Yohanes 16:1-33
16 “Megblɔ nya siawo na mi, bene naneke nagana miakli nu o.
2 Amewo anya mi ɖa le ƒuƒoƒe la me. Gaƒoƒo gbɔna kura gɔ̃ hã, esime ame sia ame si awu mi la asusu be yewɔ subɔsubɔdɔ kɔkɔe aɖe na Mawu.
3 Gake woawɔ nu siawo katã elabena womenya Fofo la o, eye womenya nye hã o.
4 Ke hã, megblɔ nya siawo na mi, be ne woƒe gaƒoƒo la ɖo la, miaɖo ŋkui be megblɔ wo na mi.
“Gake nyemegblɔ nya siawo na mi le gɔmedzedzea me o, elabena menɔ mia gbɔ.
5 Gake azɔ la, meyina ame si dɔm ɖa la gbɔ, evɔ mia dometɔ ɖeka pɛ hã mebiam be: ‘Afi ka yim nèle?’ hã o.
6 Gake esi megblɔ nya siawo na mi ta la, nuxaxa yɔ miaƒe dziwo me fũu.
7 Ke hã, nyateƒe tom mele na mi: Miaƒe nyonyo tae medzo yina ɖo. Elabena ne nyemedzo o la, kpeɖeŋutɔ la mava na mi gbeɖe o; gake ne medzo yi la, maɖoe ɖe mi.
8 Eye ne eva ɖo la, ana kpeɖodzi si ŋu kakaɖedzi le la xexea ku ɖe nu vɔ̃ ŋuti, ku ɖe dzɔdzɔenyenye ŋuti, ku ɖe ʋɔnudɔdrɔ̃ ŋuti:
9 gbã la, ku ɖe nu vɔ̃ ŋuti, elabena womele eɖem le fiafiam be yewoxɔ dzinye se o;
10 emegbe la, ku ɖe dzɔdzɔenyenye ŋuti, elabena meyina Fofo la gbɔ, eye miagakpɔm azɔ o;
11 eye mlɔeba la, ku ɖe ʋɔnudɔdrɔ̃ ŋuti, elabena wodrɔ̃ ʋɔnu xexe sia dzi ɖula la.
12 “Nya geɖewo gale asinye magblɔ na mi hafi, gake miate ŋu atsɔ wo fifia o.
13 Gake ne eya, si nye nyateƒegbɔgbɔ la va ɖo la, afia mɔ mi le nyateƒe blibo la katã me, elabena maƒo nu le eɖokui si o, ke boŋ nu siwo wòse lae wòagblɔ, eye agblɔ nu siwo gbɔna la na mi.
14 Eya adom ɖe dzi, elabena axɔ nu si nye tɔnye la ƒe ɖe, eye wòagblɔe afia mi.
15 Nu siwo katã le Fofo la si la, tɔnyee. Esia tae megblɔ be axɔ nu si nye tɔnye la ƒe ɖe, eye wòagblɔe afia mi ɖo.
16 Esusɔ vie ko miagakpɔm o, eye egasusɔ vie ko miagakpɔm ake.”
17 Eya ta eƒe nusrɔ̃lawo dometɔ aɖewo gblɔ na wo nɔewo be: “Nya sia si gblɔm wòle na mí be: ‘Esusɔ vie ko, miagakpɔm o, eye egasusɔ vie ko miagakpɔm ake’ kple ‘elabena meyina Fofo la gbɔ’ la gɔme ɖe?”
18 Eya ta wonɔ gbɔgblɔm be: “Nya sia si gblɔm wòle be, ‘esusɔ vie ko’ la gɔme ɖe? Míenya nu si ŋu wòle nu ƒom le o.”
19 Yesu nya be wonɔ didim be yewoabia nya ye, eya ta egblɔ na wo be: “Ðe miele nya sia lém kpɔ le mia nɔewo dome, elabena megblɔ be: Esusɔ vie ko, miagakpɔm o, eye esusɔ vie ko miagakpɔm akea?
20 Vavã, vavã mele egblɔm na mi be: Miafa avi, eye miafa konyi, gake xexea ya akpɔ dzidzɔ; miaxa nu, gake miaƒe nuxaxa la atrɔ azu dzidzɔ.
21 Nyɔnu la, ne ele vi dzim la, esea veve, elabena eƒe gaƒoƒo la ɖo; gake ne edzi ɖevi sue la vɔ ko la, megaɖoa ŋku eƒe fukpekpe la dzi o, le dzidzɔ ta, be wodzi ame ɖe xexea me.
22 Eya ta miawo hã miele nu xam fifia; gake magakpɔ mi ake, eye miaƒe dzi akpɔ dzidzɔ, eye miaƒe dzidzɔ la, ame aɖeke maxɔe le mia si o.
23 Eye le ŋkeke ma dzi la, miele nya aɖeke kura bia gem o. Vavã, vavã mele egblɔm na mi be: Ne miebia nane Fofo la la, atsɔe ana mi le nye ŋkɔ me.
24 Va se ɖe fifia la, miebia nu ɖeka teti hã le nye ŋkɔ me kpɔ o. Mibia, eye miaxɔe, bene miaƒe dzidzɔ nagba go.
25 “Megblɔ nya siawo na mi to nuwo tsɔtsɔ sɔ kple wo nɔewo me. Gaƒoƒo la gbɔna, esime nyemagaƒo nu na mi to nuwo tsɔtsɔ sɔ kple wo nɔewo me o, ke boŋ maƒo nu tso Fofo la ŋu na mi tẽe.
26 Le ŋkeke ma me la, miabia nu le nye ŋkɔ me, eye nyemele gbɔgblɔm na mi be maɖe kuku na Fofo la ɖe mia ta o.
27 Elabena Fofo la ŋutɔ melɔ̃a nu le mia gbɔ o, elabena mielɔ̃a nu le gbɔnye o, eye miexɔe se be meva abe Fofo la teƒe nɔla ene.
28 Metso Fofo la gbɔ, eye meva xexea me. Gawu la, mele dzodzom le xexea me, eye meyina Fofo la gbɔ.”
29 Eƒe nusrɔ̃lawo gblɔ be: “Ehɛ̃! Azɔ ko nèle nu ƒom na mí tẽe, eye mègale nuwo tsɔm le sɔsɔm kple wo nɔewo o.
30 Azɔ míenyae be ènya nuwo katã, eye mehiã be ame aɖeke nabia nya wò o. Esia me míexɔe se le be Mawu gbɔe nètso va.”
31 Yesu ɖo eŋu na wo be: “Miexɔe se azɔa?
32 Kpɔ ɖa! Gaƒoƒo la gbɔna, ɛ̃, ede vɔ hã, esime woaka mi ahlẽ, eye ame sia ame ayi eƒe aƒe me, eye miagblẽ nye ɖeka ɖi; ke hã, menye nye ɖekae li o, elabena Fofo la li kplim.
33 Megblɔ nya siawo na mi, bene miato dzinye akpɔ ŋutifafa. Le xexea me la, miele xaxawo me tom, gake milé dzi ɖe ƒo! Meɖu xexea dzi.”
