2 Mose 31:1-18

  • Aɖaŋudɔwɔla siwo Mawu ƒe gbɔgbɔ yɔ fũu (1-11)

  • Sabat la, dzesi wònye le Mawu kple Israel-viwo dome (12-17)

  • Kpe gbadzɛ eveawo (18)

31  Yehowa gagblɔ na Mose be:  Kpɔ ɖa, metia Bezalel,+ si nye Uri vi, Hur vi, si tso Yuda-to la me.+  Mana nye gbɔgbɔ* nayɔe fũu le nunya, gɔmesese, sidzedze kple aɖaŋudɔwo katã ƒomevi wɔwɔ me,  ne wòanya ale si wowɔa aɖaŋunu vovovowo, ale si wowɔa sika, klosalo kple akɔbli ŋu dɔe,  ale si woakpa kpe atsɔ ado atsyã na nuwo+ kple ale si woakpa atinu ɖe sia ɖe ƒomevi.+  Azɔ hã, metia Oholiab,+ si nye Ahisamak vi tso Dan-to la me, be wòakpe ɖe eŋu, eye mede nunya ame siwo katã aɖaŋu le tagbɔ na* la ƒe dzi me be woawɔ nu siwo katã meɖo na wò la:+  takpegbadɔ+ la, Ðaseɖiɖiɖaka+ la kple eƒe nutunu,+ agbadɔ la ŋu nuwo katã,  kplɔ̃+ la kple eŋu nuwo, sikakaɖiti la kple eŋu nuwo+ katã, dzudzɔdomlekpui+ la,  numevɔsamlekpui+ la kple eŋu nuwo katã, ze la kple eƒe zɔ,+ 10  awu siwo woalɔ̃ nyuie, nunɔla Aron ƒe awu kɔkɔeawo kple viaŋutsuwo ƒe awu siwo woado awɔ nunɔladɔwo,+ 11  ami kɔkɔe kple atike ʋeʋĩ hena kɔkɔeƒe la.+ Woawɔ nu siwo katã meɖo na wò la. 12  Yehowa gagblɔ na Mose be: 13  “Gblɔ na Israel-viwo be, ‘Ele vevie be mialé nye sabatwo+ me ɖe asi, elabena dzesi wònye le nye kpli mi dome le miaƒe dzidzimewo katã me, ne miadze sii be nye, Yehowa, ye kɔ mia ŋu. 14  Milé Sabat ƒe se la me ɖe asi, elabena nu kɔkɔe wònye na mi.+ Ame si made bubu eŋu o la, woawui. Ne edzɔ be ame aɖe wɔ dɔ le edzi la, woatsrɔ̃ ame ma ɖa le eƒe dukɔ la dome.+ 15  Ŋkeke ade miawɔ dɔ, ke ŋkeke adrelia anye dzudzɔ blibo ƒe sabat.+ Anɔ kɔkɔe na Yehowa. Ame sia ame si wɔ dɔ le Sabat ŋkeke dzi la, woawui. 16  Israel-viwo nalé Sabat ƒe se la me ɖe asi; woawɔ Sabat ƒe se la dzi le woƒe dzidzimewo katã me. Nubabla mavɔ wònye. 17  Dzesi wònye le nye kple Israel-viwo dome ɖaa,+ elabena ŋkeke ade Yehowa wɔ dziƒo kple anyigba, eye wòdzudzɔ le ŋkeke adrea gbe hele ɖiɖim ɖe eme.’”+ 18  Ke esi wòƒo nu kple Mose le Sinai To la dzi vɔ teti ko la, etsɔ Ðaseɖiɖikpe+ gbadzɛ eveawo nɛ; woawoe nye kpe gbadzɛ siwo dzi Mawu tsɔ eƒe asibidɛ ŋlɔ nu ɖo.+

Etenuŋɔŋlɔ

Alo, “Mawu ƒe gbɔgbɔ.”
Egɔmeɖeɖe tẽe, “ame siwo si dzi nyanu le.”