Mateo 15:1-39
15 Eye Farisitɔwo kple agbalẽfialawo tso Yerusalem va Yesu gbɔ va gblɔ be:
2 “Nu ka tae wò nusrɔ̃lawo mezɔna ɖe blematɔwo ƒe kɔnyinyi la nu o? Le kpɔɖeŋu me, ne wole nu ɖu ge la, womeklɔa asi o.”
3 Eɖo eŋu na wo gblɔ be: “Nu ka tae miawo hã miedaa Mawu ƒe se la dzi le miaƒe kɔnyinyi la ta?
4 Le kpɔɖeŋu me, Mawu gblɔ be, ‘Bu fofowò kple dawò,’ eye be, ‘Ame si dzua fofoa alo dadaa la dze ku.’
5 Gake miawo ya miegblɔna be: ‘Ame sia ame si gblɔ na fofoa alo dadaa be: “Nu si le asinye, si me nàkpɔ viɖe le tso gbɔnye hafi la, zu nunana si metsɔ ɖe adzɔgbe na Mawu” la,
6 mele be wòabu fofoa kura o.’ Eye aleae miena Mawu ƒe nya la zu dzodzro le miaƒe kɔnyinyi la ta.
7 Alakpanuwɔlawo, Yesaya gblɔ nya ɖi nyuie le mia ŋuti, esime wògblɔ be,
8 ‘Dukɔ sia le buyem kple woƒe nuyiwo, gake woƒe dzi te ɖa xaa tso gbɔnye.
9 Dzodzroe woyi edzi le ta dem agu nam, elabena nufiafia siwo nye amegbetɔwo ƒe sededewoe wofiana.’”
10 Eye wòyɔ ameha la va eɖokui gbɔ hegblɔ na wo be: “Miɖo to, ne miase egɔme:
11 Menye nu si yia ame ƒe nu me ye nana wòzua ame makɔmakɔ o; ke boŋ nu si doa go tso eƒe nu me ye nana wòzua ame makɔmakɔ.”
12 Eye nusrɔ̃lawo va gblɔ nɛ be: “Ènya be esi Farisitɔwo se nya si nègblɔ la, ezu nukikli na woa?”
13 Eɖo eŋu gblɔ be: “Ati sia ati si Fofonye si le dziƒo medo o la, woahoe.
14 Miɖe asi le wo ŋu. Mɔfiala ŋkuagbãtɔwoe wonye. Ke ne ŋkuagbãtɔ le mɔ fiam ŋkuagbãtɔ la, woa kple eve la siaa woage adze do me.”
15 Petro ɖo eŋu nɛ be: “Ðe kpɔɖeŋua gɔme na mí.”
16 Eye wògblɔ be: “Ke miawo hã miese nya siawo gɔme haɖe oa?
17 Ðe mienya be nu sia nu si yia nu me la toa dɔkaviwo me, eye wodenɛ le nugodo oa?
18 Gake nu siwo doa go tso nu me la, woawoe doa go tso dzi la me, eye nu mawoe nana ame zua ame makɔmakɔ.
19 Le kpɔɖeŋu me, dzi mee susu vɔ̃wo bubu, amewuwuwo, ahasiwɔwɔwo, agbe gbegblẽ nɔnɔwo, fififiwo, aʋatsoɖaseɖiɖiwo, busunyagbɔgblɔwo doa go tso.
20 Esiawoe nye nu siwo nana ame zua ame makɔmakɔ; ke be woaɖu nu asi maklɔmaklɔe la menana ame zua ame makɔmakɔ o.”
21 Esi Yesu dzo le afi ma la, eyi Tiro kple Zidon nutowo me.
22 Eye kpɔ ɖa! Nyɔnu aɖe si nye Foiniketɔ tso nuto mawo me la va hedo ɣli gblɔ be: “Aƒetɔ, David Vi, kpɔ nublanui nam. Gbɔgbɔ vɔ̃wo le fu ɖem na vinyenyɔnuvi vevie.”
23 Gake megblɔ nya aɖeke tsɔ ɖo eŋu nɛ o. Eya ta eƒe nusrɔ̃lawo va hete kukuɖeɖe nɛ be: “Na wòadzo; elabena ele ɣli dom le mía yome.”
24 Eɖo eŋu gblɔ be: “Womedɔm ɖe ame bubu aɖeke gbɔ o, negbe ɖe Israel ƒe me alẽ búbuawo gbɔ ko.”
25 Esi nyɔnua va la, ebɔbɔ nɛ gblɔ be: “Aƒetɔ, kpe ɖe ŋunye!”
26 Eɖo eŋu nɛ gblɔ be: “Mesɔ be woatsɔ ɖeviwo ƒe nuɖuɖu aƒu gbe ɖo ɖe avuviwo o.”
27 Egblɔ be: “Aƒetɔ, ele nenema baa; ke hã, avuviwo ɖua nuɖuɖu wuwlui siwo duduna tso woƒe aƒetɔwo ƒe kplɔ̃ dzi.”
28 Eye Yesu ɖo eŋu nɛ gblɔ be: “Oo, nyɔnu, wò xɔse la lolo; neva eme na wò abe ale si nèdi ene.” Eye vianyɔnuvi la haya tso gaƒoƒo ma dzi.
29 Esi Yesu dzo le afi ma la, eva teƒe aɖe si gogo Galilea ƒua, eye esi wòyi to la dzi vɔ la, ebɔbɔ nɔ anyi ɖe afi ma.
30 Eye ameha gã aɖewo va egbɔ, eye wokplɔ atatututɔwo, nuwɔametɔwo, ŋkuagbãtɔwo, mumuwo, kple dɔ bubu ƒomevi lélawo ɖe asi, eye ɖeko wòle abe ɖe wotsɔ wo nɔ gbe ƒum ɖe eƒe afɔ nu ene, eye wòda dɔ na wo;
31 ale be ameha la ƒe mo wɔ yaa esi wokpɔ mumuwo nɔ nu ƒom, atatututɔwo nɔ zɔzɔm, eye ŋkuagbãtɔwo nɔ nu kpɔm; eye wodo Israel ƒe Mawu la ɖe dzi.
32 Gake Yesu yɔ eƒe nusrɔ̃lawo va eɖokui gbɔ hegblɔ na wo be: “Ameha la ƒe nu le nublanui wɔm nam, elabena ŋkeke etɔ̃ sɔŋ ye nye esia wole gbɔnye, eye naneke mele wo si woaɖu o; eye nyemedi be maɖe asi le wo ŋu woadzo dɔme ɣeɣi o. Ðewohĩ akpo ava tso wo le mɔ dzi.”
33 Gake nusrɔ̃lawo gblɔ nɛ be: “Afi kae míakpɔ abolo geɖe atsoe le gbedadaƒo afi sia na ame gbogbo siawo, ne woaɖu aɖi ƒo?”
34 Eye Yesu gblɔ na wo be: “Abolo nenie le mia si?” Woɖo eŋu be: “Wo ame adre, kple tɔmelã ʋɛ aɖewo.”
35 Eye esi wògblɔ na ameha la be woabɔbɔ anɔ anyi ɖe anyigba vɔ la,
36 etsɔ abolo adreawo kple tɔmelãawo, eye esi wòda akpe vɔ la, eŋe wo me, eye wòte wo mama na eƒe nusrɔ̃lawo, eye nusrɔ̃lawo hã ma wo na amehaawo.
37 Eye wo katã woɖu nu ɖi ƒo, eye wofɔ kakɛ siwo susɔ la, wode kusi gã adre.
38 Evɔ ŋutsu siwo ɖu nua la nɔ ame akpe ene, nyɔnuwo kple ɖevi suewo ya mele eme o.
39 Mlɔeba esi wòɖe asi le amehaawo ŋu vɔ la, eɖo tɔdziʋu la, eye wòva Magadan nutoawo me.
