Hebritɔwo 13:1-25

13  Mina miaƒe nɔvilɔlɔ̃ nayi edzi ɖaa.  Migaŋlɔ amedzrowɔwɔ be o, elabena to esia dzi la, ame aɖewo wɔ amedzro na mawudɔlawo, evɔ woawo ŋutɔwo menya o.  Minɔ ŋku ɖom ame siwo le gaxɔ me bablawo me la dzi abe ɖe wobla miawo hã kpe ɖe wo ŋu ene, kple ame siwo ŋu wole ŋlɔmi wɔm le, esi wònye mia ŋutɔwo hã miekpɔtɔ le ŋutilã me ta.  Bubu nanɔ srɔ̃ɖeɖe ŋu le amewo katã dome, eye woagaƒo ɖi srɔ̃ɖeba la o, elabena Mawu adrɔ̃ ʋɔnu agbe gbegblẽ nɔlawo kple ahasiwɔlawo.  Mina miaƒe agbenɔnɔ navo tso galɔlɔ̃ me, eye nu siwo le mia si fifia la nadze mia ŋu. Elabena egblɔ be: “Nyemaɖe asi le ŋuwò gbeɖe o, eye nyemagblẽ wò ɖi hã akpɔ o.”  Ale be dzi naɖo mía ƒo bliboe míagblɔ be: “Yehowa ye nye nye kpeɖeŋutɔ; nyemavɔ̃ o. Nu kae amegbetɔ ate ŋu awɔm?”  Miɖo ŋku ame siwo le ŋgɔ xɔm le mia dome la dzi, ame siwo gblɔ Mawu ƒe nya la na mi, eye esi miele ŋku lém ɖe nu siwo dona tso woƒe agbenɔnɔ me ŋu la, misrɔ̃ woƒe xɔse.  Ame si Yesu Kristo nye la koe wònye etsɔ kple egbe yi mavɔmavɔ me.  Migana nufiafia manyatalenu vovovowo nahe mi ayii o; elabena enyo be woatsɔ amenuveve ali ke dzi la, menye to nuɖuɖu, siwo me viɖe aɖeke medo tso na ame siwo wɔa wo ŋu dɔ o, la me o. 10  Vɔsamlekpui aɖe le mía si, si dzi ame siwo wɔa subɔsubɔdɔ kɔkɔe le le agbadɔ me la mekpɔ mɔ aɖu nu le o. 11  Elabena wotɔa dzo lã siwo ƒe ʋu nunɔlagã tsɔna yia kɔkɔeƒea le nu vɔ̃ ŋuti la ƒe ŋutilãwo le asaɖa la godo. 12  Esia tae Yesu hã kpe fu le agbo la godo ɖo, bene wòatsɔ ye ŋutɔ ƒe ʋu akɔ dukɔ la ŋu. 13  Eya ta mina míado go ayi egbɔ le asaɖa la godo, eye míatsɔ vlodoame si wòtsɔ la, 14  elabena du aɖeke mele mía si le afi sia, si anɔ anyi ɖaa o, ke boŋ míele esi ava va la dim vevie. 15  Mina míato edzi atsɔ kafukafuvɔsa, si nye nuyi siwo ʋua eƒe ŋkɔ me le dutoƒo la ƒe kutsetse, anɔ Mawu nam ɣesiaɣi. 16  Gawu la, migaŋlɔ nyuiwɔwɔ kple nunana ame bubuwo be o, elabena nenem vɔsa siawo dzea Mawu ŋu ŋutɔ. 17  Miɖo to ame siwo le ŋgɔ xɔm le mia dome la, eye mibɔbɔ mia ɖokui, elabena wole miaƒe luʋɔwo ŋu dzɔm, abe ame siwo ana akɔnta ene; bene woawɔ esia kple dzidzɔ, eye menye kple hũɖeɖe o, elabena esia agblẽ nu le mia ŋu. 18  Minɔ gbedodoɖa dzi ɖe mía ta, elabena míeka ɖe edzi be dzitsinya anukwaretɔ le mía si, elabena míedina be míawɔ nu le anukwareɖiɖi me le nuwo katã me. 19  Gake mele nu xlɔ̃m mi etɔxɛe be miawɔ esia, bene woagatsɔm ana mi kaba. 20  Ke ŋutifafa ƒe Mawu, ame si fɔ alẽawo ƒe kplɔla gãtɔ, si nye mía Aƒetɔ Yesu, hekpe ɖe nubabla mavɔ ƒe ʋu la ŋu, tso ame kukuwo dome la, 21  natsɔ nu nyui sia nu nyui adzra mi ɖo, bene miawɔ eƒe lɔlɔ̃nu, eye wòawɔ nu si dze eŋu la le mía me to Yesu Kristo dzi; ame si tɔ anye ŋutikɔkɔe tso mavɔ me yi mavɔ me. Amen. 22  Ke mele nu xlɔ̃m mi, nɔviwo, be mialɔ̃ faa axɔ dzideƒonamenya sia, elabena le nyateƒe me la, nya ʋɛ aɖewo koe meŋlɔ ɖe agbalẽ sia me ɖo ɖe mi. 23  Minyae be woɖe asi le mía nɔvi Timoteo ŋu, eye ne eva ɖo kaba la, mía kplii míakpɔ mi. 24  Mido gbe na ame siwo katã le ŋgɔ xɔm le mia dome kple ame kɔkɔewo katã nam. Ame siwo le Italia la do gbe na mi. 25  Amenuveve nanɔ anyi kpli mi katã.

Etenuŋɔŋlɔ