Tito 1:1-16

1  Paulo, Mawu ƒe kluvi kple Yesu Kristo ƒe apostolo, le Mawu ƒe ame tiatiawo ƒe xɔse kple nyateƒe la ƒe sidzedze vavãtɔ si sɔ ɖe ɖokuitsɔtsɔ na Mawu,  si wotu ɖe agbe mavɔ ƒe mɔkpɔkpɔ si ƒe ŋugbe Mawu, ame si mate ŋu aka aʋatso o la, do hafi ɣeyiɣi mavɔmavɔwo dze egɔme, dzi la nu,  esi wòɖe eƒe nya la fia le ye ŋutɔ ƒe ɣeyiɣiwo dzi le gbeƒãɖeɖedɔ si wotsɔ de asi nam la me, le mía Xɔla, si nye Mawu, ƒe sedede la nu;  le esia ŋlɔm na Tito, vinye vavã le xɔse si le mí katã mía si la nu: Amenuveve kple ŋutifafa si tso Mawu Fofo la kple Kristo Yesu mía Xɔla gbɔ la nanɔ anyi kpli wò.  Susu sia tae megblẽ wò ɖe Kreta ɖo, be nàɖɔ nu siwo gblẽ la ɖo, eye nàɖo hamemetsitsiwo tso du me yi du me, abe ale si mede se na wòe ene;  ne ame aɖe li, si ŋu nya aɖeke meku ɖo o, si nye nyɔnu ɖeka srɔ̃, ame si si vi xɔsetɔ siwo nu wometso ɖe agbe baɖa nɔnɔ alo tosesẽ ta o la le.  Elabena ele be dzikpɔla nanye ame si ŋu nutsotso aɖeke mele o abe Mawu ƒe aƒe dzi kpɔla ene, naganye ɖokuiŋudzela o, naganye dɔmedzoetɔ o, naganye ahamula si wɔa dzre o, naganye ameƒola o, naganye ame si klẽa ŋu ɖe viɖe ƒoɖi ŋu o,  ke boŋ wòanye amedzrowɔla, nu nyui lɔ̃la, ame ɖɔŋuɖo, ame dzɔdzɔe, nuteƒewɔla, ame si ɖua eɖokui dzi,  ame si léna ɖe nyateƒenya la ŋu goŋgoŋ le eƒe nufiafiaɖaŋu me, bene wòatsɔ nufiafia nyuitɔ la axlɔ̃ nu ahagbe nya na ɖeklemiɖelawo. 10  Elabena tosẽla geɖewo kple nya dzodzro gblɔlawo kpakple ame siwo trɔa susu na amewo la li, vevietɔ wo dometɔ siwo lé aʋatsotso la me ɖe asi. 11  Ehiã be woamia nu na ame siawo, elabena woyi edzi le ƒome blibowo ƒe tame trɔm, to nu siwo medze be woafia o la fiafia me le viɖe ƒoɖi ta. 12  Wo dometɔ aɖe, si nye woawo ŋutɔwo ƒe nyagblɔɖila aɖe, gblɔ be: “Kretatɔwo nye aʋatsokalawo ɖaa, gbemelã wɔadã vɔ̃ɖiwo, nu tsu ɖula dɔ aɖeke mawɔlawo.” 13  Ðaseɖiɖi sia nye nyateƒe. Le susu sia tututu ta la, yi edzi nànɔ nya gbem na wo vevie, bene woanɔ lãmesẽ me le xɔse la me, 14  bene woaganɔ to ɖom Yudatɔwo ƒe gliwo kple ame siwo trɔna ɖa tso nyateƒe la gbɔ la ƒe sededewo o. 15  Nuwo katã le dzadzɛ na ame dzadzɛwo. Gake le ame makɔmakɔwo kple dzimaxɔsetɔwo gome la, naneke mele dzadzɛ o, ke boŋ woƒe susu kple dzitsinya siaa zu nu makɔmakɔ. 16  Wogblɔna le dutoƒo be yewonya Mawu, gake wotsɔ woƒe dɔwɔwɔwo gbe nu le egbɔ, elabena wonye ame nyɔŋuwo kple tosẽlawo, eye womedze na dɔ nyui aɖeke wɔwɔ o.

Etenuŋɔŋlɔ