Yakobo 1:1-27

1  Yakobo, Mawu kple Aƒetɔ Yesu Kristo ƒe kluvi, le esia ŋlɔm na to wuieve siwo ka hlẽ la: Medo gbe na mi!  Nɔvinyewo, ne miedo go tetekpɔ vovovowo la, mibui dzidzɔ sɔŋ,  esi mienyae be miaƒe xɔse ƒe nyonyome sia si wodo kpɔ la hea dzidodo vanɛ ta.  Gake mina dzidodo nawu eƒe dɔwɔwɔ nu bliboe, ale be mianɔ blibo, eye miasu te le goawo katã me, eye naneke naganɔ mia hiãm o.  Eya ta ne mia dometɔ aɖe le nunya hiãm la, neyi edzi wòanɔ Mawu biam, elabena enaa nu amewo katã faa, eye medoa ŋukpe ame o; eye wòanae.  Gake neyi edzi wòanɔ ebiam le xɔse me, eye negake ɖi kura o, elabena ame si kea ɖi la le abe ƒutsotsoe si ya ƒona yina gbɔna la ene.  Ɛ̃, ame ma negasusui kura be yeaxɔ nane tso Yehowa gbɔ o;  dzimevesusula ye wònye, melia ke le eƒe mɔwo katã dzi o.  Gake nɔvi si nye ame tsɛ la natso aseye le eƒe dodoɖedzi la ŋu, 10  eye kesinɔtɔ hã ɖe eƒe bɔbɔɖeanyi la ŋu, elabena eyama nu ava yi abe gbe ƒe seƒoƒo ene. 11  Elabena ɣe dzena kple eƒe dzoxɔxɔ gã henaa gbe yrɔna, eye eƒe seƒoƒo duduna, eye eƒe gotagome ƒe nyonyo nu yina. Nenema kee kesinɔtɔ hã ayrɔ le eƒe agbenɔnɔ me. 12  Dzidzɔtɔe nye ame si doa dzi le tetekpɔ me, elabena ne wokpɔ ŋudzedze ɖe eŋu la, axɔ agbefiakuku la, si ŋugbe Yehowa do na ame siwo yia edzi lɔ̃nɛ. 13  Ne ame aɖe le tetekpɔ me tom la, negagblɔ be: “Mawue le teyem kpɔ” o. Elabena womate ŋu atsɔ nu vɔ̃ɖiwo ate Mawu kpɔ o, eye eya ŋutɔ hã metea ame aɖeke kpɔ o. 14  Gake nu si tea ame sia ame kpɔ lae nye ye ŋutɔ ƒe nudzodzro si henɛ, eye wòblenɛ. 15  Azɔ ne nudzodzro la fɔ fu la, edzia nu vɔ̃; eye ne nu vɔ̃ hã va tsi la, edzia ku. 16  Nɔvinye lɔlɔ̃tɔwo, migana woakplɔ mi atrae o. 17  Nunana nyui ɖe sia ɖe kple nunana blibo ɖe sia ɖe tso dziƒo, elabena etso kekeli siwo le dziƒo* ƒe Fofo la gbɔ, eye eyama metrɔna abe vɔvɔli ene o. 18  Le eƒe lɔlɔ̃nu ta la, etsɔ nyateƒenya la dzi mí, ale be míanye eƒe nuwɔwɔ siwo wòtia gbã la dometɔ aɖewo. 19  Nɔvinye lɔlɔ̃tɔwo, minya esia. Ele be ame sia ame naɖe abla le nusese me, nanɔ blewu le nuƒoƒo me, nanɔ blewu le dziku me; 20  elabena ame ƒe dɔmedzoe menana wòwɔa nu dzɔdzɔe abe ale si Mawu di ene o. 21  Eya ta miɖe ɖiƒoƒo katã kple nɔnɔme maɖevi ma, si nye vɔ̃ɖinyenye, la ɖa, eye mitsɔ tufafa lɔ̃ be woaƒã nya la, si ate ŋu axɔ miaƒe luʋɔwo ɖe agbe la, ɖe mia me. 22  Ke hã, mizu nyadziwɔlawo, ke menye nyaselawo ko o, bene miagatsɔ tamebubu totro anɔ mia ɖokuiwo blem o. 23  Elabena ne ame aɖe nye nyasela, gake menye nyadziwɔla o la, ame sia le abe ame aɖe si le eƒe dzɔdzɔmemo kpɔm le ahuhɔ̃e me la ene. 24  Elabena ekpɔa eɖokui, eye wòdzona yina, eye enumake eŋlɔa ame si ƒomevi wònye la be. 25  Gake ame si léa ŋku ɖe se deblibo si naa ablɔɖe la ŋu, eye wònɔa edzi ɖaa la akpɔ dzidzɔ le ewɔwɔ me, le esi wòzu nyadziwɔla, ke menye nyasela si ŋlɔa nu be o la ta. 26  Ne ame aɖe bua eɖokui mawusubɔla adodoea, evɔ medea ga eƒe aɖe o, gake wòyia edzi blea ye ŋutɔ ƒe dzi la, ame sia ƒe subɔsubɔ nye dzodzro. 27  Subɔsubɔ si le dzadzɛ, si ŋu ɖiƒoƒo mele o, le mía Mawu si nye mía Fofo ŋkume lae nye esi: be woakpɔ tsyɔ̃eviwo kple ahosiwo dzi le woƒe xaxa me, eye be ame nadzra eɖokui ɖo ɖimaƒomaƒoe tso xexea me.

Etenuŋɔŋlɔ

Esia ku ɖe ɣe, ɣleti, kple ɣletiviwo ŋu.