Hebritɔwo 7:1-28

7  Elabena Melxizedek sia, si nye Salem fia, Mawu Dziƒoʋĩtɔ la ƒe nunɔla, ame si va kpe Abraham esime wòtrɔ tso fiawo wuƒe gbɔna, eye wòyrae,  eya, ame si Abraham tsɔ nuwo katã ƒe ewolia na la, gbã la, eƒe ŋkɔ gɔmee nye “Dzɔdzɔenyenyefia,” eye wònye Salem fia hã, si gɔmee nye, “Ŋutifafafia.”  Esi wònye tɔ kple nɔ kpakple dzidzime ŋuti nuŋlɔɖi aɖeke mele esi o, eye ŋkekewo ƒe gɔmedzedze kple agbe ƒe nuwuwu meli nɛ o, ke boŋ wona wòle abe Mawu ƒe Vi la ene ta la, enye nunɔla tso mavɔ me yi mavɔ me.  Eya ta mikpɔ ale si gbegbe ame sia, si ƒome ƒe ta Abraham tsɔ nu siwo wòha la ƒe nyuitɔwo ƒe akpa ewolia na la, loloe ɖa.  Nyateƒee, wode se na Lewi viwo dometɔ siwo woɖoa nunɔlawoe la be woaxɔ nuwo ƒe ewolia tso dukɔ la, si nye wo nɔviwo, si le Se la nu, ne ame siawo do tso Abraham ƒe ali me kura gɔ̃ hã.  Gake eya, ame si metso woƒe dzidzimea me o la, xɔ nuwo ƒe ewolia le Abraham si, eye wòyra ame si si ŋugbedodoawo nɔ la.  Ðikeke aɖeke mele eme o be, ame si nye gãtɔ la yra ame si nye suetɔ.  Eye le go gbãtɔ me la, ame siwo le kukum lae xɔa nuwo ƒe ewolia, gake le go kemɛa me la, ame si ŋu woɖi ɖase le be ele agbe lae.  Eye mate ŋu agblɔ be, Lewi, ame si xɔa nuwo ƒe ewolia, la kura gɔ̃ hã to Abraham dzi xe nuwo ƒe ewolia, 10  elabena eganɔ tɔgbuia ƒe ali me kokoko esime Melxizedek va kpee. 11  Eya ta ne ɖe blibodede vana to Lewitɔwo ƒe nunɔlanyenye dzi nyateƒe la (elabena wotsɔe kpe ɖe Se la ŋu na dukɔa), nu ka tae wògahiã be nunɔla bubu natsi tsitre abe Melxizedek ene, eye womegblɔ le eŋu be ele abe Aron ene o? 12  Elabena esi wole nunɔlanyenyea ɖɔlim ta la, eva hiã be woaɖɔli se la hã. 13  Elabena ame si ŋuti wogblɔ nya siawo le la nye to bubu me tɔ, tso ame siwo dometɔ aɖeke mesubɔ le vɔsamlekpui la gbɔ kpɔ o dome. 14  Elabena eme kɔ ƒãa be mía Aƒetɔ la do tso Yuda, si nye to si ŋu Mose megblɔ nya aɖeke le ku ɖe nunɔlawo ŋu o, la me. 15  Eye eme gakɔ ɖe edzi ƒãa be nunɔla bubu si le abe Melxizedek ene la tsi tsitre, 16  ame sia va zu alea, menye le sea ƒe ɖoɖo si nɔ ŋutilã nu la nu o, ke boŋ le agbe si womate ŋu atsrɔ̃ o la ƒe ŋusẽ nu, 17  elabena woɖi ɖase tso eŋu be: “Nunɔla nènye abe Melxizedek ene yi mavɔmavɔ me.” 18  Eya ta le nyateƒe me la, woɖe se si do ŋgɔ la ɖa le eƒe gbɔdzɔgbɔdzɔ kple viɖemanɔŋu ta. 19  Elabena Se la mena naneke de blibo o, ke boŋ mɔkpɔkpɔ si nyo wu, si wotsɔ va kpee, si dzi míeto le tetem ɖe Mawu ŋu, lae. 20  Eye esi wònye womewɔe atamkaka manɔŋui o ta la, 21  (elabena le nyateƒe me la, ame aɖewo li, siwo zu nunɔlawo atamkaka manɔŋui, gake ame aɖe li, si ŋu atamkaka aɖe kpe ɖo, eye Ame si ka atam ma la gblɔ le eŋu be: “Yehowa ka atam (eye mavee o) be, ‘Nunɔla nènye yi mavɔmavɔ me,’”) 22  nenema kee Yesu hã va zu megbedanu na nubabla si nyo wu la. 23  Gawu la, ame geɖewo va zu nunɔlawo ɖe wo nɔewo yome le esi ku meɖe mɔ be woayi edzi asubɔ o ta, 24  gake esi eya le agbe tegbee ta la, ame aɖeke mexɔna ɖe eƒe nunɔlanyenye la teƒe o. 25  Eya ta ate ŋu aɖe ame siwo to edzi le tetem ɖe Mawu ŋu la bliboe hã, elabena ele agbe ɣesiaɣi, be wòaxɔ woƒe nya ɖe akɔ. 26  Elabena nunɔlagã sia tɔgbi ye dze na mí, nuteƒewɔla, ame maɖifɔ, si ŋu ɖiƒoƒo aɖeke mele o, si woɖe ɖa tso nu vɔ̃ wɔlawo ŋu, eye wòkɔ wu dziƒowo. 27  Mehiã be wòanɔ vɔ sam gbe sia gbe, gbã ɖe ye ŋutɔ ƒe nu vɔ̃wo ta, eye emegbe ɖe dukɔ la tɔwo ta, abe ale si nunɔlagã mawo wɔna ene o: (elabena ewɔ esia zi ɖeka ɖe ɣeyiɣiawo katã nu esime wòtsɔ eɖokui na;) 28  elabena Se la ɖoa ame siwo ŋu gbɔdzɔgbɔdzɔwo le la nunɔlagãwo, gake atamkanya si va ɖe Se la yome ya ɖo Vi aɖe, si wowɔ bliboe la, tegbee.

Etenuŋɔŋlɔ