Luka 21:1-38

21  Ke esi wòfɔ mo dzi la, ekpɔ kesinɔtɔwo wonɔ woƒe nunanawo dam ɖe nudzɔɖakaawo me.  Azɔ ekpɔ ahosi dahe aɖe wòtsɔ gaku sue eve, siwo ƒe home le sue ŋutɔ la, va de eme le afi ma,  eye wògblɔ be: “Vavã mele egblɔm na mi be: Togbɔ be ahosi sia da ahe hã la, nu si wòtsɔ de eme la sɔ gbɔ wu esi wo katã wotsɔ de eme.  Elabena nunana siwo ame siawo katã tsɔ de eme la nye nu gbogbo siwo le wo si la ƒe ɖe ko, gake ahosia ya tso eƒe ahedada me tsɔ nu siwo katã le esi, si nu wòanɔ agbe ɖo la, de eme.”  Emegbe esi ame aɖewo nɔ nu ƒom tso gbedoxɔa ŋu, ale si wotsɔ kpe nyuiwo kple nunana siwo wotsɔ ɖe adzɔgbe na Mawu la ɖo atsyɔ̃ nɛ la,  egblɔ be: “Nu siawo siwo kpɔm miele la, ŋkekewo gbɔna, siwo me womele kpe aɖeke gblẽ ge ɖe kpe dzi le afi sia, si womamu aƒu anyi o.”  Eya ta wobiae be: “Nufiala, ɣekaɣie nu siawo adzɔ ŋutɔŋutɔ, eye nu kae anye dzesi na ɣeyiɣi si me nu siawo adzɔ?”  Egblɔ be: “Mikpɔ nyuie be woagakplɔ mi atrae o; elabena ame geɖewo ava le nye ŋkɔ dzi agblɔ be: ‘Nyee nye ame ma,’ eye be: ‘Ɣeyiɣi la gogo.’ Migadze wo yome o.  Eye ne miese aʋawɔwɔwo kple zitɔtɔwo ŋu nya la, dzika negatso mia ƒo o. Elabena ele be nu siawo nava eme gbã, gake nuwuwu la maɖo enumake o.” 10  Eye wòyi edzi gblɔ na wo be: “Dukɔ atsi tsitre ɖe dukɔ ŋu, eye fiaɖuƒe ɖe fiaɖuƒe ŋu; 11  eye anyigba aʋuʋu ŋutɔ, eye dɔvɔ̃wo kple nuɖuɖu ƒe veve ava teƒeteƒewo; eye woakpɔ nu ɖivɔvɔ̃wo kple dzesi gã siwo atso dziƒo. 12  “Gake do ŋgɔ na nu siawo katã la, amewo aɖo woƒe asiwo mia dzi, eye woati mia yome, eye woakplɔ mi ayi ƒuƒoƒewo, eye woade mi gaxɔwo me, eye woahe mi ayi dufiawo kple nutomefiawo ŋkume le nye ŋkɔ ta. 13  Esia ana mɔnukpɔkpɔ mi miaɖi ɖase. 14  Eya ta miɖoe le miaƒe dzi me be miagabu ale si miaʋli mia ɖokui tae la ŋu do ŋgɔ o, 15  elabena mana nu kple nunya mi, eye ame siwo katã tsi tsitre ɖe mia ŋu la mate ŋu anɔ te ɖe enu alo agblɔ nya bubu aɖeke atsi tsitre ɖe eŋu o. 16  Gawu la, dzilawo kple nɔviwo kple ƒometɔwo kple xɔlɔ̃wo kura gɔ̃ hã ade mi asi, eye woawu mia dometɔ aɖewo; 17  eye amewo katã alé fu mi le nye ŋkɔ la ta. 18  Ke hã, miaƒe taɖa ɖeka pɛ hã matsrɔ̃ akpɔ o. 19  Ne miedo dzi la, miaɖe miaƒe luʋɔwo. 20  “Gawu la, ne miekpɔ aʋakɔwo ƒu asaɖa anyi heɖe to ɖe Yerusalem ŋu la, ekema minyae be eƒe aƒedozuɣi gogo. 21  Ekema ame siwo le Yudea nate sisi ayi towo dzi, eye ame siwo le dua me la nadzo, eye ame siwo le agbletawo la nagatrɔ ayi eme o; 22  elabena ŋkeke siawo nye hlɔ̃biabiaŋkekewo, bene nu siwo katã woŋlɔ ɖi la nava eme. 23  Baba na nyɔnu funɔwo kple ame siwo le no nam vidzĩ le ŋkeke mawo me! Elabena hiãkame gã ava anyigba la dzi, kple dɔmedzoe ɖe dukɔ sia ŋu; 24  eye woadze yi nu, eye woaɖe aboyo wo ayi dukɔwo katã me; eye dukɔwo atu afɔ Yerusalem dzi, va se ɖe esime dukɔwo ƒe ɣeyiɣi ɖoɖiawo nade. 25  “Eye dzesiwo ado ɖe ɣe kple ɣleti kpakple ɣletiviwo me, eye le anyigba dzi la, dukɔwo atɔtɔ vevie, eye womanya nu si woawɔ o, le atsiaƒu ƒe gbeɖeɖe kple eƒe agbodzedze ta, 26  eye amewo aku ƒenyi le vɔvɔ̃ kple mɔkpɔkpɔ na nu siwo gbɔna anyigba dzi la ta; elabena woaʋuʋu dziƒowo ƒe ŋusẽwo. 27  Eye ekema woakpɔ Amegbetɔvi la le alilikpo me gbɔna kple ŋusẽ kpakple ŋutikɔkɔe gã. 28  Gake ne nu siawo de asi dzɔdzɔ me la, mitsi tsitre miadzɔ kã, eye mifɔ miaƒe tawo dzi, elabena miaƒe ɖeɖekpɔkpɔ le gogom.” 29  Eye wòwɔ kpɔɖeŋu aɖe na wo be: “Milé ŋku ɖe gboti kple ati bubuwo katã ŋu: 30  Ne wole aŋgba tom miekpɔ ko la, mia ŋutɔwo mienyana be fifia dzomeŋɔli gogo. 31  Nenema kee miawo hã, ne miekpɔ nu siawo le dzɔdzɔm la, minyae be Mawu fiaɖuƒe la gogo. 32  Vavã mele egblɔm na mi be: Dzidzime sia nu mele yiyi ge akpɔ o, va se ɖe esime nuwo katã va eme hafi. 33  Dziƒo kple anyigba nu ava yi, gake nye nyawo ya nu mayi akpɔ o.” 34  “Ke mikpɔ mia ɖokui dzi nyuie, be nu tsu ɖuɖu kple aha tsu nono kple agbe me dzimaɖitsitsiwo nagate miaƒe dzi ɖe to gbeɖe o, ne ŋkeke ma nagava lili mi 35  abe mɔ ene o. Elabena ava ame siwo katã le anyigba bliboa ŋkume la dzi. 36  Eya ta minɔ ŋudzɔ, eye minɔ kokoƒoƒo dzi ɖaasi, bene miate ŋu asi le nu siawo katã siwo adzɔ la nu, eye miate ŋu atsi tsitre ɖe Amegbetɔvi la ŋkume.” 37  Ale le ŋkeke me la, enɔa nu fiam le gbedoxɔa me, gake ne zã do la, edoa go yi ɖadɔa to si woyɔna be Amito la dzi. 38  Eye dukɔ blibo la vaa egbɔ ŋdikanya le gbedoxɔa me, be yewoaɖo toe.

Etenuŋɔŋlɔ