Romatɔwo 6:1-23

6  Ekema nya kae míagblɔ? Ðe míayi edzi anɔ nu vɔ̃ me, bene amenuveve la nasɔ gbɔ ɖe edzia?  Ema negadzɔ gbeɖe o! Esi wònye míeku le nu vɔ̃ gome la, aleke wɔ míagakpɔtɔ anɔ agbe le eme?  Alo ɖe mienyae be mí ame siwo katã wonyrɔ ɖe Kristo Yesu me la, wonyrɔ mí ɖe eƒe ku me oa?  Eya ŋuti woɖi mí kpakplii to mía nyɔnyrɔ ɖe eƒe ku la me dzi, bene ale si ko wofɔ Kristo ɖe tsitre tso ame kukuwo dome to Fofo la ƒe ŋutikɔkɔe me la, míawo hã míazɔ nenema ke le agbe ƒe nɔnɔme yeye me.  Elabena ne míewɔ ɖeka kplii le ku si sɔ kple etɔ me la, ekema míawɔ ɖeka kplii hã godoo le tsitretsitsi si sɔ kple etɔ la me;  elabena míenyae be wohe míaƒe amenyenye xoxo la ɖe ati ŋuti kpe ɖe eŋu, bene míaƒe nu vɔ̃ ŋutilã la nagaɖu mía dzi azɔ o, bene míagayi edzi anye nu vɔ̃ ƒe kluviwo o.  Elabena ame si ku la, woɖee tso eƒe nu vɔ̃ me.  Gawu la, ne míeku kple Kristo la, míexɔe se be míanɔ agbe hã kpakplii.  Elabena míenyae bena, fifia si wofɔ Kristo tso ame kukuwo dome la, magaku azɔ o; ku meganye aƒetɔ ɖe edzi azɔ o. 10  Elabena ku si wòku la, eku na nu vɔ̃ zi ɖeka ɖe ɣeyiɣiawo katã nu; gake agbe si wòle la, ele agbe na Mawu. 11  Nenema kee miawo hã: mibu mia ɖokui abe ame kukuwo ŋutɔŋutɔ ene na nu vɔ̃, gake abe ame gbagbewo ene na Mawu, to Kristo Yesu dzi. 12  Eya ta migana nu vɔ̃ nayi edzi aɖu fia ɖe mia dzi le miaƒe ŋutilã siwo le kuku ge la me, bene miawɔ woƒe didiwo dzi o. 13  Eye migayi edzi miatsɔ miaƒe ŋutinuwo ana nu vɔ̃ abe madzɔmadzɔnyenye ƒe aʋawɔnuwo ene hã o, ke boŋ mitsɔ mia ɖokui na Mawu abe ame siwo wogbɔ agbee tso ame kukuwo dome ene, eye mitsɔ miaƒe ŋutinuwo hã na Mawu abe dzɔdzɔenyenye ƒe aʋawɔnuwo ene. 14  Elabena mele be nu vɔ̃ naɖu aƒetɔ ɖe mia dzi o, esi wònye miele se la te o, ke boŋ amenuveve te ta. 15  Ekema nya kae míagblɔ azɔ? Esi míele se la te o, ke boŋ amenuveve te ta la, ɖe wòle be míawɔ nu vɔ̃a? Ema negadzɔ gbeɖe o! 16  Ðe mienyae be, ne mieyi edzi le mia ɖokui tsɔm na ame aɖe abe kluviwo ene be yewoaɖo toe la, ekema miezu eƒe kluviwo le esi mieɖoa toe ta, eɖanye nu vɔ̃ tɔwo hena ku, alo toɖoɖo tɔwo hena dzɔdzɔenyenye oa? 17  Ke woada akpe na Mawu be, mienye nu vɔ̃ ƒe kluviwo tsã, gake mieva zu ame siwo tso dzi me ɖoa to nufiafia ma si ƒomevi wotsɔ mi de asi na la. 18  Ɛ̃, esi wona ablɔɖe mi tso nu vɔ̃ me ta la, mieva zu dzɔdzɔenyenye ƒe kluviwo. 19  Mele nu ƒom abe ale si amegbetɔwo ƒoa nui ene le miaƒe ŋutilã ƒe gbɔdzɔgbɔdzɔ ta: elabena ale si ko mietsɔ miaƒe ŋutinuwo na makɔmakɔnyenye kple sedzimawɔmawɔ abe kluviwo ene hena sedzimawɔmawɔ tsã la, nenema kee azɔ la, mitsɔ miaƒe ŋutinuwo na dzɔdzɔenyenye abe kluviwo ene hena kɔkɔenyenye. 20  Elabena esime mienye nu vɔ̃ ƒe kluviwo tsã la, mievo tso dzɔdzɔenyenye si me. 21  Ekema kutsetse kae nɔ mia si ɣemaɣi? Nu siwo ta ŋu le mia kpem ɖo fifia lae. Elabena nu mawo ƒe nuwuwu ye nye ku. 22  Ke azɔ la, esi wona ablɔɖe mi tso nu vɔ̃ me, gake miezu Mawu ƒe kluviwo ta la, miele miaƒe kutsetse la kpɔm wònye kɔkɔenyenye, eye eƒe nuwuwu la nye agbe mavɔ. 23  Elabena fetu si nu vɔ̃ xena lae nye ku, gake nunana si Mawu nana lae nye agbe mavɔ to Kristo Yesu mía Aƒetɔ la dzi.

Etenuŋɔŋlɔ