Efesotɔwo 4:1-32

4  Eya ta nye, ame si nye gamenɔla le Aƒetɔ la me, mele kuku ɖem na mi vevie be miazɔ ale si dze yɔyɔ si wotsɔ yɔ mi tsãe la,  le tamebɔbɔɖeanyi kple tufafa blibo me, le dzigbɔgbɔ blewu me, eye miado dzi anɔ anyi kple mia nɔewo le lɔlɔ̃ me,  eye midze agbagba vevie miawɔ ɖeka le gbɔgbɔ la me le ŋutifafa ƒe nublanu la me.  Ŋutilã ɖeka kple gbɔgbɔ ɖeka ye li, abe ale si ko woyɔ mi le mɔkpɔkpɔ ɖeka, si gbɔ woyɔ mi vae la me ene;  Aƒetɔ ɖeka, xɔse ɖeka, nyɔnyrɔxɔxɔ ɖeka;  Mawu ɖeka, si nye amewo katã Fofo, ame si le wo katã nu, si toa wo katã dzi, eye wòle wo katã me.  Ke wona amenuveve mía dometɔ ɖe sia ɖe, le ale si Kristo la dzidze nunana faa lae nu.  Esia tae wògblɔ be: “Esi wòlia yi dzi la, ekplɔ aboyomewo vae; ena nunana siwo nye amewo.”  Ke nya si nye “wòlia yi dzi” la, nu ka fiam wòle, ne menye be eɖi va anyi me, si nye anyigba dzi, hã oa? 10  Ame si tututu ɖi va la kee nye ame si lia yi dzi wògbɔ dziƒowo katã tame ʋĩi la, bene wòana nuwo katã nava eme bliboe. 11  Eye wòtsɔ ame aɖewo na wonye apostolowo, ɖewo nye nyagblɔɖilawo, ɖewo nye nya nyui gblɔlawo, eye ɖewo nye alẽkplɔlawo kple nufialawo, 12  kple susu be woaɖɔ ame kɔkɔewo ɖo, hena subɔsubɔdɔwɔwɔ, hena Kristo la ƒe ŋutilã tutu, 13  va se ɖe esime mí katã míawɔ ɖeka le xɔse kple Mawu ƒe Vi la ŋuti sidzedze vavãtɔ me azu ŋutsu si tsi bliboe, ahaɖo tsitsime si sɔ kple Kristo la tɔ le eƒe blibonyenye la me; 14  bene míaganye vidzĩ, siwo wonyamana abe ale si ƒutsotsoewo nyamaa nu ene, eye nufiafia ƒe ya sia ya ƒona yina gaƒona gbɔna, to amewo ƒe beble me, to alakpanya si ŋu wotrɔ asi le aɖaŋutɔe la me o. 15  Ke boŋ to nyateƒetoto dzi la, mina míato lɔlɔ̃ me atsi le nuwo katã me le Kristo, si nye ta la te. 16  Eya gbɔe wòtso be wokpe ŋutilã blibo la katã pɛpɛpɛ, eye eƒe kpeƒekpeƒe siwo naa nu si hiã le eƒe ŋutinu ɖe sia ɖe ƒe dɔ si wonae be wòawɔ la nu, na wòle dɔ wɔm ɖekae, hekpea asi ɖe ŋutilã la ƒe tsitsi ŋu, hena eɖokui tutu le lɔlɔ̃ me. 17  Eya ta nya si gblɔm mele hele ɖase ɖim le eŋu le Aƒetɔ la me ye nye esi: be miagayi edzi anɔ zɔzɔm, abe ale si dukɔwo hã zɔna le woƒe tamesusu ƒe yakanyenye la me ene o, 18  esime wole viviti me le susu me, eye wole adzɔge le Mawu ƒe agbe la ŋu, le numanyamanya si le wo me la ta, le woƒe dzimesesẽ la ta. 19  Esi naneke megakpea ŋu na wo o ta la, wotsɔ wo ɖokuiwo na ŋukpenanuwɔwɔ, bene woanɔ makɔmakɔnyenye ɖe sia ɖe ƒomevi dzi le ŋukeklẽ me. 20  Gake miawo ya miesrɔ̃e be nenemae Kristo la le o, 21  ne vavãe miese eŋkɔ, eye woto eyama dzi fia nu mi, abe ale si nyateƒe la le Yesu me ene, 22  be ele be miaɖe amenyenye xoxo, si wɔa nu ɖe agbenɔnɔ si nɔ mia si tsã nu, eye wole egblẽm le eƒe beble ƒe didiwo nu, la ɖa; 23  ke boŋ be ele be woawɔ mi yeyee le ŋusẽ si ʋãa miaƒe tamesusu la me, 24  eye miado amenyenye yeye, si wowɔ le Mawu ƒe lɔlɔ̃nu nu le dzɔdzɔenyenye kple nuteƒewɔwɔ vavãtɔ me la. 25  Esia ta esi mieɖe aʋatsokaka ɖa azɔ la, mia dome ame sia ame neto nyateƒe na ehavi, elabena ŋutinuwoe míenye na mía nɔewo. 26  Mibi dzi, gake migawɔ nu vɔ̃ o; miaƒe dzibibi la naganɔ anyi ɣe naɖo to ɖe edzi o, 27  eye migaɖe mɔ na Abosam hã o. 28  Fiafitɔ la nagafi fi azɔ o, ke boŋ newɔ dɔ sesẽ, netsɔ eƒe asi wɔ dɔ nyui, ne wòakpɔ nane ana ame si nu hiã. 29  Migana nya ƒaƒã aɖeke nado go tso miaƒe nu me o, ke boŋ nya sia nya si nyo hena tutuɖo le ale si wòhiã nu, bene wòana nu nyui aɖe ame siwo asee la. 30  Eye miganɔ nuxaxa dom na Mawu ƒe gbɔgbɔ kɔkɔe, si wotsɔ tre mia nu hena ŋkeke si dzi woato tafe dzi aɖe mi, la o. 31  Mina woaɖe ameléleɖedɔme kaɖikaɖi kple dɔmedzoe kple dziku kple ɣlidodo kpakple dzugbewo, ɖa le mia dome hekpe ɖe nu gbegblẽ wɔwɔ ɖe sia ɖe ŋu. 32  Ke boŋ mizu ame siwo nyoa dɔme na wo nɔewo, miaƒe dɔme netrɔ ɖe mia nɔewo ŋu vevie, eye mitsɔ nɔ mia nɔewo kem faa, abe ale si ko Mawu hã to Kristo dzi tsɔ ke mi faa ene.

Etenuŋɔŋlɔ