Luka 20:1-47

20  Le ŋkekeawo dometɔ ɖeka dzi, esi wònɔ nu fiam amewo le gbedoxɔa me henɔ gbeƒã ɖem nya nyuia la, nunɔlawo ƒe tatɔwo kple agbalẽfialawo kpakple amegãawo va egbɔ,  eye woxɔ edzi gblɔ nɛ be: “Gblɔ ŋusẽ si nètsɔ le nu siawo wɔm alo ame si na ŋusẽ sia wò la na mí.”  Eɖo eŋu na wo gblɔ be: “Nye hã mabia nya ɖeka mi, ne miagblɔe nam:  Dziƒoe Yohanes ƒe nyɔnyrɔnana la tso loo alo amegbetɔwo gbɔe wòtso?”  Ale wolée kpɔ le wo nɔewo dome, gblɔ be: “Ne míegblɔ be: ‘Dziƒoe wòtso’ la, agblɔ be, ‘Ekema nu ka tae miexɔ eyama dzi se o?’  Gake ne míegblɔ be: ‘Etso amewo gbɔ la,’ dukɔ blibo la aƒu kpe mí, elabena woka ɖe edzi be Yohanes nye nyagblɔɖila.”  Eya ta woɖo eŋu be yewomenya etsoƒe o.  Eye Yesu gblɔ na wo be: “Nye hã nyemele ŋusẽ si metsɔna wɔa nu siawoe la gblɔ ge na mi o.”  Eye wòde asi kpɔɖeŋu sia wɔwɔ me na ameawo be: “Ame aɖe de waingble, eye wòtsɔe de asi na agbledela aɖewo, eye wòzɔ mɔ yi duta hena ɣeyiɣi didi aɖe. 10  Ke esi nuŋeɣi ɖo la, edɔ eƒe kluvi ɖeka ɖe agbledelaawo gbɔ, be woatsɔ waingble la me kutsetse la ƒe ɖe anae. Ke agbledelaawo ƒoe hegbugbɔe ɖo ɖa asi ƒuƒlu. 11  Gake egagbugbɔ dɔ kluvi bubu ɖe wo gbɔ. Woƒo esia hã hedo vloe, eye wogbugbɔe ɖo ɖa asi ƒuƒlu. 12  Ke egadɔ etɔ̃lia ɖa; wode abi ame sia hã ŋu, eye wokɔe ƒu gbe. 13  Ke waingbletɔ la gblɔ be: ‘Nu ka wɔ ge mala? Madɔ vinye si gbɔ nyemelɔ̃a nu le o la ɖa. Ðewohĩ woabu ame sia ya.’ 14  Esi agbledelaawo ƒe ŋku klii la, wode adaŋu le wo nɔewo dome gblɔ be: ‘Ame siae nye domenyila la; mina míawui, ne domenyinu la nazu mía tɔ.’ 15  Ale wokɔe ƒu gbe ɖe waingble la godo, eye wowui. Ke nu kae waingbletɔ la awɔ wo? 16  Ava, eye wòatsrɔ̃ agbledela siawo, eye wòatsɔ waingble la ade asi na ame bubuwo.” Esi wose nya sia la, wogblɔ be: “Madzɔ akpɔ o!” 17  Gake ekpɔ wo dũu hegblɔ be: “Ke nya sia si woŋlɔ ɖi be, ‘Kpe si xɔtulawo gbe la, esiae va zu dzogoedzikpe vevitɔ,’ la gɔme ɖe? 18  Ame sia ame si adze kpe ma dzi la, agbã gudugudu. Eye ame sia ame si dzi wòage adze la, atui memie.” 19  Eya ta agbalẽfialawo kple nunɔlawo ƒe tatɔwo nɔ didim be yewoƒe asi nasu edzi le gaƒoƒo ma tututu me, gake wonɔ vɔvɔ̃m na dukɔ la; elabena wokpɔe dze sii be yewo tae wòwɔ kpɔɖeŋu sia ɖo. 20  Eye esi woɖiae nyuie vɔ la, wodɔ ame aɖewo, hedo ŋugbe na wo le adza me, be woawɔ wo ɖokuiwo ame dzɔdzɔewo, ne woalée le eƒe nuƒo me, bene woatsɔe ade asi na dziɖuɖua kple nutomefia ƒe ŋusẽ. 21  Eye wobiae gblɔ be: “Nufiala, míenyae be èƒoa nu hefia nu nyateƒetɔe, eye be mèkpɔa ame ŋkume o, ke boŋ èfiaa Mawu ƒe mɔ la le nyateƒe nu: 22  Ðe se ɖe mɔ be míaxe adzɔ na Kaisaroa, alo se meɖe mɔ o?” 23  Gake ekpɔ woƒe ayemenuwɔwɔa, eye wògblɔ na wo be: 24  “Mitsɔ denario ɖeka fiam. Ame ka ƒe nɔnɔmetata kple nuŋɔŋlɔ ye le edzi?” Wogblɔ be: “Kaisaro tɔe.” 25  Egblɔ na wo be: “Ekema mitsɔ nu siwo nye Kaisaro tɔ la na Kaisaro, gake nu siwo nye Mawu tɔ la, na Mawu.” 26  Nyateƒee, womete ŋu lée le nya sia me le ameawo ŋkume o, gake esi eƒe ŋuɖoɖoa wɔ nuku na wo ta la, wozi ɖoɖoe. 27  Gake Zadukitɔwo, ame siwo gblɔna be tsitretsitsi aɖeke meli o la, dometɔ aɖewo va hebiae 28  gblɔ be: “Nufiala, Mose ŋlɔ ɖi na mí be: ‘Ne ame aɖe nɔviŋutsu si si srɔ̃ le ku, gake vi mele esi o la, ele be nɔvia naxɔ nyɔnua aɖe, eye wòado ƒome ɖi na nɔvia.’ 29  Edzɔ be nɔviŋutsu adre aɖewo nɔ anyi; eye gbãtɔa ɖe srɔ̃, gake medzi vi aɖeke hafi ku o. 30  Eya ta evelia 31  kple etɔ̃lia ɖe nyɔnua. Eye nenema wo ame adre la katã ɖee: gake womegblẽ viwo ɖi o, eye woku. 32  Mlɔeba la, nyɔnu la hã ku. 33  Eya ta le tsitretsitsia me ɖe, wo dometɔ ka srɔ̃e wòava zu? Elabena wo ame adre la katã ɖee kpɔ.” 34  Yesu gblɔ na wo be: “Nuɖoanyi sia me viwo ɖea srɔ̃, eye wotsɔa wo nana woɖena, 35  gake ame siwo wobu be, wodze be woƒe asi nasu nuɖoanyi ma kple tsitretsitsi tso ame kukuwo dome dzi ya meɖea srɔ̃ o, eye wometsɔa wo nana be woaɖe hã o. 36  Le nyateƒe me la, womagate ŋu aku hã o, elabena wole abe mawudɔlawo ene, eye wonye Mawu ƒe viwo le esi wonye tsitretsitsi ƒe viwo ta. 37  Gake be woafɔ ame kukuwo la, Mose hã gblɔe le ŋuve ŋuti nuŋlɔɖia me, esi wòyɔ Yehowa be ‘Abraham ƒe Mawu kple Isak ƒe Mawu kple Yakob ƒe Mawu.’ 38  Menye ame kukuwo ƒe Mawue wònye o, ke boŋ agbagbeawo tɔe, elabena wo katã wole agbe nɛ.” 39  Eye agbalẽfialawo dometɔ aɖewo ɖo eŋu gblɔ nɛ bena: “Nufiala, èƒo nu nyuie.” 40  Eye womegate ŋu do dzi bia nya ɖeka pɛ hãe o. 41  Eye wògblɔ na wo be: “Aleke wɔ wogblɔna be David vie Kristo la nye? 42  Elabena David ŋutɔ gblɔ le Psalmowo ƒe agbalẽa me be: ‘Yehowa gblɔ na nye Aƒetɔ be: “Bɔbɔ nɔ anyi ɖe nye nuɖusi me, 43  va se ɖe esime matsɔ wò futɔwo awɔ wò afɔɖodzinui.”’ 44  Eya ta David yɔe be ‘Aƒetɔ’; ekema aleke wɔ wònye via?” 45  Eye esi ameawo katã nɔ to ɖom la, egblɔ na nusrɔ̃lawo be: 46  “Mikpɔ mia ɖokui dzi nyuie le agbalẽfiala siwo dina be yewoanɔ awu ʋlayawo me anɔ tsatsam, eye wolɔ̃a gbedonamewo le asi me, kple ŋgɔgbezikpuiwo dzi nɔnɔ le ƒuƒoƒewo, kpakple bubunɔƒewo nɔnɔ le fiẽnuɖuƒewo la ŋu, 47  ame siwo baa ahosiwo hexɔa woƒe aƒewo le wo si, eye wowɔa ameŋkumenu nɔa gbe legbewo dom ɖa. Ame siawo ƒe ʋɔnudɔdrɔ̃ le sesẽ ge wu.”

Etenuŋɔŋlɔ