Romatɔwo 3:1-31
3 Ekema nu ka mee Yudatɔ le ŋgɔ na ame bubuwo le, alo nu kae nye viɖe si le aʋatsotso la ŋu?
2 Ede ŋgɔ le mɔ sia mɔ nu. Susu gbãtɔe nye be, woawoe wotsɔ Mawu ƒe nya kɔkɔeawo de asi na.
3 Ekema nu kae? Ne ame aɖewo meɖe xɔse fia o la, ɖe woƒe dzimaxɔse la ana be ɖewohĩ Mawu ƒe nyateƒetɔnyenye nazu dzodzroa?
4 Gbeɖe! Ke boŋ Mawu nanye nyateƒetɔ, togbɔ be ame sia ame nye aʋatsokala hã, abe ale si woŋlɔe ɖi ene, be: “Bene woaɖee afia be èle dzɔdzɔe le wò nyawo me, eye nàɖu dzi ne wole ʋɔnu drɔ̃m wò.”
5 Ke hã, ne míaƒe madzɔmadzɔnyenye na Mawu ƒe dzɔdzɔenyenye dze ɖe, ekema nya kae míagblɔ? Mawu manye ame madzɔmadzɔ ne eɖe eƒe dziku fia o ɖe? (Mele nu ƒom abe ale si ame ƒoa nui ene.)
6 Gbeɖe! Ne menye nenema o ɖe, aleke Mawu awɔ adrɔ̃ ʋɔnu xexea?
7 Ke hã, ne nye aʋatsokaka wɔe be Mawu ƒe nyateƒe la dze ƒãa, hena eƒe ŋutikɔkɔe la, ekema nu ka tae wogale ʋɔnu drɔ̃mem abe nu vɔ̃ wɔla ene ɖo?
8 Eye nu ka tae míagblɔ, abe ale si wotsoa mía nu alakpatɔe ene, eye abe ale si ame aɖewo be míegblɔna la ene boŋ o, be: “Mina míawɔ nu vɔ̃ɖiwo, bene nu nyuiwo nava”? Ʋɔnu si woadrɔ̃ ame siawo la sɔ ɖe dzɔdzɔenyenye nu.
9 Ekema nu kae? Ðe míaƒe nɔnɔmea nyo wua? Kpao! Elabena míena nutsotso xoxo be Yudatɔwo kple Helatɔwo siaa le nu vɔ̃ te;
10 abe ale si woŋlɔe ɖi ene, be: “Ame dzɔdzɔe aɖeke meli o, ɖeka pɛ hã meli o;
11 ame aɖeke meli si sea nu gɔme nyuie o, ame aɖeke meli si dia Mawu o.
12 Amegbetɔwo katã tra mɔ, viɖe aɖeke megava le wo dometɔ aɖeke ŋu o; ame aɖeke meli, si nyoa dɔme o, ɖeka teti hã meli o.”
13 “Woƒe vehlo nye yɔdo si le nuvo; wotsɔ woƒe aɖewo ble ame.” “Ƒliwo ƒe aɖi le woƒe nuyiwo te.”
14 “Eye fiƒodenyawo kple dzigbãnyawo yɔ woƒe nu me fũu.”
15 “Woƒe afɔwo le du dzi ɖe ʋukɔkɔɖi ŋu.”
16 “Gbegblẽ kple xaxa le woƒe mɔwo dzi,
17 eye womenya ŋutifafamɔ la o.”
18 “Mawuvɔvɔ̃ aɖeke mele mo na wo o.”
19 Ke míenyae be, nu siwo katã Se la gblɔna la, ame siwo le Se la te ye wògblɔa wo na, ale be ɖoɖoe nazi le ame sia ame nu, eye xexe blibo la katã nadze na Mawu ƒe tohehe.
20 Eya ta womabu ŋutilã aɖeke be ele dzɔdzɔe le eŋkume le se la ƒe dɔwɔwɔwo ta o, elabena se la dzie wotona nyaa nu si tututu nu vɔ̃ nye.
21 Ke azɔ la, woɖe Mawu ƒe dzɔdzɔenyenye la fia se manɔmee, abe ale si Se la kple Nyagblɔɖilawo ɖi ɖase le eŋu ene;
22 ɛ̃, Mawu ƒe dzɔdzɔenyenye, to Yesu Kristo dzi xɔxɔse me, eye wòli na ame siwo katã si xɔse le la. Elabena vovototodedeameme aɖeke meli o.
23 Elabena wo katã wɔ nu vɔ̃, eye womete ŋu ɖoa Mawu ƒe ŋutikɔkɔe la gbɔ o,
24 eye nunana faa ye wònye be woto tafe si Kristo Yesu xe dzi na ablɔɖe wo, eye wobu wo be wole dzɔdzɔe le eƒe amenuveve la ta.
25 Mawu ɖoe abe avulévɔsa ene to eƒe ʋu la dzi xɔxɔse me. Ewɔ esia, bene wòatsɔ aɖe ye ŋutɔ ƒe dzɔdzɔenyenye afia, elabena etsɔ nu vɔ̃ siwo wowɔ tsã, esime Mawu nɔ dzi gbɔm ɖi la, nɔ kekem;
26 bene wòaɖe ye ŋutɔ ƒe dzɔdzɔenyenye afia le ɣeyiɣi sia me, bene wòanye dzɔdzɔetɔ, togbɔ be ebua ame si xɔ Yesu dzi se la ame dzɔdzɔe hã.
27 Ekema afi ka adegbeƒoƒo la le? Woɖee ɖa. To se ka dzi? Dɔwɔwɔwo tɔa? Kura o, ke boŋ to xɔse ƒe se la dzi.
28 Elabena míebuna bena, wobua ame be ele dzɔdzɔe to xɔse me, se la ƒe dɔwɔwɔwo manɔmee.
29 Alo Yudatɔwo ɖeɖe ko ƒe Mawue wònyea? Ðe menye dukɔwo me tɔwo hã tɔ oa? Ɛ̃, dukɔwo me tɔwo hã tɔe,
30 ne nyateƒee wònye be Mawu ɖeka koe li, ame si abu aʋatsotsotɔwo be wole dzɔdzɔe le woƒe xɔse ta, kple aʋamatsomatsotɔwo be wole dzɔdzɔe to woƒe xɔse me.
31 Ekema ɖe míetsɔa míaƒe xɔse ɖea se la ɖa mahã? Gbeɖe! Ðe míelé se ɖe te sesĩe boŋ.
