4 Mose 10:1-36
10 Yehowa gblɔ na Mose be:
2 “Tsɔ klosalo tu kpẽ+ eve na ɖokuiwò. Woawoe nàku atsɔ aƒo ha la nu ƒu, eye woawoe nàku atsɔ ana asaɖaawo naho.
3 Ne woku evea siaa la, ekema ha blibo la katã nava ƒo ƒu ɖe gbɔwò le takpegbadɔa nu.+
4 Ne ɖeka ko woku la, ekema Israel ƒe ame akpeawo ƒe tatɔwo nava ƒo ƒu ɖe gbɔwò.+
5 “Ne mieku kpẽa eƒe ɖiɖime le tatata la, ekema ame siwo ƒu asaɖa anyi ɖe ɣedzeƒe+ gome la naho.
6 Eye ne miegaku kpẽa eƒe ɖiɖime le tatata zi evelia la, ekema ame siwo ƒu asaɖa anyi ɖe anyiehe+ gome la naho. Ɣesiaɣi si wo dometɔ aɖe aho la, woaku kpẽa alea.
7 “Ke ne miele ha la yɔm be woava kpe ta la, miaku kpẽa,+ ke migana eƒe ɖiɖime nanɔ tatata o.
8 Aron viŋutsu siwo nye nunɔlawo naku kpẽawo,+ eye wo kuku alea nanye ɖoɖo na mi le miaƒe dzidzimewo katã me.
9 “Ne mieho aʋa le miaƒe anyigba dzi ɖe futɔ aɖe si le fu wɔm mi ŋu la, ekema miaku kpẽawo atsɔ ayɔ amewo na aʋa,+ eye Yehowa mia Mawu la atrɔ susu ɖe mia ŋu, eye wòaɖe mi tso miaƒe futɔwo si me.
10 “Miku kpẽawo le miaƒe aseyetsoɣiwo+—miaƒe azãɖuɣiwo+ le dzinu yeyewo dzi—ne miele miaƒe numevɔwo+ kple ŋutifafavɔwo+ sam; eye esia anye ŋkuɖodzi na mi le mia Mawu ŋkume. Nyee nye Yehowa mia Mawu.”+
11 Le ƒe evelia me, le ɣleti evelia ƒe ŋkeke blaevelia+ dzi la, alilikpo la ho le agbadɔ si me Ðaseɖiɖiɖakaa+ le la tame.
12 Eye Israel-viwo ho le Sinai gbedzi le ɖoɖo si wofia wo la nu,+ eye alilikpoa va tɔ ɖe Paran gbedzi.+
13 Esiae nye zi gbãtɔ si woho ɖe ɖoɖo si Yehowa fia wo to Mose dzi la nu.+
14 Ale Yuda ƒe asaɖa la ƒe to etɔ̃ ƒokpli la ƒe hatsotsowo* ho gbã, eye Nahason,+ Aminadab vi le ameha siawo nu.
15 Netanel,+ Zuar vi le Isakar-to la ƒe ameha la nu.
16 Eye Eliab,+ Helon vi le Zebulon-to la ƒe ameha la nu.
17 Esi wokaka avɔgbadɔa+ la, Gerson viwo+ kple Merari viwo,+ ame siwo nye avɔgbadɔa tsɔlawo la ho.
18 Eyome Ruben ƒe asaɖa la ƒe to etɔ̃ ƒokpli la ƒe hatsotsowo* ho, eye Elizur,+ Sedeur vi le ameha siawo nu.
19 Selumiel,+ Zurisadai vi le Simeon-to la ƒe ameha la nu.
20 Eye Eliyasaf,+ Deuel vi le Gad-to la ƒe ameha la nu.
21 Emegbe Kohat viwo, ame siwo nye nu kɔkɔeawo tsɔlawo la ho.+ Ele be woatu avɔgbadɔ la vɔ hafi woawo nava ɖo.
22 Eye Efrayim ƒe asaɖa la ƒe to etɔ̃ ƒokpli la ƒe hatsotsowo* ho, eye Elisama,+ Amihud vi le ameha siawo nu.
23 Gamaliel,+ Pedahzur vi le Manase-to la ƒe ameha la nu.
24 Eye Abidan,+ Gideoni vi le Benyamin-to la ƒe ameha la nu.
25 Eyome Dan ƒe asaɖa la ƒe to etɔ̃ ƒokpli la ƒe hatsotsowo* ho be woanye megbexeawo na asaɖawo katã, eye Ahiezer,+ Amisadai vi le Dan viwo ƒe ameha la nu.
26 Pagiel,+ Okran vi le Aser-to la ƒe ameha la nu.
27 Eye Ahira,+ Enan vi le Naftali-to la ƒe ameha la nu.
28 Ðoɖo sia nue Israel-viwo ƒe hatsotsowo* hona ɖo le woƒe mɔzɔzɔwo me.+
29 Azɔ Mose gblɔ na toa Midiantɔ Reuel*+ ƒe vi Hobab be: “Míeho yina teƒe si ŋu Yehowa gblɔ le be, ‘Matsɔe ana mi’+ la. Yi kpli mí,+ eye miawɔ nyui na wò, elabena Yehowa do ŋugbe be yeawɔ nyui na Israel.”+
30 Ke eɖo eŋu nɛ be: “Nyemayi kpli mi o, ke boŋ mayi nye dukɔ kple ƒonyemeawo gbɔ.”
31 Eye wògblɔ nɛ be: “Míeɖe kuku, mègagblẽ mí ɖi o, elabena ènya afi si míate ŋu aƒu asaɖa anyi ɖo le gbea dzi, eye àte ŋu afia mɔ mí.*
32 Ne èyi kpli mí la,+ ekema míawo hã míawɔ nyui na wò abe ale si Yehowa awɔ nyui na míi la ene.”
33 Ale woho tso Yehowa ƒe to+ la gbɔ hezɔ mɔ ŋkeke etɔ̃, eye wotsɔ Yehowa ƒe nubablaɖaka+ la dze wo ŋgɔ hezɔ ŋkeke etɔ̃ ƒe mɔ, be wòadi gbɔɖemeƒe na wo.+
34 Ne woho la, Yehowa ƒe alilikpo+ la nɔa wo tame le ŋkeke me.
35 Ne Aɖaka la ho la, Mose gblɔna be: “Oo Yehowa, tso,+ ne wò futɔwo naka hlẽ, eye ame siwo lé fu wò la nasi le ŋgɔwò.”
36 Eye ne wodroe ɖi la, egblɔna be: “Oo Yehowa, trɔ gbɔ va Israel ƒe ame akpeakpeawo dome.”+
Etenuŋɔŋlɔ
^ Egɔmeɖeɖe tẽe, “aʋakɔwo.”
^ Egɔmeɖeɖe tẽe, “aʋakɔwo.”
^ Egɔmeɖeɖe tẽe, “aʋakɔwo.”
^ Egɔmeɖeɖe tẽe, “aʋakɔwo.”
^ Egɔmeɖeɖe tẽe, “aʋakɔwo.”
^ Efia, Yetro.
^ Alo, “àte ŋu anye ŋku na mí.”
