3 Mose 10:1-20

  • Dzo tso Yehowa gbɔ va fiã Nadab kple Abihu (1-7)

  • Sedede na nunɔlawo le aha muame nono kple nuɖuɖu ŋu (8-20)

10  Emegbe Nadab kple Abihu,+ siwo nye Aron viŋutsuwo la, dometɔ ɖe sia ɖe tsɔ eƒe dzudzɔdosonuwo, eye woɖe dzo ɖe wo me, tsɔ dzudzɔdonu ʋeʋĩ+ da ɖe edzi. Eye wodo dzo si ŋu Yehowa meɖe mɔ ɖo o,+ si meɖo na wo o la, le eŋkume.  Ale dzo do tso Yehowa gbɔ va fiã wo,+ eye woku le Yehowa ŋkume.+  Eye Mose gblɔ na Aron be: “Nya si Yehowa gblɔe nye esi, ‘Woakɔ ŋunye le ame siwo te ɖe ŋunye la dome,+ eye woadom ɖe dzi le dukɔ blibo la katã ŋkume.’” Ke Aron meke nu o.  Eye Mose yɔ Misael kple Elizafan, Aron tɔɖia Uziel+ ƒe viŋutsuwo, gblɔ na wo be: “Miva kɔ mia nɔviawo dzoe le kɔkɔeƒea ŋgɔ yi asaɖa la godo.”  Ale wova kɔ Nadab kple Abihu, ame siwo ƒe awu ʋlayaawo gakpɔtɔ le wo ŋu la, yi asaɖa la godo, abe ale si Mose gblɔe ene.  Eye Mose gblɔ na Aron kple viaŋutsu bubu siwo nye Eleazar kple Itamar be: “Migagblẽ miaƒe ɖawo ɖi nyamaa alo adze miaƒe awuwo o,+ ne miagaku o, eye Mawu nagado dziku ɖe ha blibo la katã hã ŋu o. Mia nɔviwo, Israel ƒe aƒe blibo la, afa avi ɖe ame siwo Yehowa wu kple dzo la ta.  Migadzo le takpegbadɔa ƒe mɔnu o, be miagaku o, elabena Yehowa ƒe ami kɔkɔe* si wosi na mi la le mia ŋu.”+ Eye wowɔe abe ale si Mose gblɔe ene.  Eye Yehowa gblɔ na Aron be:  “Ne miegbɔna takpegbadɔa+ me la, wò ŋutɔ kple viwòŋutsu siwo kpe ɖe ŋuwò siaa migano wain alo aha muame bubu aɖeke o, ne miagaku o. Esia nanye ɖoɖo mavɔ na wò kple wò dzidzimeviwo. 10  Ne miade vovo nu kɔkɔe kple nu dzro dome, nu si medza o kple nu dzadzɛ dome,+ 11  eye miafia ɖoɖo siwo katã Yehowa gblɔ to Mose dzi la Israel-viwo.”+ 12  Eye Mose gblɔ na Aron kple viaŋutsu siwo susɔ, siwo nye Eleazar kple Itamar be: “Mitsɔ nuɖuvɔsa si susɔ tso Yehowa ƒe dzovɔsawo me, eye mitsɔe wɔ amɔwɔ maʋamaʋã boloe ne miaɖu le vɔsamlekpui la xa,+ elabena nu kɔkɔewo ƒe nu kɔkɔe wònye.+ 13  Miɖui le teƒe kɔkɔe,+ elabena wò gome kple viwòŋutsuwo ƒe gome wònye tso Yehowa ƒe dzovɔsawo me, eye se siae wode nam. 14  Ke wò ŋutɔ kple viwòŋutsuwo kpakple viwònyɔnuwo+ miaɖu lã la ƒe akɔ si nye vɔsa si wonyè kple ɖusita si nye gome kɔkɔe+ la le teƒe dzadzɛ, elabena wò kple viwòwo ƒe gome wònye tso Israel-viwo ƒe ŋutifafavɔsawo me. 15  Woatsɔ ɖusita si nye gome kɔkɔe la kple akɔ si nye vɔsa si woanyè la kpakple ami siwo wotsɔ sa dzovɔ vɛ ne woanye vɔsa si wonyè le Yehowa ŋkume; akɔ la kple ɖusita la nanye wò kple viwò siwo le ŋuwò la ƒe gome tegbee+ abe ale si Yehowa de se ene.” 16  Eye Mose di nuvɔ̃vɔsagbɔ̃+ la tsitotsito, eye wòkpɔe be wotɔ dzoe xoxo! Ale wòdo dziku ɖe Eleazar kple Itamar, siwo nye Aron viŋutsu mamlɛawo ŋu gblɔ be: 17  “Nu ka ŋuti mieɖu nuvɔ̃vɔsalã la le teƒe kɔkɔe o,+ evɔ nu kɔkɔewo ƒe nu kɔkɔe si wòtsɔ na mi be miaxɔ ha la ƒe vodada ɖe akɔ, ne mialé avu ɖe wo ta le Yehowa ŋkume lae wònye? 18  Kpɔ ɖa! Wometsɔ eƒe ʋu la va kɔkɔeƒe+ la o. Ðe wòle be miaɖui le teƒe kɔkɔe la abe ale si wode se nam ene.” 19  Eye Aron ɖo eŋu na Mose be: “Kpɔ ɖa! Egbee wosa woƒe nuvɔ̃vɔ kple woƒe numevɔ le Yehowa ŋkume,+ ke hã nu siawo dzɔ ɖe dzinye. Ne ɖe meɖu nuvɔ̃vɔsalã la egbea la, ɖe wòadze Yehowa ŋua?” 20  Esi Mose see la, edze eŋu.

Etenuŋɔŋlɔ

Efia, ami kɔkɔe si wotsɔ ɖoa ame ɖoƒe tɔxɛ.