4 Mose 28:1-31

  • Vɔsa vovovowo ŋuti mɔfiamewo (1-31)

    • Gbe sia gbe vɔsawo (1-8)

    • Le Sabat ŋkeke dzi (9, 10)

    • Ɣleti sia ɣleti ƒe vɔsawo (11-15)

    • Le Ŋutitotoŋkekenyui la dzi (16-25)

    • Kwasiɖawo ƒe azãɖuɣi (26-31)

28  Yehowa gagblɔ na Mose be:  “De se na Israel-viwo be, ‘Mikpɔ egbɔ be yewotsɔ nye vɔsa, si nye nye nuɖuvɔ vɛ nam. Mitsɔ nye dzovɔsawo vɛ nam le woƒe ɣeyiɣi ɖoɖiwo dzi, be wòanye ʋeʋẽ lilili nam.’+  “Eye nàgblɔ na wo be, ‘Nu si woatsɔ asa dzovɔ na Yehowa ye nye esi: miatsɔ alẽtsui eve siwo sɔ blibo, siwo xɔ ƒe ɖekaɖeka asa numevɔ gbe sia gbe.+  Miatsɔ alẽtsui ɖeka asa vɔ le ŋdi me, eye miatsɔ alẽtsui evelia asa vɔ le anyinutsyɔɣi,*+  eye miatsɔ wɔ memee efa me mama ɖe ewo ƒe akpa ɖeka* si wotsɔ amiti ƒe ami nyuitɔ hin* me mama ɖe ene ƒe akpa ɖeka dzabae la akpe ɖe eŋu asa nuɖuvɔe.+  Esiae nye gbe sia gbe numevɔ,+ abe ale si woɖoe na mi le Sinai To la gbɔ ene, be wòanye dzovɔsa si aʋẽ lilili* na Yehowa,  eye miatsɔ nunovɔ hin me mama ɖe ene ƒe akpa ɖeka akpe ɖe alẽtsui+ ɖe sia ɖe ŋu. Kɔ nunovɔsa si nye aha muame la ɖe kɔkɔeƒe la na Yehowa.  Eye miatsɔ alẽtsui kemɛa asa vɔ le anyinutsyɔɣi.* Miatsɔ nuɖuvɔ si le abe ŋdi me tɔa ene kple eŋuti nunovɔ akpe ɖe eŋu wòanye dzovɔsa si aʋẽ lilili* na Yehowa.+  “‘Ke le Sabat ŋkeke+ dzi la, miatsɔ alẽtsui eve siwo sɔ blibo, siwo xɔ ƒe ɖekaɖeka kple wɔ memee efa me mama ɖe ewo ƒe akpa eve si wotsɔ ami dzabae la asa nuɖuvɔe, hekpe ɖe eŋuti nunovɔ la ŋu. 10  Esia nanye numevɔ si woasa le Sabat ŋkeke dzi hekpe ɖe numevɔ kple nunovɔ+ si wosana ɖaa la ŋu. 11  “‘Le ɣleti ɖe sia ɖe ƒe gɔmedzedze la, miatsɔ nyitsui eve kple agbo ɖeka kpakple alẽtsui adre siwo sɔ blibo, siwo dometɔ ɖe sia ɖe xɔ ƒe ɖekaɖeka la, avɛ be woatsɔ asa numevɔ na Yehowa,+ 12  eye miatsɔ wɔ memee efa me mama ɖe ewo ƒe akpa etɔ̃ si wotsɔ ami dzabae la asa nuɖuvɔ+ akpe ɖe nyitsui ɖe sia ɖe ŋu. Mitsɔ wɔ memee efa me mama ɖe ewo ƒe akpa eve si wotsɔ ami dzabae la sa nuɖuvɔ kpe ɖe agbo ɖeka+ la ŋu. 13  Eye miatsɔ wɔ memee efa me mama ɖe ewo ƒe akpa ɖeka si wotsɔ ami dzabae la asa nuɖuvɔ akpe ɖe alẽtsui ɖe sia ɖe ŋu. Numevɔsa si aʋẽ lilili*+ kple dzovɔsa wònye na Yehowa. 14  Mitsɔ wain hin afã sa nunovɔ kpe ɖe nyitsui+ ɖe sia ɖe ŋu, eye miatsɔ hin me mama ɖe etɔ̃ ƒe akpa ɖeka akpe ɖe agbo+ la ŋu, kple hin me mama ɖe ene ƒe akpa ɖeka akpe ɖe alẽtsui+ ɖe sia ɖe ŋu. Esiae nye ɣleti sia ɣleti ƒe numevɔsa le ƒe bliboa me. 15  Azɔ hã, miatsɔ gbɔ̃tsui ɖeka asa nuvɔ̃vɔ na Yehowa hekpe ɖe numevɔ kple eŋuti nunovɔ si miesana ɖaa la ŋuti. 16  “‘Le ɣleti gbãtɔ ƒe ŋkeke wuienelia dzi la, miaɖu Yehowa ƒe Ŋutitotozã+ la. 17  Eye ɣleti sia ƒe ŋkeke wuiatɔ̃lia anye ŋkekenyui. Miaɖu abolo si wotsɔ amɔwɔ maʋamaʋã mè la ŋkeke adre sɔŋ.+ 18  Ŋkeke gbãtɔ anye takpegbe kɔkɔe. Migawɔ dɔ sesẽ aɖeke o. 19  Miatsɔ nyitsui eve kple agbo ɖeka kpakple alẽtsui adre, siwo dometɔ ɖe sia ɖe xɔ ƒe ɖeka la, asa dzovɔ, si nye numevɔsa na Yehowa. Lã siwo miatsɔ avɛ la nasɔ blibo.+ 20  Mitsɔ wɔ memee efa me mama ɖe ewo ƒe akpa etɔ̃ si wotsɔ ami+ dzabae la kpe ɖe nyitsu ɖe sia ɖe ŋu, eye miatsɔ wɔ memee efa me mama ɖe ewo ƒe akpa eve akpe ɖe agbo la ŋu. 21  Miatsɔ efa me mama ɖe ewo ƒe akpa ɖeka akpe ɖe alẽtsui adreawo dometɔ ɖe sia ɖe ŋu, 22  eye miatsɔ gbɔ̃ ɖeka asa nuvɔ̃vɔ atsɔ alé avu ɖe mia ta. 23  Miasa vɔ siawo akpe ɖe ŋdi me numevɔ si wosana ɖaa la ŋu. 24  Miasa vɔ sia ke gbe sia gbe hena ŋkeke adre be wòanye nuɖuɖu,* si nye dzovɔ si aʋẽ lilili* na Yehowa. Miatsɔe akpe ɖe numevɔ kple nunovɔ si miesana ɖaa la ŋu. 25  Ŋkeke adrea gbe nanye takpegbe kɔkɔe+ na mi. Migawɔ dɔ sesẽ aɖeke o.+ 26  “‘Gbe si gbe mieŋe agblemenuku gbãtɔwo+ hetsɔ nuku yeye vɛ be woatsɔ asa nuɖuvɔ na Yehowa+ le miaƒe kwasiɖawo ƒe azãɖuɣi+ la, miawɔ takpekpe kɔkɔe. Migawɔ dɔ sesẽ aɖeke o.+ 27  Mitsɔ nyitsui eve, agbo ɖeka kple alẽtsui adre, siwo dometɔ ɖe sia ɖe xɔ ƒe ɖeka+ la sa numevɔ, ne wòanye ʋeʋẽ lilili* na Yehowa, 28  eye miatsɔ wɔ memee efa me mama ɖe ewo ƒe akpa etɔ̃ si wotsɔ ami dzabae asa nuɖuvɔ akpe ɖe nyitsu ɖe sia ɖe ŋu, eye miatsɔ efa me mama ɖe ewo ƒe akpa eve akpe ɖe agbo ɖeka la ŋu, 29  eye miatsɔ efa me mama ɖe ewo ƒe akpa ɖeka akpe ɖe alẽtsui adreawo dometɔ ɖe sia ɖe ŋu, 30  eye woatsɔ gbɔ̃tsui ɖeka alé avu ɖe mia ta.+ 31  Miasa vɔ siawo akpe ɖe numevɔ kple nuɖuvɔ kpakple wo ŋuti nunovɔ siwo miesana ɖaa la ŋu. Lã siwo miatsɔ vɛ la nasɔ blibo.+

Etenuŋɔŋlɔ

Egɔmeɖeɖe tẽe, “le fiẽ eveawo dome.”
Efa me mama ɖe ewo ƒe akpa ɖeka le lita 2.2. Kpɔ Megbenyawo B14.
Hin ɖeka le lita 3.67. Kpɔ Megbenyawo B14.
Alo, “faa dzi; naa dzidzeme.”
Egɔmeɖeɖe tẽe, “le fiẽ eveawo dome.”
Alo, “faa dzi; naa dzidzeme.”
Alo, “faa dzi; naa dzidzeme.”
Egɔmeɖeɖe tẽe, “abolo.”
Alo, “faa dzi; naa dzidzeme.”
Alo, “faa dzi; naa dzidzeme.”