2 Mose 4:1-31

  • Dzesi etɔ̃ siwo Mose awɔ (1-9)

  • Mose bu be yemedze o (10-17)

  • Mose trɔ yi Egipte (18-26)

  • Mose do go Aron (27-31)

4  Ke Mose ɖo eŋu be: “Ne womexɔ dzinye se o, eye womeɖo to nye gbe o,+ eye wogblɔ nam be: ‘Yehowa meɖe eɖokui fia wò o ɖe?’”  Eye Yehowa biae be: “Nu kae nye ema le asiwò?” Eɖo eŋu be: “Atikplɔ ye.”  Eye wògblɔ be: “Tsɔe ƒu gbe ɖe anyigba.” Ale wòtsɔe ƒu gbe ɖe anyigba, eye wòtrɔ zu da;+ eye Mose si le enu.  Azɔ Yehowa gblɔ na Mose be: “Do asi ɖa nàlé eƒe asike.” Ale wòdo asi ɖa lée, eye wògatrɔ zu atikplɔ ɖe esi.  Eye Mawu gblɔ nɛ be: “Esia ana woaxɔe ase be Yehowa, wo tɔgbuiwo ƒe Mawu, Abraham ƒe Mawu, Isak ƒe Mawu kple Yakob ƒe Mawu la,+ ɖe eɖokui fia wò.”+  Eye Yehowa gagblɔ nɛ be: “Meɖe kuku, ƒo asi ɖe wò awua ƒe akɔta.” Eye wòƒo asi ɖe eƒe awua ƒe akɔta. Esi wòɖee la, anyi ƒo ɖe asi ŋuti nɛ wòfu kpii abe sno ene!+  Emegbe egblɔ be: “Gbugbɔ wò asi la ƒo ɖe wò awua ƒe akɔta.” Eya ta egbugbɔ eƒe asi ƒo ɖe eƒe awua ƒe akɔta. Esi wòɖee le awua me la, eɖɔ ɖo abe eƒe ŋutilã susɔea ene!  Eye wògblɔ be: “Ne womexɔ dziwò se o alo xɔ dzesi gbãtɔa dzi se o la, ekema woaxɔ evelia ya dzi ase.+  Ke ne womexɔ dzesi eve siawo hã dzi se o, eye womese wò gbe o la, ekema nàku tsi le Nil-tɔsisi la me akɔ ɖe anyigba ƒuƒui dzi, eye tsi si nàku le Nil-tɔsisia me la atrɔ azu ʋu ɖe anyigba.”+ 10  Eye Mose gblɔ na Yehowa be: “Yehowa, meɖe kuku, nu menya ƒona nam o, eye aleae wòle tso gbe aɖe gbe ke va se ɖe fifi si nèle nu ƒom kple wò subɔla, elabena nye nu metsɔna o, eye nye aɖe hã metrɔna ɖe nya ŋu kabakaba o.”+ 11  Yehowa biae be: “Ame kae wɔ nu na ame, alo ame kae nana ame zua aɖetututɔ, tokunɔ, nukpɔla alo ŋkuagbãtɔ? Alo menye nye Yehowa ye oa? 12  Eya ta heyi, eye nye ŋutɔ manɔ kpli wò ne èle nu ƒom, eye mafia nya si nàgblɔ la wò.”+ 13  Ke egblɔ be: “Yehowa, meɖe kuku, dɔ ame bubu.” 14  Ale Yehowa do dɔmedzoe ɖe Mose ŋu gblɔ be: “Menye nɔviwòe nye Lewi vi Aron+ oa? Menya be ate ŋu aƒo nu nyuie. Eye ele mɔ dzi gbɔna go do ge wò. Ne ekpɔ wò la, eƒe dzi atso aseye.+ 15  Ekema nàƒo nu kplii, eye nàtsɔ nyaawo ade enu,+ eye manɔ kpli mi ne miele nu ƒom,+ eye mafia nu si miawɔ la mi. 16  Eya aƒo nu kple dukɔ la ɖe nuwò, eye wòanye wò nyanuɖela, ke wò la, ànɔ Mawu teƒe nɛ.+ 17  Tsɔ atikplɔ sia ɖe asi, eye nàtsɔe awɔ dzesiwoe.”+ 18  Eya ta Mose gbugbɔ yi toa Yetro+ gbɔ gblɔ nɛ be: “Meɖe kuku, medi be madzo, ne magbugbɔ ayi nɔvinye siwo le Egipte la gbɔ aɖakpɔ ɖa be wogale agbe hã.” Eye Yetro gblɔ na Mose be: “Heyi le ŋutifafa me.” 19  Emegbe Yehowa gblɔ na Mose le Midian be: “Heyi, gbugbɔ yi Egipte, elabena ame siwo katã le wò ku dim* la ku.”+ 20  Ale Mose kplɔ srɔ̃a kple viawo, eye wòtsɔ wo ɖo tedzi dzi, eye wòtrɔ ɖo ta Egipte-nyigba dzi. Mose tsɔ Mawu vavã la ƒe atikplɔ la hã ɖe asi. 21  Yehowa gblɔ na Mose be: “Ne ètrɔ yi Egipte la, kpɔ egbɔ be yewɔ nukunu siwo katã mena ŋusẽ wò be nàwɔ la le Farao ŋkume.+ Gake maɖe mɔ eƒe dzi me nasẽ,+ eye malɔ̃ be yeaɖe asi le dukɔ la ŋu woadzo o.+ 22  Gblɔ na Farao be: ‘Ale Yehowa gblɔe nye esi: “Israel la, vinyeŋutsue, nye ŋgɔgbevie.+ 23  Mebe, Ðe asi le vinye la ŋu wòayi aɖasubɔm. Ke ne ègbe be yemaɖe asi le eŋu o la, mawu viwòŋutsu si nye wò ŋgɔgbevi la.”’”+ 24  Ke esi wole mɔa dzi va ɖo dzeƒe la, Yehowa+ va do goe, eye wòdi be yeawui.+ 25  Mlɔeba Zipora+ tsɔ kpe ɖaɖɛ aɖe tso aʋa na via, eye wòtsɔ eƒe aʋanuyi la ka eƒe afɔwo ŋuti gblɔ be: “Esi nènye ʋuŋugbetɔsrɔ̃ nam ta.” 26  Ale wòɖe asi le eŋu. Ɣemaɣi Zipora gblɔ be, “ʋuŋugbetɔsrɔ̃ nènye,” le aʋatsotso la ta. 27  Eye Yehowa gblɔ na Aron be: “Yi ɖakpe Mose le gbea dzi.”+ Ale wòyi ɖakpee le Mawu vavã la ƒe to la gbɔ,+ eye wògbugbɔ nu nɛ. 28  Eye Mose gblɔ nya siwo katã Yehowa, ame si dɔe la,+ gblɔ kple dzesi siwo katã wògblɔ nɛ be wòawɔ la na Aron.+ 29  Emegbe Mose kple Aron yi ɖaƒo Israel-viwo ƒe ametsitsiwo katã nu ƒu.+ 30  Aron gblɔ nya siwo katã Yehowa gblɔ na Mose la na wo, eye wòwɔ dzesiawo+ le dukɔ la ŋkume. 31  Ale dukɔ la xɔe se.+ Esi wose be Yehowa trɔ susu ɖe Israel-viwo ŋu,+ eye wòkpɔ woƒe fukpekpea la,+ wobɔbɔ de ta agu.

Etenuŋɔŋlɔ

Egɔmeɖeɖe tẽe, “le didim be yewoaɖe wò luʋɔ ɖa.”