1 Samuel 26:1-25
26 Emegbe Zif+ ŋutsuwo va Saul gbɔ le Gibea+ gblɔ be: “David be ɖe Hakila togbɛ si dze ŋgɔ Yesimon*+ la dzi.”
2 Eye Saul tso hedze mɔ yi Zif gbedzi, eye Israel ŋutsu tiatia akpe etɔ̃ kpe ɖe eŋu, ne woadi David le Zif+ gbedzi.
3 Saul va ƒu asaɖa anyi ɖe Hakila togbɛ si dze ŋgɔ Yesimon la dzi, le mɔ to. Ɣemaɣi la, David le gbea dzi, eye wòse be Saul ti ye yome va gbea dzi.
4 Eya ta David dɔ ŋkutsalawo ɖa, ne woakpɔ ɖa be Saul va nyateƒe hã.
5 Emegbe David tso yi afi si Saul ƒu asaɖa anyi ɖo, eye David kpɔ afi si Saul mlɔ, kple afi si Abner,+ Ner vi si nye eƒe aʋafia la hã mlɔ; Saul mlɔ anyi ɖe asaɖa la me, eye ameawo ƒo xlãe godoo.
6 Eye David bia Ahimelek, Hititɔ+ kple Abisai,+ Zeruya vi+ Yoab nɔvi be: “Ame kae ayi Saul gbɔ le asaɖa la me kplim?” Abisai ɖo eŋu be: “Mayi kpli wò.”
7 Eye David yi ameawo gbɔ le zã me, eye Abisai kpe ɖe eŋu; eye kpɔ ɖa, Saul mlɔ anyi dɔ alɔ̃ le asaɖa la me hetsɔ eƒe akplɔ tu anyi le eƒe tade; Abner kple aʋawɔlaawo mlɔ anyi ƒo xlãe.
8 Eye Abisai gblɔ na David be: “Mawu tsɔ wò futɔ de asi na wò egbea.+ Eya ta meɖe kuku, na matsɔ akplɔ la amimii ɖe anyigba zi ɖeka pɛ ko, nyemadae zi eve o.”
9 Ke David gblɔ na Abisai be: “Mègawui o, elabena ame kae aka asi Yehowa ƒe amesiamina ŋu,+ eye maɖi fɔ o?”+
10 Eye David gagblɔ be: “Zi ale si Yehowa le agbe la, Yehowa ŋutɔ awui,+ alo eƒe ŋkeke ade+ wòaku loo alo ayi aʋa woawui.+
11 Nede megbe xaa tso gbɔnye le Yehowa ŋkume be mado nye asi ɖe Yehowa ƒe amesiamina la gbɔ!+ Eya ta meɖe kuku, tsɔ akplɔ si le eƒe tade kple tsizea, ne míadzo.”
12 Eya ta David tsɔ akplɔ kple tsize la le Saul ƒe tade, eye wodzo. Ame aɖeke mekpɔ+ wo alo nya, alo nyɔ hã o, elabena wo katã wodɔ alɔ̃ klenee, elabena Yehowa na wodɔ alɔ̃ yi eme ʋĩi.
13 Eye David yi go kemɛ dzi ɖatɔ ɖe to la tame le adzɔge, eye wo kpli wo dome didi.
14 Eyome David yɔ aʋawɔlaawo kple Abner,+ Ner vi gblɔ be: “Abner, màtɔ oa?” Eye Abner bia be: “Wò ame kae nye ema le ɣli dom ɖe to me na fia la?”
15 Eye David gagblɔ na Abner be: “Menye ŋutsue nènye oa? Ame kae de nuwò le Israel? Ekema nu ka tae mèdzɔ wò aƒetɔ fia la ŋu o? Elabena aʋawɔlawo dometɔ ɖeka va be, yeawu wò aƒetɔ fia la.+
16 Mèwɔe nyuie o. Zi ale si Yehowa le agbe la, miedze na ku, elabena miedzɔ miaƒe aƒetɔ, si nye Yehowa ƒe amesiamina la ŋu o.+ Azɔ kpɔe ɖa be, afi kae fia la ƒe akplɔ kple tsize+ si nɔ eƒe tade la le?”
17 Saul dze si David ƒe gbe, eye wòbia be: “Vinye David, wò gbee nye ema?”+ David ɖo eŋu be: “Nye aƒetɔ fia, nye gbee.”
18 Eye wògblɔ kpee be: “Nu ka tae nye aƒetɔ nya eƒe dɔla ɖe nu,+ nu kae mewɔ, eye nu vɔ̃ ka tututue mewɔ?+
19 Azɔ meɖe kuku, nye aƒetɔ nese eƒe dɔla ƒe nyawo: Ne Yehowae dɔ wò ɖe ŋunye la, ekema nexɔ nye nuɖuvɔsa, ke ne amegbetɔwoe la,+ ekema aɖi wo ŋu le Yehowa ŋkume, elabena wonyam ɖa egbea tso Yehowa ƒe domenyinu la gbɔ,+ le gbɔgblɔm be, ‘Yi ɖasubɔ mawu bubuwo.’
20 Eya ta mègana woakɔ nye ʋu ɖe anyigba si le adzɔge tso Yehowa ŋkume la dzi o, elabena Israel-fia do go yi axɔ̃ ɖeka pɛ di ge,+ abe ale si wotia tegli yome le towo dzi ene.”
21 Saul gblɔ nɛ be: “Mewɔ nu vɔ̃.+ Vinye David, trɔ va, elabena nyemagawɔ nu vevi wò azɔ o, le esi nye agbe* xɔ asi le ŋkuwòme+ egbe sia ta. Vavãe, mewɔ bometsinu, eye meda ƒu ŋutɔ.”
22 David gblɔ nɛ be: “Kpɔ ɖa, fia ƒe akplɔ lae nye esi. Na ɖekakpuiawo dometɔ ɖeka nava xɔe.
23 Yehowae aɖo eteƒe na ame sia ame ɖe amea ŋutɔ ƒe dzɔdzɔenyenye+ kple nuteƒewɔwɔ nu, elabena Yehowa tsɔ wò de asi nam egbe sia, gake nyemedi be mado asi ɖe Yehowa ƒe amesiamina la gbɔ o.+
24 Kpɔ ɖa, ale si ko wò agbe* xɔ asi le ŋkunyeme egbea la, nye hã nye agbe* axɔ asi le Yehowa ŋkume nenema ke eye wòaɖem tso nye xaxawo katã me.”+
25 Eye Saul gblɔ na David be: “Woayra wò, vinye David. Àwɔ nu gãwo, eye àkpɔ dzidzedze hã.”+ Ale David lé eƒe mɔ, eye Saul hã gbugbɔ yi enɔƒe.+
