Hebritɔwo 5:1-14

5  Elabena nunɔlagã ɖe sia ɖe si wotia tso amegbetɔwo dome la, woɖonɛ be wòawɔ Mawu ƒe subɔsubɔdɔ le amegbetɔwo ta, bene wòatsɔ nunanawo ana, eye wòasa vɔ ɖe nu vɔ̃wo ta.  Ete ŋu wɔa nu kple ame siwo wɔa nu le manyamanya me siwo daa vo la tufafatɔe, esi wònye gbɔdzɔgbɔdzɔwo le eya ŋutɔ hã ŋu ta,  eye esia tae wòle nɛ be wòatsɔ nunanawo ana ɖe nu vɔ̃wo ta ɖo, ɖe eya ŋutɔ kple dukɔ la ta.  Gawu la, ame aɖeke metsɔa bubu sia naa eɖokui o, negbe ne Mawu yɔe ko hafi, abe ale si wòyɔ Aron ene.  Nenema kee Kristo la hã medo ye ŋutɔ ɖokui ɖe dzi to nunɔlagã zuzu me o, ke boŋ ame si ƒo nu tso eŋu be: “Vinyee nènye; egbe la, nye la mezu fofowò” lae doe ɖe dzi.  Abe ale si wògagblɔ le teƒe bubu ene be: “Nunɔla nènye abe Melxizedek ene yi mavɔmavɔ me.”  Le Kristo ƒe ŋutilãmenɔnɔŋkekewo me la, eto ɣlidodo sesẽwo kple aɖatsiwo me nɔ kokoƒoƒowo kple kukuɖeɖewo dzi na Ame si te ŋu ɖee tso ku me la, eye wòɖo toe le eƒe mawuvɔvɔ̃ ta.  Togbɔ be Viae wònye hã la, esrɔ̃ toɖoɖo le nu siwo ƒe fu wòkpe la me;  eye esi wowɔe bliboe vɔ la, eva zu ame si wode dɔ asi na hena ɖeɖekpɔkpɔ mavɔ nana ame siwo katã ɖoa toe la, 10  elabena Mawu yɔe tẽe be nunɔlagã abe Melxizedek ene. 11  Nya geɖewo li míagblɔ tso eŋu, eye wo gɔme ɖeɖe sesẽ, le esi nusese zu dɔ na mi ta. 12  Elabena le nyateƒe me la, togbɔ be ele be mianye nufialawo le ɣeyiɣi la nu hã la, egahiã be ame aɖe nafia Mawu ƒe gbedeasi kɔkɔeawo ƒe gɔmedzenuwo mi tso nu gbãtɔwo dzi; eye mieva zu abe ame siwo hiã notsi, ke menye nuɖuɖu sesẽ o, la ene. 13  Elabena ame sia ame si noa notsi la, menya dzɔdzɔenyenye ƒe nya la o, elabena vidzĩ ko wònye. 14  Gake ame tsitsiwo tɔe nye nuɖuɖu sesẽ, ame siwo na hehe woƒe nugɔmesese ƒe ŋutetewo to wo zazã me, bene woade vovototo nyui kple vɔ̃ dome.

Etenuŋɔŋlɔ