4 Mose 18:1-32

  • Nunɔlawo kple Lewi viwo ƒe dɔwo (1-7)

  • Nunɔla ƒe gome (8-19)

    • Dzenubabla la (19)

  • Nu si Lewi viwo axɔ kple woƒe nu ewolia dzɔdzɔ (20-32)

18  Emegbe Yehowa gblɔ na Aron be: “Ne wò kple viwòŋutsuwo kpakple fofowò ƒe aƒekɔ la mieda se siwo ku ɖe kɔkɔeƒea+ ŋu dometɔ aɖe dzi la, fɔɖiɖi anɔ mia dzi, eye ne wò kple viwòŋutsuwo mieda se siwo ku ɖe miaƒe nunɔlanyenyea ŋu dometɔ aɖe dzi la, fɔɖiɖi anɔ mia dzi.+  Kplɔ nɔviwò siwo tso mia tɔgbuiwo ƒe to, si nye Lewi-to, la me hã va kpe ɖe ɖokuiwò ŋu, ne woakpe ɖe wò kple viwòŋutsuwo ŋu+ miawɔ subɔsubɔdɔ le agbadɔ si me Ðaseɖiɖiɖakaa+ le la ŋgɔ.  Eye woawɔ dɔ si nède wo si kple dɔ si le wo dzi le agbadɔa+ ŋu la katã. Negbe kɔkɔeƒe la me nuwo kple vɔsamlekpui la ŋu koe womate ɖo o, ne woagaku loo alo wò nàku o.+  Woanɔ ŋuwò awɔ takpegbadɔa me dɔ siwo le wo dzi la katã, eye ame si womeɖe mɔ na o* dometɔ aɖeke nagate ɖe mia ŋu o.+  Miwɔ kɔkɔeƒe+ la me dɔ kple vɔsamlekpui+ la ŋuti dɔ siwo le mia dzi, ne woagado dɔmedzoe+ ɖe Israel-viwo ŋu ake o.  Nye ŋutɔe ɖe mia nɔvi Lewi viwo tso Israel-viwo dome ɖe vovo tsɔ na mi.+ Ame siawoe Yehowa xɔ be woawɔ takpegbadɔa me dɔwo.+  Wò ŋutɔ kple viwòŋutsuwo miawɔ miaƒe nunɔladɔ kple vɔsamlekpui la kpakple nu si le xɔmetsovɔa+ godo la ŋuti dɔwo pɛpɛpɛ, eye miasubɔ le afi ma.+ Ðe metsɔ nunɔlanyenye la ke mi be wòanye miaƒe dɔ, eye ame si womeɖe mɔ na o* si ate va la, woawui.”+  Yehowa gagblɔ na Aron be: “Metsɔ nu siwo wodzɔna nam la dzi kpɔkpɔ de asi na wò.+ Metsɔ nu kɔkɔe siwo katã Israel-viwo dzɔna la ƒe ɖe na wò kple viwòŋutsuwo be wòanye miaƒe gome ɖaa.+  Nu siwo anye tɔwò le nu kɔkɔewo ƒe nu kɔkɔe siwo katã wotsɔ sa dzovɔ la domee nye esi: Vɔsanu ɖe sia ɖe si wotsɔ vɛ nam hekpe ɖe woƒe nuɖuvɔsawo,+ nuvɔ̃vɔsawo,+ kple woƒe fɔɖivɔsawo+ ŋu la, nu kɔkɔewo ƒe nu kɔkɔe wònye na wò kple viwòŋutsuwo. 10  Teƒe si le kɔkɔe ŋutɔe nàɖui le.+ Ŋutsu sia ŋutsu kpɔ mɔ aɖui. Nu kɔkɔe wòanye na wò.+ 11  Nu siawo hã nye tɔwò: Israel-viwo ƒe nunana siwo wotsɔ vɛ+ hekpe ɖe woƒe vɔsa siwo katã wonyè+ la ŋu. Metsɔ wo na wò kple viwòŋutsuwo kple viwònyɔnuwo be wòanye miaƒe gome ɖaa.+ Ame sia ame si ŋu kɔ le aƒewò me la kpɔ mɔ aɖui.+ 12  “Metsɔ ami nyuitɔwo katã kple wain yeye nyuitɔwo katã kpakple woƒe agblemenuku gbãtɔ+ siwo wotsɔ vɛ na Yehowa la, na wò.+ 13  Woƒe anyigbadzikutsetse gbãtɔ siwo katã woatsɔ avɛ na Yehowa la azu tɔwò.+ Ame sia ame si ŋu kɔ le aƒewò me la kpɔ mɔ aɖui. 14  “Nu sia nu si wotsɔ ɖe adzɔgbe ɖikaa* le Israel la azu tɔwò.+ 15  “Nu gbagbe ɖe sia ɖe si ʋu dɔ nu,*+ eɖanye amegbetɔwo loo alo lã o, si woatsɔ avɛ na Yehowa la azu tɔwò. Gake woaxe fe ɖe amegbetɔwo ƒe ŋgɔgbeviwo ta,+ eye woaxe fe ɖe lã makɔmakɔwo ƒe ŋgɔgbeawo hã ta.+ 16  Ne wonya xɔ tso ɣleti ɖeka ko la, woaxe fe ɖe wo ta ɖe asi si wodo ɖe eŋu la nu, si nye klosalo sekel* atɔ̃,+ ne wobui ɖe teƒe kɔkɔe la ƒe sekel* nu. Ele gera* blaeve. 17  Gake womaxe fe ɖe nyi ƒe ŋgɔgbea alo alẽ ƒe ŋgɔgbea alo gbɔ̃ ƒe ŋgɔgbea ya ta o.+ Nu kɔkɔe wonye. Nàhlẽ woƒe ʋu ɖe vɔsamlekpui la ŋu,+ eye nàtsɔ woƒe ami ado dzudzɔ wòanye dzovɔsa si aʋẽ lilili* na Yehowa.+ 18  Woƒe lã nazu tɔwò, abe ale si ko akɔ kple ɖusita si wonyè la nyea tɔwòe ene.+ 19  Metsɔ nu kɔkɔe siwo katã Israel-viwo adzɔ na Yehowa+ la na wò kple viwòŋutsuwo kple viwònyɔnuwo be wòanye mia tɔ ɖaa.+ Dzenubabla* wònye le Yehowa ŋkume ɖaa na wò kple wò dzidzimeviwo.” 20  Yehowa gagblɔ na Aron be: “Màxɔ woƒe anyigba aɖeke wòanye wò domenyinu o, eye woƒe anyigba aɖeke manye wò gome o.+ Nyee nye wò gome kple wò domenyinu le Israel-viwo dome.+ 21  “Kpɔ ɖa, metsɔ nu siwo katã le Israel la ƒe ewolia+ na Lewi viwo be wòanye woƒe domenyinu ɖe subɔsubɔdɔ si wɔm wole, si nye takpegbadɔa ŋuti dɔ la ta. 22  Israel-viwo nagagogo takpegbadɔ la azɔ, ne woahe nu vɔ̃ ava wo ɖokuiwo dzi ahaku o. 23  Lewi viwo nasubɔ le takpegbadɔa me, eye ne woda vo la, woawo ŋutɔwo dzie woƒe vodada anɔ.+ Se wònye le miaƒe dzidzimewo katã me be womaxɔ domenyinu aɖeke le Israel-viwo dome o.+ 24  Elabena metsɔ Israel-viwo ƒe nuwo ƒe ewolia si woadzɔ na Yehowa la, na Lewi viwo be wòanye woƒe domenyinu. Esia tae megblɔ na wo be, ‘Womaxɔ domenyinu aɖeke le Israel-viwo dome o.’”+ 25  Yehowa gagblɔ na Mose be: 26  “Gblɔ na Lewi viwo be, ‘Ne miexɔ Israel-viwo ƒe nu ewolia si metsɔ na mi be wòanye miaƒe domenyinu+ le wo si la, ekema miawo hã miadzɔ nuwo ƒe ewolia si miexɔ la ƒe ewolia na Yehowa.+ 27  Woabui na mi abe miaƒe nudzɔdzɔ ene, abe nuku siwo tso nukuƒoƒe+ kple wain si tso wainfiãƒe alo ami si tso amiɖaƒe ene. 28  Ale miawo ŋutɔwo hã miadzɔ miaƒe nuwo ƒe ewolia siwo miaxɔ le Israel-viwo si la katã ƒe ɖe na Yehowa, eye miatsɔ nu si miedzɔ na Yehowa la ana nunɔla Aron. 29  Miadzɔ nu sia nu si woana mi la ƒe ɖe, miadzɔ eƒe nyuitɔ+ na Yehowa wòanye nunana kɔkɔe.’ 30  “Eye nàgblɔ na wo be, ‘Ne Lewi viwo dzɔ woƒe nu nyuitɔwo la, ekema woabui na wo abe nuku tso woƒe nukuƒoƒe ene, abe wain tso wainfiãƒe alo ami tso amiɖaƒe ene. 31  Mia kple miaƒe aƒemetɔwo miate ŋu aɖui le afi sia afi, elabena teƒeɖoɖo wònye na mi ɖe subɔsubɔdɔ si wɔm miele le takpegbadɔa me la ta.+ 32  Ne miedzɔ nuawo ƒe nyuitɔwo la, ekema miahe nu vɔ̃ ava mia ɖokuiwo dzi o, eye migagblẽ kɔ ɖo na Israel-viwo ƒe nu kɔkɔewo o, ne miagaku o.’”+

Etenuŋɔŋlɔ

Egɔmeɖeɖe tẽe, “Ame tutɔ,” efia, ame si menye Lewi vi o.
Egɔmeɖeɖe tẽe, “Ame tutɔ,” efia, ame si menye Lewi vi o.
Esia fia nu sia nu si woɖe adzɔgbe tsɔ na Mawu wòzu nu kɔkɔe, si ŋu womagate ŋu atrɔ susu le alo agbugbɔe axɔ o.
Egɔmeɖeɖe tẽe, “Ŋutilã siwo katã ʋu dɔ nu.”
Sekel ɖeka le gram 11.4. Kpɔ Megbenyawo B14.
Alo, “sekel kɔkɔe.”
Gera ɖeka le gram 0.57. Kpɔ Megbenyawo B14.
Alo, “faa dzi; naa dzidzeme.”
Efia, nubabla si li ɖaa kple nubabla si matrɔ o.