Romatɔwo 13:1-14

13  Luʋɔ sia luʋɔ nebɔbɔ eɖokui na ŋusẽtɔ siwo kɔ wu, elabena ŋusẽ aɖeke meli o, negbe esi tso Mawu gbɔ la ko; ŋusẽtɔ siwo li la, Mawue ɖe mɔ wole woƒe nɔƒe, siwo seɖoƒe li na la.  Eya ta ame si tsia tsitre ɖe ŋusẽ ŋu la, etsia tsitre ɖe Mawu ƒe ɖoɖo ŋu; ame siwo tsia tsitre ɖe eŋu la, woakpɔ ʋɔnudɔdrɔ̃ na wo ɖokuiwo.  Elabena vɔvɔ̃ le ame siwo le dzi ɖum la ŋu, menye na nuwɔna nyui la o, ke na gbegblẽ la boŋ. Eya ta mèdi be yeavɔ̃ ŋusẽ oa? Ekema yi edzi nànɔ nu nyui wɔm, eye àkpɔ kafukafu tso egbɔ;  elabena Mawu ƒe subɔla wònye na wò le wò nyonyo ta. Gake ne èle nu gbegblẽ wɔm la, ekema vɔvɔ̃ neɖo wò: elabena menye dzodzroe wòtsɔ yi la ɖe asi o; elabena Mawu ƒe subɔla wònye, hlɔ̃biala si ɖea dɔmedzoe fiana ɖe ame si wɔa nu gbegblẽ la ŋuti.  Eya ta ehiã vevie be miabɔbɔ mia ɖokui, menye le dɔmedzoedodo ma ɖeɖe ko ta o, ke le miaƒe dzitsinya hã ta.  Elabena esia tae miele adzɔ xem hã ɖo; elabena Mawu ƒe dutoƒo subɔlawo wonye, eye wosubɔna ɣesiaɣi le tameɖoɖo sia tututu ta.  Mitsɔ nu siwo amewo katã dze na la na wo: mixe adzɔ na ame si biaa adzɔ; midzɔ nu na ame si biana be woadzɔ nu na ye; mivɔ̃ ame si biana be woavɔ̃ ye; mibu ame si biana be woabu ye.  Miganyi naneke ƒe fe le ame aɖeke ŋu o, negbe mia nɔewo lɔlɔ̃ ƒe fe ko; elabena ame si lɔ̃a ehavi la, ewɔa se la dzi nyuie.  Elabena se la me nya siwo nye: “Mele be nàwɔ ahasi o, Mele be nàwu ame o, Mele be nàfi fi o, Mele be nàbiã ŋu o,” kpakple se bubu ɖe sia ɖe si li la, woƒo wo katã nu ƒu ɖe nya sia me be: “Ele be nàlɔ̃ hawòvi abe wò ŋutɔ ɖokuiwò ene.” 10  Lɔlɔ̃ la mewɔa vɔ̃ ɖe ame havi ŋu o; eya ta lɔlɔ̃e nye se la dzi wɔwɔ. 11  Miwɔ esia hã, elabena mienya ɣeyiɣi ɖoɖi la, be gaƒoƒo la de xoxo be mianyɔ tso alɔ̃ me, elabena míaƒe ɖeɖekpɔkpɔ gogo fifia wu ale si wònɔ le ɣeyiɣi si me míezu xɔsetɔwo la. 12  Zã do eteƒe didi; ŋkeke gogo. Eya ta mina míaɖe viviti me dɔwɔwɔwo ɖa, eye mina míado kekeli ƒe aʋawɔnuwo. 13  Mina míazɔ ale si dze abe le ŋkeke me ene: menye le aglotutu siwo gbɔ eme kple ahamumuwo me o, menye le gbɔdɔdɔ manɔsenuwo kple ŋukpenanuwɔwɔwo me o, menye le dzrewɔwɔ kple ŋuʋaʋã me o. 14  Ke boŋ mido Aƒetɔ Yesu Kristo, eye miganɔ ɖoɖo wɔm ɖe ŋutilã ƒe nudzodzrowo ŋu do ŋgɔ o.

Etenuŋɔŋlɔ