Luka 19:1-48

19  Azɔ eva ɖo Yerixo hetso eme yina.  Ke ŋutsu aɖe si ŋkɔe nye Zaxeo nɔ afi ma; enye nudzɔlawo ƒe amegã, eye wònye kesinɔtɔ.  Ke enɔ agbagba dzem be yeakpɔ ame si Yesu sia nye, gake mete ŋui o le ameha la ta, elabena ame kpui wònye.  Eya ta eƒu du dze ŋgɔ ɖalia gboti aɖe bene yeakpɔe, elabena esusɔ vie wòava to afi ma.  Azɔ esi Yesu ɖo teƒea la, efɔ mo dzi gblɔ nɛ be: “Zaxeo, wɔ kaba nàɖi, elabena ele be madze aƒewò me egbea.”  Tete wòwɔ kaba heɖi, eye wòxɔe kple dzidzɔ.  Gake esi wokpɔe la, wo katã woli liʋiliʋi gblɔ be: “Ame si nye nu vɔ̃ wɔla gbɔe wòyi be yeadze.”  Gake Zaxeo tsi tsitre gblɔ na Aƒetɔ la be: “Kpɔ ɖa! Aƒetɔ, matsɔ nye nunɔamesiwo ƒe afã ana ame dahewo, eye maɖo nu sia nu si metso ame aɖe nu xɔ le esi akpasesẽtɔe la teƒe zi ene.”  Eye Yesu gblɔ nɛ be: “Xɔxɔ va aƒe sia me egbea, elabena Abraham viŋutsue eya hã nye. 10  Elabena Amegbetɔvi la va, be yeadi ame siwo bu la ahaɖe wo.” 11  Esi wonɔ nya siawo sem la, egawɔ kpɔɖeŋu aɖe kpee na wo, elabena egogo Yerusalem, eye wonɔ susum be Mawu fiaɖuƒe la le dzedze ge woakpɔ enumake. 12  Eya ta egblɔ be: “Ame ŋkuta aɖe zɔ mɔ yi dukɔ didi aɖe me, be yeana yeƒe fiaɖuƒeŋusẽ nali ke ɖe ye si me, eye yeagatrɔ agbɔ. 13  Esi wòyɔ eƒe kluviwo dometɔ ewo vae la, etsɔ mina ewo na wo, eye wògblɔ na wo be: ‘Mitsɔe tsa asii va se ɖe esime matrɔ agbɔ.’ 14  Gake eƒe dukɔmeviwo lé fui, eye woɖo ame dɔdɔ aɖewo ɖe eyome be woagblɔ be, ‘Míedi be ame sia naɖu fia ɖe mía dzi o.’ 15  “Mlɔeba esi wòli ke eƒe fiaɖuŋusẽa hetrɔ gbɔ la, eɖe gbe be woayɔ kluvi siawo, siwo wòtsɔ klosalogaa na la avae, bene yeanya viɖe si wokpɔ to asitsatsa me. 16  Eye gbãtɔ va do hegblɔ be: ‘Aƒetɔ, wò mina la ɖe vi mina ewo ɖe edzi.’ 17  Eya ta egblɔ nɛ be: ‘Kluvi nyui, wòe wɔ dɔ kakaka! Esi nèɖee fia be yenye nyateƒetɔ le nu si le sue ŋutɔ me ta la, ɖu du ewo dzi.’ 18  Eye evelia va gblɔ be: ‘Aƒetɔ, wò mina la ɖe vi mina atɔ̃ ɖe edzi.’ 19  Egblɔ na ame sia hã be: ‘Wò hã ɖu du atɔ̃ dzi.’ 20  Ke bubu va gblɔ be: ‘Aƒetɔ, wò mina, si medzra ɖo ɖe avɔ aɖe me, lae nye esi. 21  Èkpɔea, menɔ vɔvɔ̃m na wò, elabena wò nya me sẽ; ètsɔa nu si mèda ɖi o, eye èŋea nu si mèƒã o.’ 22  Egblɔ nɛ be, ‘Wò ŋutɔ wò numenya metsɔ le ʋɔnu drɔ̃m wò, kluvi vɔ̃ɖi. Ènya be nye nya me sẽ, be metsɔa nu si nyemeda ɖi o, eye be meŋea nu si nyemeƒã o, menye nenema gblɔm nèle oa? 23  Ekema nu ka tae mètsɔ nye klosaloga la de gadzraɖoƒe o? Eye ale le nye vava me la, maxɔe kple eŋuti viɖe.’ 24  “Tete wògblɔ na ame siwo nɔ tsitre ɖe afi ma la be: ‘Mixɔ mina la le esi, eye mitsɔe na ame si si mina ewo le la.’ 25  Gake wogblɔ nɛ be, ‘Aƒetɔ, mina ewo le esi xoxo ɖe!’— 26  ‘Mele egblɔm na mi be: Ame sia ame si si nu le la, woatsɔ geɖe akpee nɛ; gake ame si si nu mele o la, woaxɔ nu si le esi la kura gɔ̃ hã. 27  Gawu la, nye futɔ siawo siwo medi be maɖu fia ɖe yewo dzi o la, mikplɔ wo vae, eye miwu wo le ŋkunyeme.’” 28  Ke esi wògblɔ nya siawo vɔ la, edze ŋgɔ ɖo ta Yerusalem. 29  Eye esi wògogo Betfage kple Betania le to si woyɔna be Amito la dzi la, edɔ nusrɔ̃laawo dometɔ eve 30  gblɔ be: “Miyi kɔƒe si kpɔm miele le mia ŋgɔ la me, eye ne mieɖo eme la, miakpɔ tedzivi aɖe le ka me, si dzi ame aɖeke menɔ kpɔ o. Miɖe kae, eye mikplɔe vae. 31  Eye ne ame aɖe bia mi be, ‘Nu ka tae miele ka ɖemee?’ hã la, ele be miagblɔ ale: ‘Aƒetɔ la le ehiãm.’” 32  Eya ta ame siwo wòdɔ la yi, eye wokpɔe abe ale si wògblɔe na wo ene. 33  Gake esi wonɔ ka ɖem tedzivia la, ame siwo tɔ wònye la bia wo be: “Nu ka tae miele ka ɖem tedzivi la?” 34  Woɖo eŋu be: “Aƒetɔ lae le ehiãm.” 35  Eye wokplɔe yi na Yesu, eye wotsɔ woƒe awudziwuiwo ɖo ɖe tedzivia dzi, eye wokɔ Yesu ɖo edzi. 36  Esi wòva yina la, wonɔ woƒe awudziwuiwo ɖom ɖe mɔa dzi. 37  Esi wòɖi tso Amitoa dzi hegogo mɔ si le toa ƒe abu nu teti ko la, nusrɔ̃lawo ƒe ha blibo la katã te dzidzɔkpɔkpɔ henɔ Mawu kafum kple ɣli le ŋusẽdɔ siwo katã wokpɔ la ŋuti, 38  nɔ gbɔgblɔm be: “Woayra Ame si gbɔna abe Fia la ene le Yehowa ƒe ŋkɔ me! Ŋutifafa nanɔ dziƒo, eye ŋutikɔkɔe nanɔ dziƒo boo!” 39  Gake Farisitɔ aɖewo siwo le ameha la dome gblɔ nɛ be: “Nufiala, ka mo na wò nusrɔ̃lawo.” 40  Ke eɖo eŋu gblɔ be: “Mele egblɔm na mi be: Ne ame siawo zi kpi la, kpewo ado ɣli.” 41  Eye esi wògogo afi ma la, ekpɔ dua ta ɖa, eye wòfa avi ɖe eŋu, 42  gblɔ be: “Wò, ɛ̃ wò, ne ɖe le ŋkeke sia me nènya nu siwo hea ŋutifafa vanɛ la—gake fifia, woɣla wo ɖe wò ŋkuwo. 43  Elabena ŋkekewo li gbɔna dziwò, esime wò futɔwo atsɔ tsyotiwo aƒu kpo ƒo xlã wò godoo va kpe, eye woaɖe to ɖe wò ahana nàxaxa le goawo katã me, 44  eye woatsɔ mia kple viwò siwo le mewò la axlã ɖe anyi, eye womagblẽ kpe aɖeke ɖe kpe dzi le mewò o, elabena mète ŋu de dzesi ɣeyiɣi si dzi wova lé ŋku ɖe ŋuwò la o.” 45  Eye wòge ɖe gbedoxɔa me, eye wòde asi ame siwo nɔ nu dzram la nyanya me do goe, 46  gblɔ na wo be: “Woŋlɔe ɖi be: ‘Eye nye aƒe la anye gbedoɖaƒe,’ ke miawo ya mietsɔe wɔ adzodalawo ƒe doe.” 47  Eye wòyi edzi nɔ nu fiam le gbedoxɔa me gbe sia gbe. Gake nunɔlawo ƒe tatɔwo kple agbalẽfialawo kpakple dukɔa ƒe ame ŋkutawo nɔ mɔnu dim be yewoawui; 48  gake womekpɔ mɔ nyuitɔ si dzi woato o, elabena dukɔ blibo la katã ku ɖe eŋu, be yewoaɖo toe.

Etenuŋɔŋlɔ