Nyaɖeɖefia 5:1-14
5 Eye mekpɔ Ame si bɔbɔ nɔ fiazikpui la dzi wòlé agbalẽ xatsaxatsa aɖe, si me kple egodo siaa woŋlɔ nu ɖo, eye wotsɔ nutrenu adre tre enu sesĩe la, ɖe eƒe nuɖusi.
2 Eye mekpɔ mawudɔla sesẽ aɖe wòtsɔ gbe gã aɖe le gbeƒã ɖem be: “Ame kae dze aʋu agbalẽ xatsaxatsa la, eye wòaɖe eƒe nutrenuawo ɖa?”
3 Gake ame ɖeka teti hã menɔ dziƒo alo anyigba dzi alo anyigba te, si ate ŋu aʋu agbalẽ xatsaxatsa la alo akpɔ eme o.
4 Eye mefa avi ʋuu, elabena womekpɔ ame aɖeke, si dze aʋu agbalẽ xatsaxatsa la alo akpɔ eme o.
5 Gake ametsitsiawo dometɔ ɖeka gblɔ nam be: “Dzudzɔ avia. Kpɔ ɖa! Dzata si tso Yuda toa me, ame si nye David ƒe ke la, ɖu dzi be wòaʋu agbalẽ xatsaxatsa la kple eƒe nutrenu adreawo.”
6 Eye le fiazikpui la kple nu gbagbe eneawo titina kple ametsitsiawo titina la, mekpɔ alẽvi aɖe le tsitre ɖi, abe ɖe wowui kpɔ ene, eye dzo adre kple ŋku adre li nɛ; ŋku siawo tsi tsitre ɖi na Mawu ƒe gbɔgbɔ adreawo, siwo wodɔ ɖo ɖe anyigba blibo la katã dzi la.
7 Eye wòyi, eye enumake wòxɔ agbalẽ xatsaxatsa la le Ame si bɔbɔ nɔ fiazikpui la dzi la ƒe nuɖusi me.
8 Eye esi Alẽvi la xɔ agbalẽ xatsaxatsaa la, nu gbagbe eneawo kple ametsitsi blaeve vɔ eneawo bɔbɔ ɖe eŋkume, eye kasaŋku kple sikagba siwo yɔ fũu kple atike ʋeʋĩ la, nɔ wo dometɔ ɖe sia ɖe si, eye atike ʋeʋĩ la tsi tsitre ɖi na ame kɔkɔewo ƒe gbedodoɖawo.
9 Eye wodzi ha yeye aɖe gblɔ be: “Wòe dze be nàxɔ agbalẽ xatsaxatsa la, eye nàɖe eƒe nutrenuawo ɖa, elabena wowu wò, eye nètsɔ wò ʋu ƒle amewo tso to sia to kple gbegbɔgblɔ sia gbegbɔgblɔ kple ame ƒomeviwo katã kple dukɔ sia dukɔ me na Mawu,
10 eye nèwɔ wo wonye fiaɖuƒe kple nunɔlawo na mía Mawu la, eye woaɖu fia ɖe anyigba la dzi.”
11 Eye mekpɔ, eye mese mawudɔla geɖe, siwo ƒo xlã fiazikpui la kple nu gbagbeawo kpakple ametsitsiawo, ƒe gbe, eye woƒe xexlẽme nye akpe ewo teƒe akpe ewo kpakple akpe teƒe akpewo,
12 eye wotsɔ gbe gã aɖe nɔ gbɔgblɔm be: “Alẽvi si wowu la dze, be wòaxɔ ŋusẽ kple kesinɔnu kple nunya kple ŋutete kple bubu kple ŋutikɔkɔe kpakple yayra.”
13 Eye nuwɔwɔ sia nuwɔwɔ si le dziƒo kple anyigba dzi kple anyigba te kple atsiaƒu dzi, kpakple nu siwo katã le wo me la, mese wonɔ gbɔgblɔm be: “Ame si bɔbɔ nɔ anyi ɖe fiazikpui la dzi kple Alẽvi la tɔ nanye yayra kple bubu kple ŋutikɔkɔe kple ŋusẽ gã tso mavɔ me yi mavɔ me.”
14 Eye nu gbagbe eneawo xɔ edzi nɔ gbɔgblɔm be: “Amen!” Eye ametsitsiawo bɔbɔ de ta agu.
