Luka 15:1-32

15  Ke nudzɔlawo kple nu vɔ̃ wɔlawo katã vaa egbɔ nɔa to ɖomee.  Eya ta Farisitɔwo kple agbalẽfialawo siaa yi edzi nɔ liʋiliʋi lim le eŋu be: “Ame sia xɔa nu vɔ̃ wɔlawo heɖua nu kpli wo.”  Eye wòwɔ kpɔɖeŋu sia na wo be:  “Mia dometɔ ka sie alẽ alafa ɖeka le, eye ne wo dometɔ ɖeka bu la, magblẽ blaasieke vɔ asieke la ɖe gbedadaƒo, eye wòayi aɖadi esi bu la va se ɖe esime wòakpɔe oa?  Eye ne ekpɔe la, akɔe ɖe eƒe abɔta, eye wòakpɔ dzidzɔ.  Eye ne eɖo aƒe me la, ayɔ exɔlɔ̃wo kple eƒe aƒelikawo aƒo ƒu, agblɔ na wo be: ‘Mikpɔ dzidzɔ kplim, elabena mekpɔ nye alẽ si bu la.’  Mele egblɔm na mi be, nenema kee woakpɔ dzidzɔ geɖe le dziƒo ɖe nu vɔ̃ wɔla ɖeka si trɔ dzi me ŋu, wu ɖe ame dzɔdzɔe blaasieke vɔ asieke siwo mehiã dzimetɔtrɔ o la ŋuti.  “Alo nyɔnu ka sie draxma gaku ewo le, eye ne ebu draxma gaku ɖeka la, mesia akaɖi, eye wòkplɔa eƒe aƒe me hedinɛ nyuie va se ɖe esime wòkpɔe oa?  Eye ne ekpɔe la, eyɔa nyɔnu siwo nye exɔlɔ̃wo kple eƒe aƒelikawo ƒoa ƒu, gblɔna na wo be, ‘Mikpɔ dzidzɔ kplim, elabena mekpɔ nye draxma gaku si bu la.’ 10  Mele egblɔm na mi be nenema kee mawudɔlawo kpɔa dzidzɔ le nu vɔ̃ wɔla ɖeka si trɔ dzi me la ta.” 11  Azɔ egblɔ be: “Viŋutsu eve nɔ ŋutsu aɖe si. 12  Eye wo dome ɖevitɔ la gblɔ na fofoa be: ‘Fofo, tsɔ nunɔamesiawo ƒe akpa si nye tɔnye la nam.’ Eya ta ema eƒe agbemenunɔamesiwo na wo. 13  Emegbe mede ŋkeke geɖe aɖeke o la, ɖevitɔ la ƒo nuwo katã nu ƒu, eye wòzɔ mɔ yi dukɔ didi aɖe me, eye wògblẽ eƒe nunɔamesia dome le afi ma to agbe baɖa nɔnɔ me. 14  Esi wòzã nu sia nu vɔ la, dɔ gã aɖe to le dukɔ ma me godoo, eye hiã de asi etutu me. 15  Eyi ɖatsɔ eɖokui de asi na dukɔ ma me tɔ aɖe kura gɔ̃ hã, eye wòdɔe ɖe eƒe agble me, be wòakplɔ hawo. 16  Eye wòdina be woatsɔ hawo ƒe nuɖuɖu ana ye, gake ame aɖeke menaa nanekee o. 17  “Esi wònyɔ le eɖokui me la, egblɔ be: ‘Nuɖuɖu bɔ ɖe fofonye ƒe apatɔwo kura gɔ̃ hã si, evɔ nye ya mele afi sia le kukum le dɔwuame ta! 18  Matso ayi fofonye gbɔ agblɔ nɛ be: “Fofo, mewɔ nu vɔ̃ ɖe dziƒo ŋu kple ŋutiwò. 19  Nyemegadze be nàyɔm be viwòŋutsu o. Wɔm abe wò apatɔwo dometɔ ɖeka ene.”’ 20  Eya ta etso, eye wòyi fofoa gbɔ. Esi wònɔ mɔ dzi gbɔna ɖaa la, fofoa ƒe ŋku klii, eye eƒe nu wɔ nublanui nɛ, eye wòƒu du yi ɖadze eƒe kɔ dzi hegbugbɔ nu nɛ lɔlɔ̃tɔe. 21  Eye viŋutsu la gblɔ nɛ be, ‘Fofo, mewɔ nu vɔ̃ ɖe dziƒo ŋu kple ŋutiwò. Nyemegadze be nàyɔm be viwòŋutsu o. Wɔm abe wò apatɔwo dometɔ ɖeka ene.’ 22  Gake fofoa gblɔ na eƒe kluviwo be: ‘Netsɔ! Mitsɔ awu ʋlaya aɖe vae, nyuitɔ kekeake, eye midoe nɛ, eye mide asigɛ asi nɛ, eye miado afɔkpa ɖe afɔ nɛ. 23  Eye mikplɔ nyitsui dami la vae, miwui, eye mina míaɖu nu ado dzidzɔ na mía ɖokui, 24  elabena vinyeŋutsu sia ku, eye wògagbɔ agbe; ebu, eye wogakpɔe.’ Eye wode asi dzidzɔkpɔkpɔ me. 25  “Ke viaŋutsu tsitsitɔ nɔ agble me; eye esi wòtrɔ gbɔna hegogo aƒea la, ese haƒoƒo kple ɣeɖuɖu. 26  Eya ta eyɔ dɔlawo dometɔ ɖeka hebia nu si nɔ edzi yim lae. 27  Egblɔ nɛ be: ‘Nɔviwò va, eye fofowò wu nyitsui dami la, elabena egakpɔe le lãmesẽ me.’ 28  Ke edo dziku vevie, eye medi be yeayi aƒea me o. Eye fofoa do go va hede asi kukuɖeɖe me nɛ vevie. 29  Eɖo eŋu na fofoa be: ‘Ƒe geɖee nye esia mele kluvidɔ wɔm na wò, eye nyemeda wò sewo dzi zi ɖeka teti hã kpɔ o, evɔ mèna gbɔ̃vi ɖekam kpɔ, be mía kple xɔ̃nyewo míado dzidzɔ na mía ɖokuiwo o. 30  Gake esi viwòŋutsu sia, si gblẽ wò agbemenunɔamesiwo dome kple gbolowo, va ɖo ko la, èwu nyitsui dami la nɛ.’ 31  Eye wògblɔ nɛ be: ‘Vinye, èle gbɔnye ɣesiaɣi, eye nu siwo katã nye tɔnye la, tɔwòe wonye; 32  gake ɖeko wòle be míado dzidzɔ na mía ɖokuiwo ahatso aseye, elabena nɔviwòŋutsu sia ku, eye wògagbɔ agbe, eye ebu, gake wogakpɔe.’”

Etenuŋɔŋlɔ