɔ meta 185. Kpɔ Megbenyawo B14.