Yakobo 4:1-17

4  Afi kae aʋawɔwɔwo tso, eye afi kae dzrewɔwɔ siwo le mia dome la tso? Ðe menye ŋutilã ƒe vivisese ƒe dzodzro sesẽ, siwo wɔa avu le miaƒe ŋutinuwo me, gbɔe wotso oa?  Nu dzroa mi, gake miekpɔnɛ o. Mieyia edzi wua ame hebiãa ŋu, ke hã, miaƒe asi mesua nu dzi o. Mieyia edzi wɔa dzre, eye miewɔa aʋa. Miekpɔa naneke o, elabena miebianɛ o.  Miebiana, ke miexɔnɛ o, elabena susu vɔ̃e mietsɔ le ebiam, ale be miaɖi kɔ na ŋutilã ƒe vivisese ƒe dzodzro sesẽ siwo le mia me.  Ahasiwɔlawo, mienyae be xɔlɔ̃dzedze xexea nye futɔnyenye na Mawu oa? Eya ta ame sia ame, si dina be yeanye xexea xɔlɔ̃ la, ewɔa eɖokui Mawu ƒe futɔ.  Alo ɖe wòwɔ na mi be dzodzroe ŋɔŋlɔ la gblɔ be: “Gbɔgbɔ si xɔ aƒe ɖe mía me la yia edzi nɔa nu dzrom le ŋubiabiã ƒe susu ta”?  Ke hã, amenuveve si wònana la lolo wu. Eya ta ŋɔŋlɔ la gblɔ be: “Mawu tsia tsitre ɖe ɖokuidoɖedzilawo ŋu, ke evea ɖokuibɔbɔlawo nu.”  Eya ŋuti mibɔbɔ mia ɖokui ɖe Mawu te; gake mitsi tsitre ɖe Abosam ŋu, eye asi le mia gbɔ.  Mite ɖe Mawu ŋu, eye ate ɖe mia ŋu. Miklɔ miaƒe asiwo, mi nu vɔ̃ wɔlawo, eye mikɔ miaƒe dziwo ŋu, mi dzimevesusulawo.  Mixa nu, mifa konyi, eye mifa avi. Mina miaƒe nukoko natrɔ azu nuxaxa, eye miaƒe aseyetsotso natrɔ azu blanuiléle. 10  Mibɔbɔ mia ɖokui ɖe anyi le Yehowa ŋkume, eye ado mi ɖe dzi. 11  Nɔviwo, midzudzɔ nuƒoƒo tsi tsitre ɖe mia nɔewo ŋu. Ame si ƒoa nu tsi tsitre ɖe nɔvi aɖe ŋu, alo drɔ̃a ʋɔnu nɔvia la, ƒoa nu tsi tsitre ɖe se la ŋu, eye wòdrɔ̃a ʋɔnu se la. Ke ne èdrɔ̃a ʋɔnu sea la, ekema mènye se la dzi wɔla o, ke ʋɔnudrɔ̃la boŋ. 12  Senala kple ʋɔnudrɔ̃la ɖeka koe li, ame si tea ŋu xɔa ame ɖe agbe, eye wòtea ŋu tsrɔ̃a ame. Ke wò la, ame kae nènye, be nèle ʋɔnu drɔ̃m hawòvi? 13  Azɔ misee, mi ame siwo gblɔna be: “Egbe alo etsɔ la, míayi du sia me, eye míanɔ afi ma ƒe ɖeka, eye míatsa asi akpɔ viɖe,” 14  evɔ mienya nu si miaƒe agbe ava zu etsɔ o. Elabena afu si dona hena ɣeyiɣi aɖe, eye emegbe wòbuna, ye mienye. 15  Ele be miagblɔ boŋ be: “Ne Yehowa lɔ̃ la, míanɔ agbe, eye míawɔ esi alo ekemɛ hã.” 16  Gake azɔ la, miele dadam le miaƒe adegbe ƒuƒlu ƒoƒowo me. Adegbeƒoƒo sia katã nye nu vɔ̃ɖi. 17  Eya ta ne ame aɖe nya ale si wòawɔ nu nyui, evɔ mewɔnɛ o la, enye nu vɔ̃ nɛ.

Etenuŋɔŋlɔ