Luka 10:1-42

10  Le nu siawo megbe la, Aƒetɔ la tia ame blaadre bubu, eye wòdɔ wo eveveve ɖo ɖe eŋgɔ ɖe du kple teƒe ɖe sia ɖe siwo eya ŋutɔ gbɔna toto ge la me.  Eye wòde asi gbɔgblɔ me na wo be: “Nyateƒee, nuŋeŋe la sɔ gbɔ, gake dɔwɔlawo ya mesɔ gbɔ o. Eya ta miɖe kuku na nuŋeŋe ƒe Aƒetɔ la be wòaɖo dɔwɔlawo ɖe eƒe nuŋeŋe la me.  Miheyi. Kpɔ ɖa! Mele mia dɔm abe alẽviwo ene ɖo ɖe amegãxiwo dome.  Migatsɔ gakotoku, alo nuɖuɖukotoku, alo afɔkpa o, eye migagblẽ ɣeyiɣi le mɔ dzi anɔ gbe dom na ame aɖeke o.  Afi sia afi si miege ɖe aƒe aɖe me le la, gbã la, migblɔ be, ‘Ŋutifafa na aƒe sia.’  Eye ne ŋutifafalɔ̃la aɖe le afi ma la, miaƒe ŋutifafa anɔ edzi. Gake ne ɖeke meli o la, ekema agbugbɔ ava na mi.  Eya ta minɔ aƒe ma me, miaɖu nu si wotsɔ na mi, eye miano nu si wona mi, elabena dɔwɔla dze na eƒe fetu. Miganɔ ʋuʋum tso aƒe me yi aƒe me o.  “Eye ne miege ɖe du aɖe me, eye woxɔ mi la, miɖu nu si woatsɔ aɖo mia kɔme,  eye mida dɔ na dɔnɔ siwo le dua me la, eye miyi edzi mianɔ gbɔgblɔm na wo be, ‘Mawu fiaɖuƒe la gogo mi.’ 10  Gake afi sia afi si miege ɖe du aɖe me le, eye womexɔ mi o la, miyi ɖe dua ƒe ablɔwo me, eye miagblɔ be, 11  ‘Míele ʋuʋudedi si lé ɖe míaƒe afɔwo ŋu le miaƒe dua me la kura gɔ̃ hã ʋuʋum ɖi na mi. Ke hã, esia nenɔ susu me na mi be, Mawu fiaɖuƒe la gogo.’ 12  Mele egblɔm na mi be, anɔ bɔbɔe na Sodom le ŋkeke ma dzi wu ale si wòanɔ na du ma. 13  “Baba na wò, Korazin! Baba na wò, Betsaida! Elabena ne ɖe wowɔ ŋusẽdɔ siwo wowɔ le mewò la le Tiro kple Zidon la, anye ne wotrɔ dzi me gbe aɖe gbe ke hebɔbɔ nɔ anyi ɖe akpanya kple afi me. 14  Eya ta anɔ bɔbɔe na Tiro kple Zidon le ʋɔnudɔdrɔ̃ la me wu mi. 15  Ke wò, Kapernaum, ɖe wòanye be ɖewohĩ woado wò ɖe dzi yi ɖatɔ dziƒoa? Keke Hades* kee nàva do ɖo! 16  “Ame si ɖoa to mi la ɖoa to nye hã. Eye ame si doa vlo mi la doa vlo nye hã. Eye ame si doa vlom la doa vlo ame si dɔm ɖa la hã.” 17  Eye ame blaadreawo trɔ gbɔ kple dzidzɔ va gblɔ be: “Aƒetɔ, gbɔgbɔ vɔ̃wo kura gɔ̃ hã bɔbɔ wo ɖokuiwo na mí esi míezã wò ŋkɔa.” 18  Eye wògblɔ na wo be: “Mekpɔ be Satana te gege xoxo abe dzikedzo ene tso dziƒo. 19  Kpɔ ɖa! Mena ŋusẽ mi be miaɖo afɔ dawo kple dziɖegbewo* dzi, eye be miaɖu futɔ la ƒe ŋusẽ katã dzi, eye naneke mele nuvevi aɖeke wɔ ge mi o. 20  Ke hã, migakpɔ dzidzɔ be gbɔgbɔawo bɔbɔ wo ɖokuiwo na mi o, ke boŋ mikpɔ dzidzɔ le esi woŋlɔ miaƒe ŋkɔwo ɖe dziƒowo ta.” 21  Le gaƒoƒo ma tututu dzi la, etso aseye ale gbegbe le gbɔgbɔ kɔkɔe la me hegblɔ be: “Fofo, dziƒo kple anyigba ƒe Aƒetɔ, mekafu wò le dutoƒo, elabena èɣla nu siawo ɖe nunyalawo kple tagbɔɖaɖɛtɔwo vevie, eye nèɖe wo fia vidzĩwo. Oo Fofo, nyateƒee, elabena edze ŋuwò be yeawɔe nenema. 22  Fofonye tsɔ nuwo katã de asi nam, eye ame si Vi la nye la, ame aɖeke menyae o, negbe Fofo la ko; eye ame si Fofo la nye la, ame aɖeke menyae o, negbe Vi la ko, kple ame si Vi la lɔ̃ be yeaɖee afia ko.” 23  Eye wòtrɔ ɖe nusrɔ̃lawo ɖeɖe ŋu gblɔ be: “Dzidzɔtɔwoe nye ŋku siwo le nu siwo kpɔm miele la kpɔm. 24  Elabena mele egblɔm na mi be: Nyagblɔɖila kple fia geɖewo di vevie be yewoakpɔ nu siwo kpɔm miele la, gake womekpɔ wo o, eye be yewoase nu siwo sem miele la, gake womese wo o.” 25  Eye kpɔ ɖa! Ŋutsu aɖe si nya Sea nyuie la tso be yeadoe kpɔ, eye wògblɔ be: “Nufiala, nu ka wɔwɔe ana manyi agbe mavɔ la dome?” 26  Egblɔ nɛ be: “Nu kae woŋlɔ ɖe Se la me? Aleke nèse egɔmee?” 27  Eɖo eŋu nɛ be: “‘Ele be nàlɔ̃ Yehowa wò Mawu kple wò dzi blibo kple wò luʋɔ blibo kple wò ŋusẽ blibo kpakple wò tamesusu blibo,’ kple ‘hawòvi abe wò ŋutɔ ɖokuiwò ene.’” 28  Egblɔ nɛ be: “Èɖo eŋu nyuie; ‘yi edzi nànɔ esia wɔm, eye àkpɔ agbe.’” 29  Gake esi ŋutsua di be yeaɖee afia be yele dzɔdzɔe ta la, egblɔ na Yesu be: “Ame ka tututue nye hanyevi?” 30  Yesu ɖo eŋu be: “Ame aɖe ɖi abu tso Yerusalem yina Yerixo, eye wòdze adzodalawo si me, eye woɖe awu kple nu sia nu le eŋu heƒoe, eye wodzo le egbɔ gblẽe ɖi wòku afã kple afã. 31  Ke nudogoɖenunutɔe la, nunɔla aɖe hã ɖi abu gbɔna le mɔ ma dzi, gake esi wòkpɔe la, edze to mɔa ƒe akpa kemɛ dzo. 32  Nenema kee Lewitɔ aɖe hã, esi wòɖi abu va ɖo teƒea, eye wòkpɔe la, edze to mɔa ƒe akpa kemɛ dzo. 33  Ke Samariatɔ aɖe si nɔ mɔa zɔm la va ke ɖe eŋu, eye esi wòkpɔe la, eƒe nu wɔ nublanui nɛ. 34  Eye wòte ɖe eŋu, kɔ ami kple wain ɖe eƒe abiawo me hebla wo nɛ. Azɔ ekɔ amea ɖe ye ŋutɔ ƒe lã dzi hekplɔe yi amedzrodzeƒe sue aɖe, eye wòkpɔ edzi. 35  Esi ŋu ke la, etsɔ denario eve na amedzrodzeƒea dzi kpɔla hegblɔ be, ‘Kpɔ edzi, eye nu si nàgblẽ kpee la, maxee na wò ne metrɔ va afi sia.’ 36  Ame etɔ̃ siawo dometɔ kae nèsusu be ewɔ eɖokui ame si dze adzodalawo si me la havii?” 37  Egblɔ be: “Ame si kpɔ nublanui nɛ lae.” Azɔ Yesu gblɔ nɛ be: “Heyi, eye wò hã nànɔ wɔwɔm nenema ke.” 38  Ke esi wonɔ woƒe mɔzɔzɔa dzi la, eyi kɔƒe aɖe me. Nyɔnu aɖe si ŋkɔe nye Marta la xɔe amedzroe ɖe eƒe aƒe me le afi sia. 39  Nɔvinyɔnu aɖe le nyɔnu sia si, si ŋkɔe nye Maria, gake eya nɔ anyi ɖe Aƒetɔ la ƒe afɔ nu henɔ to ɖom eƒe nya la. 40  Gake nu geɖewo wɔwɔ xɔ susu me na Marta ya. Eya ta ete ɖe eŋu gblɔ be: “Aƒetɔ, mètsɔ ɖeke le eme be nɔvinyea gblẽ nuwo katã gbɔ kpɔkpɔ ɖe nye ɖeka dzinye oa? Eya ta gblɔe nɛ be wòava kpe ɖe ŋunye.” 41  Aƒetɔ la ɖo eŋu nɛ gblɔ bena: “Marta, Marta, ètsi dzi hele fu ɖem na ɖokuiwò le nu geɖewo ŋuti. 42  Gake nu ʋɛ aɖewo koe hiã, alo ɖeka pɛ ko. Maria ya tia nyuia gome, eye womele exɔ ge le esi o.”

Etenuŋɔŋlɔ

Kpɔ Nya Bubuwo, Akpa 8 lia.
Alo “akeklewo.”