Nyaɖeɖefia 21:1-27
21 Eye mekpɔ dziƒo yeye kple anyigba yeye; elabena dziƒo tsãtɔ kple anyigba tsãtɔ nu va yi, eye atsiaƒu megali o.
2 Mekpɔ du kɔkɔe, si nye Yerusalem Yeye, la hã wònɔ ɖiɖim tso dziƒo gbɔna tso Mawu gbɔ, eye wodzrae ɖo abe ŋugbetɔ aɖe si woɖo atsyɔ̃ na hena srɔ̃a ene.
3 Tete mese gbe gã aɖe tso fiazikpui la gbɔ wònɔ gbɔgblɔm be: “Kpɔ ɖa! Mawu ƒe agbadɔ la le amegbetɔwo gbɔ, eye wòanɔ anyi kpli wo, eye woanye eƒe dukɔwo. Eye Mawu ŋutɔ anɔ anyi kpli wo.
4 Eye wòatutu aɖatsi sia aɖatsi ɖa le woƒe ŋkume, eye ku maganɔ anyi o, eye konyifafa kple ɣlidodo kple vevesese hã maganɔ anyi o. Nu siwo nɔ anyi tsã la nu va yi.”
5 Eye Ame si bɔbɔ nɔ anyi ɖe fiazikpui la dzi la gblɔ be: “Kpɔ ɖa! Mele nuwo katã wɔm yeyee.” Egblɔ hã be: “Ŋlɔe, elabena nya siawo nye nyateƒenyawo kple nya vavãwo.”
6 Eye wògblɔ nam be: “Wova eme! Nyee nye Alfa kple Omega, gɔmedzedze kple nuwuwu. Ame sia ame si tsikɔ le wuwum la, mana agbetsi la dzɔtsoƒe ƒe tsi la ƒe ɖee femaxee.
7 Ame sia ame si ɖu dzi la anyi nu siawo dome, eye manye eƒe Mawu, eye eya anye vinye.
8 Ke vɔvɔ̃nɔtɔwo kple dzimaxɔsetɔwo kple ame nyɔŋu siwo wɔa nu ƒoɖiwo kple amewulawo kple agbe gbegblẽ nɔlawo kple gbɔgbɔyɔlawo kple trɔ̃subɔlawo kpakple aʋatsokalawo katã la, wo tɔ gome anɔ ta, si le bibim kple dzo kpakple dzokpe la me. Esia tsi tsitre ɖi na ku evelia.”
9 Eye mawudɔla adre, siwo si agba adre, siwo fuwɔame adre mamlɛawo yɔ fũu nɔ la, dometɔ ɖeka va, eye wòƒo nu kplim gblɔ be: “Va afii, ne mafia ŋugbetɔ la, Alẽvi la srɔ̃ la wò.”
10 Eya ta ekɔm le gbɔgbɔ la ƒe ŋusẽ me yi to kɔkɔ gã aɖe dzi, eye wòɖe du kɔkɔe Yerusalem la fiam wònɔ ɖiɖim tso dziƒo tso Mawu gbɔ gbɔna,
11 eye Mawu ƒe ŋutikɔkɔe nɔ eŋu. Eƒe keklẽ nɔ abe kpe xɔasitɔ kekeake ene, abe yaspis kpe si me kɔ abe kristalo ene.
12 Gli kɔkɔ gã aɖe kple agbo wuieve nɔ eŋu, eye mawudɔla wuieve nɔ agboawo nu, eye woŋlɔ ŋkɔ, siwo nye Israel to wuieveawo ƒe ŋkɔwo, ɖe agboawo ŋuti.
13 Agbo etɔ̃ nɔ ɣedzeƒe, eye agbo etɔ̃ nɔ dziehe, eye agbo etɔ̃ nɔ anyiehe, eye agbo etɔ̃ nɔ ɣetoɖoƒe.
14 Woɖo gɔmeɖokpe wuieve na dua ƒe gli la hã, eye woŋlɔ Alẽvi la ƒe apostolo wuieveawo ƒe ŋkɔ wuieveawo ɖe wo ŋu.
15 Ke ame si nɔ nu ƒom kplim la lé aƒla aɖe si wotsɔ sika wɔe la ɖe asi abe dzidzeti ene, be wòadzidze du la kple eƒe agbowo kpakple eƒe gli la.
16 Eye dzogoe ene li na du la, eye eƒe didime sɔ kple eƒe kekeme. Eye wòtsɔ aƒla la dzidze du la: stadio akpe wuieve;* eƒe didime kple kekeme kple kɔkɔme wosɔ.
17 Edzidze eƒe gli la hã: abɔklugui alafa ɖeka kple blaene vɔ ene, le ame ƒe dzidzenu, si ganye mawudɔla hã tɔ, la nu.
18 Ke nu si wotsɔ ɖo eƒe gli lae nye yaspis kpe, eye du la nye sika dzadzɛ abe ahuhɔ̃e si me kɔ ene.
19 Wotsɔ kpe xɔasi ɖe sia ɖe ƒomevi ɖo atsyɔ̃ na du la ƒe gɔmeɖoanyiwo: gɔmeɖokpe gbãtɔ nye yaspis, evelia nye safir, etɔ̃lia nye xalkedon, enelia nye emerald,
20 atɔ̃lia nye sardonik, adelia nye sardis, adrelia nye krisolit, enyilia nye beril, asiekelia nye topas, ewolia nye krisopas, wuiɖekɛlia nye hiakint, wuievelia nye ametist.
21 Eye agbo wuieveawo nye dzonu wuieve; wotsɔ dzonu ɖeka wɔ agboawo dometɔ ɖe sia ɖe. Eye du la ƒe ablɔ gã la nye sika dzadzɛ, abe ahuhɔ̃e, si me wokpɔa nu tona ene.
22 Eye nyemekpɔ gbedoxɔ le eme o, elabena Yehowa Mawu, Ŋusẽkatãtɔ, ye nye eƒe gbedoxɔ, eye Alẽvi la hã nyee.
23 Eye du la mehiã ɣe alo ɣleti, be woaklẽ ɖe edzi o, elabena Mawu ƒe ŋutikɔkɔe klẽ ɖe edzi, eye Alẽvi lae nye eƒe akaɖi.
24 Eye dukɔwo azɔ le eƒe kekeli me, eye anyigba dzi fiawo atsɔ woƒe ŋutikɔkɔe ava eme.
25 Eye womatu eƒe agbowo le ŋkeke me akpɔ o, elabena zã mado le afi ma o.
26 Eye woatsɔ dukɔwo ƒe ŋutikɔkɔe kple bubu ava eme.
27 Gake nu sia nu si menye nu kɔkɔe o, kple ame sia ame si wɔa ŋunyɔnu hekaa aʋatso la mage ɖe eme akpɔ o; ame siwo ƒe ŋkɔ woŋlɔ ɖe Alẽvi la ƒe agbegbalẽ xatsaxatsa la me koe age ɖe eme.
