Galatiatɔwo 3:1-29

3  Oo, Galatiatɔ movitɔwo! Ame kae kplɔ mi de ŋusẽkpɔɖeamedzi gbegblẽ te, mi ame siwo ŋkume woɖee fia le kɔtɛ be wohe Yesu Kristo ɖe ati ŋua?  Nu si ko dim mele be manya tso mia gbɔ lae nye esi: Se la ƒe dɔwɔwɔwo tae miexɔ gbɔgbɔ la loo alo toɖoɖo si tso xɔse me taea?  Ðe miedzɔ movi nenema gbegbea? Esi miedze egɔme le gbɔgbɔ me la, ɖe miele enu wum azɔ le ŋutilã mea?  Ðe mieto fukpekpe geɖe mawo gbegbe me dzodzroa? Ne dzodzroe wòganye ŋutɔŋutɔ hã.  Ekema ame si naa gbɔgbɔ la mi, eye wòwɔa ŋusẽdɔwo le mia dome la, se la ƒe dɔwɔwɔwo tae wòwɔnɛ loo alo toɖoɖo si tso xɔse me taea?  Abe ale si Abraham “xɔ Yehowa dzi se, eye wobui dzɔdzɔenyenye nɛ” ene.  Mienyae nyuie be ame siwo léna ɖe xɔse ŋu la, woawoe nye Abraham ƒe viwo.  Ke esi Ŋɔŋlɔ la kpɔe do ŋgɔ be, Mawu abu dukɔwo me tɔwo ame dzɔdzɔewoe le xɔse ta la, egblɔ nya nyui la na Abraham do ŋgɔ, be: “Dziwòe woato ayra dukɔwo katã.”  Eya ta ame siwo léna ɖe xɔse ŋu la, wole wo yram kpe ɖe nyateƒetɔ Abraham ŋu. 10  Elabena ame siwo katã ɖoa ŋu ɖe se ƒe dɔwɔwɔwo ŋu la le fiƒode te; elabena woŋlɔ ɖi be: “Fiƒode ava ame sia ame si meyi edzi zɔ ɖe nu siwo katã woŋlɔ ɖe Se la ƒe agbalẽ xatsaxatsa la dzi, bene wòawɔ wo dzi o, la dzi.” 11  Gawu la, edze ƒãa be womebua ame aɖeke ame dzɔdzɔe to se la dzi le Mawu gbɔ o, elabena “ame dzɔdzɔe la ƒe xɔse ye ana wòanɔ agbe.” 12  Ke Se la meléna ɖe xɔse ŋu o, ke boŋ “ame si wɔa wo dzi la ato wo dzi anɔ agbe.” 13  Kristo ƒle mí heɖe mí tso Se la ƒe fiƒode la me, esi wòva zu fiƒode le mía ta, elabena woŋlɔ ɖi be: “Fiƒode ava ame sia ame si wohe ɖe ati ŋu la dzi.” 14  Taɖodzinu lae nye be, Abraham ƒe yayra la nava to Yesu Kristo dzi na dukɔwo, bene míaxɔ gbɔgbɔ si ŋugbe wodo la to míaƒe xɔse me. 15  Nɔviwo, mele kpɔɖeŋu aɖe si ku ɖe amegbetɔwo ŋu wɔm: Nubabla si dzi woɖo kpee la, ame aɖeke metea fli ɖe eme alo tsɔa naneke kpenɛ o, togbɔ be amegbetɔwoe wɔe hã. 16  Ke wogblɔ ŋugbedodoawo na Abraham kple eƒe dzidzimevi. Megblɔ be: “Kple dzidzimeviwo,” abe wo dometɔ geɖe ŋue wòku ɖo ene o, ke boŋ abe ɖeka ŋue wòku ɖo ene, be: “Kple wò dzidzimevi,” si nye Kristo. 17  Gawu la, mele gbɔgblɔm be: Le nubabla si dzi Mawu ɖo kpe va yi gome la, Se si va nɔ anyi ƒe alafa ene kple blaetɔ̃ megbe la mete fli ɖe eme, bene wòaɖe ŋugbedodo la ɖa o. 18  Elabena ne se la mee domenyinyi la tso la, ekema meganye ŋugbedodo mee o; evɔ Mawu tsɔe na Abraham dɔmenyotɔe to ŋugbedodo aɖe dzi. 19  Ekema nu ka tae Se la nɔ anyi ɖo? Wotsɔe kpe ɖe eŋu, bene wòana vodadawo nadze, va se ɖe esime dzidzimevi la, si wodo ŋugbea na la, nava ɖo; eye woto mawudɔlawo dzi tsɔe na to domenɔla aɖe ƒe asi dzi. 20  Ke domenɔla aɖeke menɔa anyi, ne ame ɖeka ko ŋue wòku ɖo o, evɔ Mawu ɖeka koe. 21  Ekema ɖe Se la tsi tsitre ɖe Mawu ƒe ŋugbedodowo ŋua? Gbeɖe! Elabena ne ɖe wona se aɖe si ate ŋu ana agbe la, anye ne dzɔdzɔenyenye ato se dzi nyateƒe. 22  Gake Ŋɔŋlɔ la tu nu ɖe nuwo katã nu ɖe nu vɔ̃ te, bene woatsɔ ŋugbedodo, si tsoa Yesu Kristo dzi xɔxɔse me la, ana ame siwo ɖenɛ fiana be xɔse le yewo si. 23  Ke hã, hafi xɔse la nava ɖo la, wonɔ mía ŋu dzɔm le se la te, abe ame siwo nu wotu nu ɖo ene, eye míenɔ mɔ kpɔm na xɔse si woava ɖe afia la. 24  Ale Se la va zu míaƒe mɔfiala si kplɔa mí yia Kristo gbɔ, bene woabu mí ame dzɔdzɔewo le xɔse ta. 25  Gake azɔ si xɔse la va ɖo la, míegale mɔfiala aɖeke te o. 26  Le nyateƒe me la, mi katã mienye Mawu ƒe viwo to miaƒe Kristo Yesu dzi xɔxɔse me. 27  Elabena mi ame siwo katã wonyrɔ ɖe Kristo me la, miedo Kristo. 28  Yudatɔ alo Helatɔ meli o, kluvi alo ablɔɖeme meli o, ŋutsunyenye alo nyɔnunyenye meli o; elabena ame ɖekae mi katã mienye le ƒomedodo me kple Kristo Yesu. 29  Gawu la, ne Kristo tɔe mienye la, ekema Abraham ƒe dzidzimee mienye vavã, domenyilawo le ŋugbedodo aɖe nu.

Etenuŋɔŋlɔ