Luka 1:1-80

1  Esi wònye ame geɖewo te ŋu ŋlɔ nu tso nudzɔdzɔ ŋutɔŋutɔ siwo dzi woxɔ se bliboe le mía dome ŋu,  abe ale si ko ame siwo nɔ anyi le gɔmedzedzea me, eye wokpɔ eteƒe hezu nya la ƒe dɔtsɔlawo, tsɔe de asi na míi ene ta la,  nye hã meku nuwo katã me tsitotsito tso gɔmedzedzea me, eya ta meɖoe kplikpaa be maŋlɔ wo ɖe ɖoɖo nu aɖo ɖe wò, bubutɔ Teofilo,  ale be nàkpɔ kpeɖodzi le nu siwo wofia wò la ƒe nyateƒenyenye ŋu.  Le Yudea fia Herodes ƒe ŋkekewo me la, nunɔla aɖe nɔ anyi, si ŋkɔe nye Zaxariya tso Abiya ƒe hatsotso la me, eye wòɖe Aron vinyɔnuwo dometɔ ɖeka, si ŋkɔe nye Elisabet.  Woa kple evea siaa wonye ame dzɔdzɔewo le Mawu ŋkume, elabena wozɔna fɔmaɖimaɖitɔe le Yehowa ƒe sewo kple Se la ƒe nudidiwo katã nu.  Gake vi aɖeke menɔ wo si o, elabena Elisabet tsi ko, eye woa kple evea siaa woxɔ ƒe geɖe.  Ke esi wòɖo woƒe ha la dzi, eye wònɔ nunɔladɔ wɔm le Mawu ŋkume,  abe ale si wòle le nunɔlawo ƒe ɖoɖoa nu ene la, eɖo edzi be wòayi Yehowa ƒe gbedoxɔa me ado dzudzɔ ʋeʋĩ; 10  eye ameha blibo la katã nɔ gbe dom ɖa le xexe le gaƒoƒo si me wònɔ dzudzɔa dom. 11  Yehowa ƒe dɔla ɖe eɖokui fiae, le tsitre ɖe dzudzɔdomlekpuia ƒe ɖusi me. 12  Gake esi Zaxariya kpɔe la, eɖi vo, eye vɔvɔ̃ dze edzi. 13  Ke hã, mawudɔla la gblɔ nɛ be: “Mègavɔ̃ o, Zaxariya, elabena wose wò kokoƒoƒo la, eye srɔ̃wò Elisabet adzi ŋutsuvi aɖe na wò, eye nàyɔ eŋkɔ be Yohanes. 14  Eye anye dzidzɔ kple aseyetsotso na wò, eye ame geɖewo akpɔ dzidzɔ le eƒe dzidzi ŋu; 15  elabena anye gã le Yehowa ŋkume. Gake mele be wòano wain alo aha sesẽ aɖeke gbeɖe o, eye gbɔgbɔ kɔkɔe ayɔe fũu tso keke dadaa ƒe dɔ me ke; 16  eye atrɔ Israel vi geɖewo ɖe Yehowa, woƒe Mawu la ŋu. 17  Eye atsɔ Eliya ƒe gbɔgbɔ kple ŋusẽ adze eŋgɔ, be wòatrɔ fofowo ƒe dziwo ɖe viwo ŋu, kple ame maɖotowo ɖe ame dzɔdzɔewo ƒe nunya ŋu, be wòadzra dukɔ si su te la ɖo ɖi na Yehowa.” 18  Eye Zaxariya gblɔ na mawudɔla la be: “Aleke mawɔ aka ɖe nu sia dzi? Elabena meku amegã, eye srɔ̃nye hã xɔ ƒe geɖe.” 19  Mawudɔla la ɖo eŋu nɛ be: “Nyee nye Gabriel, ame si tsia tsitre ɖe Mawu ŋkume, eye wodɔm be mava ƒo nu kpli wò, eye magblɔ nu siawo ŋu nya nyui la na wò. 20  Gake kpɔ ɖa! Àzu mumu, eye màgate ŋu aƒo nu o, va se ɖe ŋkeke si dzi nu siawo adzɔ, elabena mèxɔ nye nya, siwo ava eme le woƒe ɣeyiɣi ɖoɖi dzi la, dzi se o.” 21  Ɣemaɣi katã la, ameha la nɔ Zaxariya lalam, eye ewɔ nuku na wo be etsi gbedoxɔa me nenema gbegbe. 22  Gake esi wòdo go la, mete ŋu ƒo nu na wo o, eye wokpɔe be ekpɔ nukunu aɖe le gbedoxɔa me teti koe nye ema; eye wònɔ dzesiwo wɔm na wo, gake mete ŋu nɔ nu ƒom o. 23  Ke esi eƒe dutoƒo subɔsubɔdɔa ƒe ŋkekeawo wu enu la, edzo yi eƒe aƒe me. 24  Ke le ŋkeke siawo megbe la, srɔ̃a Elisabet fɔ fu; eye wòɣla eɖokui ɣleti atɔ̃ sɔŋ, gblɔ be: 25  “Aleae Yehowa wɔ nu ɖe ŋunye le ŋkeke siawo me, esi wòtrɔ susu ɖe ŋunye be yeaɖe nye ŋukpe ɖa le amewo dome.” 26  Le eƒe ɣleti adelia me la, Mawu dɔ eƒe dɔla Gabriel ɖe Galilea du si woyɔna be Nazaret la me, 27  ɖe ɖetugbui aɖe, si menya ŋutsu o, si ŋugbe wodo na ŋutsu aɖe si ŋkɔe nye Yosef tso David ƒe aƒe me la gbɔ; eye ɖetugbui la ŋkɔe nye Maria. 28  Eye esi mawudɔla la ge ɖe eme le egbɔ la, egblɔ be: “Medo gbe na wò, wò ame si nu wove ŋutɔ, Yehowa li kpli wò.” 29  Ke eɖi vo ŋutɔ le nya la ŋuti, eye wòte eɖokui biabia be gbedoname ka ƒomevie esia anya nye hã. 30  Eya ta mawudɔla la gblɔ nɛ be: “Mègavɔ̃ o, Maria, elabena èkpɔ amenuveve le Mawu gbɔ; 31  eye kpɔ ɖa! Èle fu fɔ ge, eye àdzi ŋutsuvi, eye nàyɔ eŋkɔ be Yesu. 32  Ame sia anye gã, eye woayɔe be Dziƒoʋĩtɔ la ƒe Vi; eye Yehowa Mawu atsɔ fofoa David ƒe fiazikpui la anae, 33  eye wòaɖu fia ɖe Yakob ƒe aƒe la dzi tegbee, eye nuwuwu manɔe na eƒe fiaɖuƒe la o.” 34  Gake Maria gblɔ na mawudɔla la be: “Aleke nu sia adzɔe, esi wònye nyemedɔ kple ŋutsu aɖeke kpɔ o?” 35  Mawudɔla la ɖo eŋu nɛ be: “Gbɔgbɔ kɔkɔe ava dziwò, eye Dziƒoʋĩtɔ la ƒe ŋusẽ ado vɔvɔli ɖe dziwò. Le esia ta, woayɔ vi si nàdzi la be kɔkɔetɔ, Mawu ƒe Vi. 36  Eye kpɔ ɖa! Elisabet, wò ƒometɔ, hã fɔ ŋutsuvi aɖe ƒe fu le eƒe nyagãkuku me, eye esiae nye ɣleti adelia na eya, ame si woyɔna be nyɔnu konɔ; 37  elabena Mawu magblɔ nya aɖeke wòado kpo emevava o.” 38  Eye Maria gblɔ be: “Kpɔ ɖa! Yehowa ƒe kluvinyɔnuvi menye! Neva eme nam le wò nya la nu.” Tete mawudɔla la dzo le egbɔ. 39  Eya ta Maria tso le ŋkeke mawo me, eye wòɖe abla yi Yuda du aɖe si le tonuto me la me, 40  eye wòge ɖe Zaxariya ƒe aƒe me, eye wòdo gbe na Elisabet. 41  Ke esi Elisabet se Maria ƒe gbedonamea la, vidzĩ si le eƒe dɔ me la ti kpo; eye gbɔgbɔ kɔkɔe yɔ Elisabet fũu, 42  eye wòdo ɣli kple gbe sesẽ gblɔ be: “Woayra wò le nyɔnuwo dome, eye woayra wò dɔmevi la! 43  Eye aleke wòdzɔe be mɔnukpɔkpɔ sia su asinye, be nye Aƒetɔ dada nava gbɔnye? 44  Elabena kpɔ ɖa! Esi wò gbedonamea ɖi ɖe nye to me la, vidzĩ si le nye dɔ me la ti kpo kple dzidzɔ gã aɖe. 45  Dzidzɔtɔe nye nyɔnu si xɔe se hã, elabena nya siwo katã tso Yehowa gbɔ, si wogblɔ nɛ la, ava eme bliboe.” 46  Eye Maria gblɔ be: “Nye luʋɔ le Yehowa dom ɖe dzi, 47  eye nye gbɔgbɔ mate ŋu adzudzɔ aseyetsotso ɖe Mawu, nye Xɔla la, ŋu o; 48  elabena ekpɔ eƒe kluvinyɔnuvi ƒe nu maɖinu nyenye. Elabena kpɔ ɖa! Tso fifia dzi la, dzidzimewo katã ayɔm be dzidzɔtɔ; 49  elabena Ŋusẽtɔ la wɔ nu dzɔtsuwo nam, eye kɔkɔe nye eƒe ŋkɔ; 50  eye eƒe nublanuikpɔkpɔ nɔa ame siwo vɔ̃nɛ la dzi tso dzidzime yi dzidzime. 51  Etsɔ eƒe abɔ wɔ nu ŋusẽtɔe, ekaka ame siwo doa wo ɖokuiwo ɖe dzi le woƒe dzimesusuwo me la hlẽ. 52  Ebɔbɔ ŋusẽtɔwo ɖe anyi tso fiazikpuiwo dzi, eye wòdo ame tsɛwo ɖe dzi; 53  etsɔ nu nyuiwo ɖi ƒoe na dɔwuitɔwo taŋ, eye wòdo mɔ kesinɔtɔwo asi ƒuƒlui. 54  Ekpe ɖe eƒe dɔla Israel ŋu, be wòaɖo ŋku nublanuikpɔkpɔ dzi, 55  abe ale si wògblɔe na mía tɔgbuiwo, na Abraham kple eƒe dzidzimevi la ene, yi mavɔmavɔ me.” 56  Eye Maria nɔ egbɔ anɔ ɣleti etɔ̃, eye emegbe wòtrɔ yi ye ŋutɔ ƒe aƒe me. 57  Azɔ ɣeyiɣi de na Elisabet be wòadzi vi, eye wòdzi ŋutsuvi. 58  Eye eƒe aƒelikawo kple eƒe ƒometɔwo se be Yehowa kpɔ nublanui nɛ geɖe ŋutɔ, eye wote dzidzɔkpɔkpɔ kplii. 59  Eye le ŋkeke enyiagbe la, wova be woatso aʋa na ɖevi sue la, eye wodi be woatsɔ fofoa ƒe ŋkɔ Zaxariya nɛ. 60  Gake dadaa ɖo eŋu be: “Gbeɖe! Ke boŋ woayɔe be Yohanes.” 61  Tete wogblɔ nɛ be: “Wò ƒometɔ aɖeke metɔ ŋkɔ sia kpɔ o ɖe!” 62  Eye wowɔ dzesi na fofoa biae ale si wòdi be woayɔe. 63  Eye wòbia be woatsɔ nuŋlɔkpe na ye, eye wòŋlɔ ɖe edzi be: “Yohanes ye nye eƒe ŋkɔ.” Esia wɔ mo yaa na wo katã. 64  Enumake eƒe nu ʋu, eye eƒe aɖeka ɖɔ ɖo, eye wòte nuƒoƒo henɔ Mawu kafum. 65  Eye vɔvɔ̃ dze woƒe aƒelikawo katã dzi; eye amewo te nuƒoƒo tso nu siawo ŋu le Yudea tonutoa katã me godoo, 66  eye ame siwo katã see la lée ɖe woƒe dzi me, nɔ gbɔgblɔm be: “Nu ka tututue ɖevi sue sia ava nye?” Elabena Yehowa ƒe asi nɔ ɖevia dzi vavã. 67  Eye gbɔgbɔ kɔkɔe yɔ fofoa Zaxariya fũu, eye wògblɔ nya ɖi be: 68  “Woayra Yehowa, Israel ƒe Mawu la, elabena etrɔ eƒe susu ɖe eƒe amewo ŋu, eye wòɖe wo. 69  Eye wòdo xɔxɔ ƒe dzo aɖe ɖe dzi na mí le eƒe dɔla David ƒe aƒe me, 70  abe ale si wòto eƒe nyagblɔɖila kɔkɔe siwo nɔ anyi le blema dzi gblɔ 71  ɖeɖe tso míaƒe futɔwo kple ame siwo katã le fu lém mí si me la ŋu nya ene; 72  be yeakpɔ nublanui le mía tɔgbuiwo ta, eye yeaɖo ŋku yeƒe nubabla kɔkɔe la dzi, 73  atam si wòka na mía tɔgbui Abraham, 74  be ne yeɖe mí tso míaƒe futɔwo si me vɔ la, yeana mɔnukpɔkpɔ mí be míawɔ subɔsubɔdɔ kɔkɔe na ye vɔvɔ̃manɔmee, 75  le nuteƒewɔwɔ kple dzɔdzɔenyenye me le eŋkume le míaƒe ŋkekewo katã me. 76  Ke wò la, ɖevi sue, woayɔ wò be Dziƒoʋĩtɔ la ƒe nyagblɔɖila, elabena àdze Yehowa ŋgɔ, be nàdzra eƒe mɔwo dzi ɖo, 77  be nàna xɔxɔ ŋuti sidzedze eƒe amewo to woƒe nu vɔ̃wo tsɔtsɔ ke me, 78  le mía Mawu ƒe dɔmetɔtrɔ gã la ta. Le dɔmetɔtrɔ sia ta la, míakpɔ kekeli tso dziƒo abe ale si ŋu kena ene, 79  be wòana kekeli ame siwo bɔbɔ nɔ viviti me kple ku ƒe vɔvɔli me, be wòafia mɔ míaƒe afɔwo dzidzedzetɔe le ŋutifafa ƒe mɔ dzi.” 80  Eye ɖevi sue la yi edzi nɔ tsitsim henɔ ŋu sẽm le gbɔgbɔ me, eye wòyi edzi nɔ gbedadaƒo va se ɖe ŋkeke si dzi wòɖe eɖokui fia Israel le dutoƒo.

Etenuŋɔŋlɔ