Nyaɖeɖefia 14:1-20

14  Eye mekpɔ, eye kpɔ ɖa! Alẽvi la le tsitre ɖe Zion To la dzi, eye ame akpe alafa ɖeka blaene vɔ ene, siwo ƒe ŋgonu woŋlɔ eƒe ŋkɔ kple Fofoa ƒe ŋkɔ ɖo la, le eŋu.  Eye mese gbe aɖe tso dziƒo abe tsi geɖewo ƒe gbeɖiɖi ene, eye abe dziɖegbe sesẽ ƒe gbeɖiɖi ene; eye gbe si mese la le abe hadzila, siwo le ha dzim ɖe kasaŋku dzi, eye wole woƒe kasaŋkuwo ƒom la, ƒe gbeɖiɖi ene.  Eye wole ha aɖe si le abe ha yeye ene dzim le fiazikpui la ŋgɔ kple nu gbagbe eneawo kpakple ametsitsiawo ŋkume; eye ame aɖeke mete ŋu srɔ̃ ha ma nyuie o, negbe ame akpe alafa ɖeka blaene vɔ ene, siwo woƒle tso anyigba dzi, la ko.  Ame siawo nye ame siwo meƒo ɖi wo ɖokuiwo kple nyɔnuwo o; le nyateƒe me la, womenya nyɔnu o. Ame siawoe dzea Alẽvi la yome, afi ka kee wòɖayi o. Woƒle ame siawo tso amegbetɔwo dome, be woanye kutsetse gbãtɔ na Mawu kple Alẽvi la,  eye womekpɔ aʋatsokaka aɖeke le woƒe nu me o; ɖiƒoƒo mele wo ŋu o.  Eye mekpɔ mawudɔla bubu aɖe wònɔ dzodzom le dziƒo titina, eye nya nyui mavɔ aɖe le esi, be wòagblɔ wòanye dzidzɔnya na ame siwo le anyigba dzi, kple dukɔ sia dukɔ kple to sia to kple gbegbɔgblɔ sia gbegbɔgblɔ kpakple ame ɖe sia ɖe ƒomevi,  eye wòtsɔ gbe gã aɖe nɔ gbɔgblɔm be: “Mivɔ̃ Mawu, eye mitsɔ ŋutikɔkɔe nɛ, elabena eƒe ʋɔnudrɔ̃gaƒoƒo la ɖo, eye mide ta agu na Ame si wɔ dziƒo kple anyigba kple atsiaƒu kple tsidzɔƒewo.”  Eye mawudɔla bubu aɖe, si nye evelia, kplɔe ɖo nɔ gbɔgblɔm be: “Emu loo! Babilon Gã la mu, eya si na dukɔwo katã no eƒe agbe gbegblẽ nɔnɔ ƒe dziku ƒe wain la!”  Eye mawudɔla bubu aɖe, si nye etɔ̃lia, kplɔ wo ɖo hetsɔ gbe gã aɖe le gbɔgblɔm be: “Ne ame aɖe de ta agu na lã wɔadã la kple eƒe nɔnɔmewɔwɔ la, eye wòxɔ dzesi ɖe eƒe ŋgonu alo ɖe eƒe asi ŋu la, 10  ekema ano Mawu ƒe dziku ƒe wain si wometsɔ naneke tsakae o, si wokɔ ɖe eƒe dɔmedzoekplu me la hã ƒe ɖe, eye woatsɔ dzo kple dzokpe awɔ fui vevie le mawudɔla kɔkɔewo ŋkume kple Alẽvi la ŋkume. 11  Eye woƒe fuwɔame ƒe dzudzɔ la nɔa tutum yia dzi tso mavɔ me yi mavɔ me, eye ame siwo dea ta agu na lã wɔadã la kple eƒe nɔnɔmewɔwɔ la, kpakple ame sia ame si xɔa eƒe ŋkɔ ƒe dzesi la hã, makpɔ gbɔɖeme o zã kple keli. 12  Afi siae ame kɔkɔewo ƒe dzidodo hiã le, ame siwo wɔa Mawu ƒe sewo dzi heléa Yesu ŋuti dzixɔse me ɖe asi la.” 13  Eye mese gbe aɖe tso dziƒo wògblɔ be: “Ŋlɔ be: Dzidzɔtɔwoe nye ame siwo ku le Aƒetɔ la me tso fifia heyina. Ɛ̃, gbɔgbɔ lae gblɔe, mina woagbɔ ɖe eme tso woƒe agbagbadzedzewo me, elabena woƒe dɔwɔwɔwo dze wo yome enumake.” 14  Eye mekpɔ, eye kpɔ ɖa! Alilikpo ɣi aɖe, eye ame aɖe bɔbɔ nɔ alilikpo la dzi abe amegbetɔvi ene, eye sikafiakuku aɖe le eta, eye hɛ gobɛ ɖaɖɛ aɖe le esi. 15  Eye mawudɔla bubu aɖe do tso gbedoxɔ la ƒe kɔkɔeƒe la, eye wòtsɔ gbe gã aɖe do ɣli ɖo ɖe ame si bɔbɔ nɔ alilikpo la dzi be: “Do wò hɛ gobɛ la ɖa, eye nàŋe nu, elabena gaƒoƒo la ɖo be woaŋe nu, elabena anyigba la ƒe nukuwo ɖi nyuie.” 16  Eye ame si bɔbɔ nɔ alilikpo la dzi la do eƒe hɛ gobɛ la ɖe anyigba dzi, eye wòŋe anyigba dzi nuwo. 17  Eye mawudɔla bubu aɖe gado tso gbedoxɔ la ƒe kɔkɔeƒe si le dziƒo, eye hɛ gobɛ ɖaɖɛ aɖe le eya hã si. 18  Eye mawudɔla bubu aɖe gado tso vɔsamlekpui la me, eye ŋusẽ nɔ esi ɖe dzo dzi. Eye wòtsɔ gbe gã aɖe do ɣli ɖo ɖe ame si si hɛ gobɛ ɖaɖɛ la le la be: “Do wò hɛ gobɛ ɖaɖɛ la ɖa, eye nàtso anyigba dzi wainka la ƒe kpowo, elabena eƒe tsetseawo ɖi.” 19  Eye mawudɔla la do eƒe hɛ gobɛ la ɖe anyigba dzi, eye wòtso anyigba dzi wainka la, eye wòtsɔe ƒu gbe ɖe Mawu ƒe dziku ƒe wainfiãnu gã la me. 20  Eye wofanya wainfiãnu la me waintsetse la le du la godo, eye ʋu do le wainfiãnu la me ɖɔ va se ɖe keke sɔwo ƒe numegawo ŋuti ke, eye wòde stadio* akpe ɖeka kple alafa ade.

Etenuŋɔŋlɔ

Anɔ abe kilometa 300 ene.