Mateo 4:1-25
4 Eye gbɔgbɔ la kplɔ Yesu yi gbedadaƒo, bene Abosam natee kpɔ.
2 Esi wòtsi nu dɔ ŋkeke blaene kple zã blaene megbe la, dɔ wui.
3 Gawu la, Tela la va hegblɔ nɛ be: “Ne Mawu ƒe vie nènye la, ekema gblɔ na kpe siawo be woatrɔ azu abolo.”
4 Gake eɖo eŋu be: “Woŋlɔ ɖi be, ‘Mele be ame nanɔ agbe ɖe abolo ɖeɖe ko ŋu o, ke boŋ ɖe nya sia nya si dona tso Yehowa ƒe nu me ŋu.’”
5 Azɔ Abosam kplɔe yi ɖe du kɔkɔe la me, eye wòtsɔe ɖo gbedoxɔa tame,
6 eye wògblɔ nɛ be: “Ne Mawu ƒe vie nènye la, ekema ti kpo nàɖadze anyigba; elabena woŋlɔ ɖi be, ‘Ade se na eƒe dɔlawo le ŋutiwò, eye woakɔ wò ɖe woƒe asiwo me, bene nàgatsɔ wò afɔ axlã ɖe kpe gbeɖe o.’”
7 Yesu gblɔ nɛ be: “Woŋlɔ ɖi hã be, ‘Mele be nàte Yehowa wò Mawu kpɔ o.’”
8 Abosam gakplɔe yi to aɖe si kɔkɔ ŋutɔ dzi, eye wòɖe xexea me fiaɖuƒewo katã kple woƒe ŋutikɔkɔe fiae,
9 eye wògblɔ nɛ be: “Matsɔ nu siawo katã ana wò ne èdze klo de ta agu nam.”
10 Eye Yesu gblɔ nɛ be: “Te ɖa le gbɔnye, Satana! Elabena woŋlɔ ɖi be, ‘Yehowa wò Mawu ye wòle be nàde ta agu na, eye eya ɖeka koe wòle be nàwɔ subɔsubɔdɔ kɔkɔe na.’”
11 Tete Abosam dzo le egbɔ, eye kpɔ ɖa! Mawudɔlawo va hete kpekpeɖeŋunanae.
12 Ke esi wòse be wolé Yohanes la, edzo yi Galilea.
13 Eye esi wòdzo le Nazaret la, eva nɔ Kapernaum le ƒua ŋu le Zebulon kple Naftali nutoawo me,
14 bene nya si wogblɔ ɖi to Yesaya nyagblɔɖila la dzi la nava eme be:
15 “Oo Zebulon nyigba kple Naftali nyigba, siwo le ƒutamɔ to, le Yordan ƒe go kemɛ dzi, dukɔwo ƒe Galilea!
16 Dukɔ si bɔbɔ nɔ viviti me la kpɔ kekeli gã aɖe, eye kekeli klẽ ɖe ame siwo bɔbɔ nɔ anyigba si dzi ku ƒe vɔvɔli le la dzi.”
17 Tso ɣemaɣi la, Yesu te gbeƒãɖeɖe nɔ gbɔgblɔm be: “Mitrɔ dzi me, elabena dziƒofiaɖuƒe la gogo.”
18 Esi wònɔ Galilea ƒua nu tom yina la, ekpɔ nɔvi eve, siwo nye Simon si woyɔna be Petro kple nɔvia Andrea, wonɔ ɖɔ dam ɖe ƒua me, elabena tɔƒodelawo wonye.
19 Eye wògblɔ na wo be: “Miva dze yonyeme, eye mawɔ mi ameɖelawo.”
20 Enumake wogblẽ woƒe ɖɔawo ɖi, eye wodze eyome.
21 Eye esi wòdzo le afi ma yi ŋgɔ vie la, ekpɔ ame eve bubu siwo nye nɔviwo, Yakobo, Zebedeo vi, kple nɔvia Yohanes, le tɔdziʋu me kple wo fofo Zebedeo, wonɔ woƒe ɖɔwo sam, eye wòyɔ wo.
22 Enumake wogblẽ tɔdziʋu la kple wo fofo ɖi, eye wodze eyome.
23 Eye wòyi ɖato Galilea blibo la katã, nɔ nu fiam le woƒe ƒuƒoƒewo henɔ gbeƒã ɖem fiaɖuƒe ŋuti nya nyui la, eye wònɔ dɔléle ɖe sia ɖe ƒomevi kpakple lãmegbegblẽ ɖe sia ɖe ƒomevi dam le dukɔ la dome.
24 Eye eŋuti nya kaka yi Siria nuto blibo la katã me; eye wokplɔ ame siwo katã ƒe lãme gblẽ vevie, ame siwo dɔléle kple fukpekpe vovovowo le nuxaxa dom na, ame siwo me gbɔgbɔ vɔ̃wo le, kple ame siwo le anyidzedɔ lém kpakple lãmetututɔwo va egbɔ, eye wòda dɔ na wo.
25 Le esia ta la, ameha gã aɖe dze eyome tso Galilea kple Dekapoli* kple Yerusalem kple Yudea kpakple Yordan ƒe go kemɛ dzi.
Etenuŋɔŋlɔ
^ Alo “du ewoawo.”
