Dɔwɔwɔwo 26:1-32

26  Agripa gblɔ na Paulo be: “Woɖe mɔ na wò be nàƒo nu aʋli ɖokuiwò ta.” Tete Paulo do asi ɖa, eye wòʋli eɖokui ta gblɔ be:  “Fia Agripa, edzɔ dzi nam ŋutɔ be, ŋkuwòme ye mele ɖokuinye ta ʋli ge le egbe sia, le nu siwo katã ta Yudatɔwo le nunye tsom ɖo la ŋu,  vevietɔ esi wònye ènya nu tso kɔnuwo kple nyaʋiʋli siwo katã le Yudatɔwo dome ŋu nyuie ta. Eya ta meɖe kuku na wò be, nàgbɔ dzi ɖi aɖo tom.  “Nyateƒee, agbe si ƒomevi menɔ tso nye ɖekakpui me, esi menɔ tso gɔmedzedzea me le nye dukɔ la dome, kple Yerusalem la, Yudatɔ siwo katã  nyam tsã tso gɔmedzedzea me la nya, ne woalɔ̃ be yewoaɖi ɖase tso eŋu, be menɔ agbe le míaƒe subɔsubɔ ƒe kɔmama la ƒe nudidiwo nu pɛpɛpɛ abe Farisitɔ ene.  Ke hã, ŋugbe si Mawu do na mía tɔgbuiwo la ŋuti mɔkpɔkpɔ tae metsi tsitre ɖe afi sia wole ʋɔnu drɔ̃mem ɖo;  evɔ míaƒe to wuieveawo le mɔ kpɔm be ŋugbedodo sia nava eme na yewo, eye le esia ta wowɔa subɔsubɔdɔ kɔkɔe nɛ vevie zã kple keli hafi. Oo, fia, mɔkpɔkpɔ sia tae Yudatɔwo le nunye tsom ɖo.  “Nu ka tae miesusu be womate ŋu axɔe ase le mia dome be Mawu fɔa ame kukuwo ɖe tsitre o?  Nye la, mebui tsã le ɖokuinye me be, ele be mawɔ nu geɖewo atsɔ atsi tsitre ɖe Yesu Nazaretetɔ la ƒe ŋkɔ la ŋu vevie; 10  eye le nyateƒe me la, mewɔe hã le Yerusalem, eye mede ame kɔkɔewo dometɔ geɖewo gaxɔ me, abe ale si mexɔ ŋusẽ tso nunɔlawo ƒe tatɔwo gbɔ ene; eye ne wole wo wu ge la, medaa asi ɖe edzi. 11  Eye mehe to na wo zi geɖe le ƒuƒoƒeawo katã tsɔ te kpɔ be mazi wo dzi ne woagbe nu le woƒe xɔse gbɔ; eye esi wònye medo dɔmedzoe ɖe wo ŋu helĩhelĩ ta la, metia wo yome yia du bubuwo hã me. 12  “Esia dzie menɔ xɔ mɔɖeɖe kple ŋusẽ blibo tso nunɔlawo ƒe tatɔwo gbɔ dze mɔ yina Damasko, 13  eye le ŋdɔ ga wuieve me esime mele mɔa dzi la, Oo fia, mekpɔ kekeli aɖe si nu sẽ wu ɣe ƒe keklẽ la wòklẽ tso dziƒo ƒo xlãm, eye wòƒo xlã ame siwo nɔ mɔa zɔm kplim hã. 14  Eye esi mí katã míedze anyi la, mese gbe aɖe wògblɔ nam le Hebrigbe me be: ‘Saul, Saul, nu ka ŋuti nèle yonyeme tim? Ne èyi edzi le afɔ tɔm kpo si nu ga biɖoewo le la, nuvevi awɔ wò.’ 15  Gake megblɔ be: ‘Wò ame kae, Aƒetɔ?’ Eye Aƒetɔ la gblɔ be: ‘Nyee nye Yesu, ame si yome tim nèle la. 16  Ke hã, tso nàtsi tsitre ɖe wò afɔwo dzi. Elabena esia tae mena nèkpɔm ɖo, be matia wò nànye subɔvi kple ɖasefo nam le nu siwo nèkpɔ kple nu siwo mana nàkpɔ tso ŋunye la ŋu; 17  eye maɖe wò tso ame siawo kple dukɔ, siwo gbɔ mele dɔwòm ɖo la, si me, 18  be nàʋu woƒe ŋkuwo, be nàtrɔ wo tso viviti me ava kekeli me, kple Satana ƒe ŋusẽ me ava Mawu gbɔ, bene woakpɔ nu vɔ̃wo ƒe tsɔtsɔke kple domenyinu le ame siwo ŋu wokɔ to dzinye xɔxɔse me la dome.’ 19  “Eya ta Fia Agripa, nyemegbe nu si mekpɔ tso dziƒo la dzi wɔwɔ o, 20  ke boŋ metsɔ gbedeasi la yi na ame siwo le Damasko la gbã, eye emegbe la, na ame siwo le Yerusalem kple Yudea nuto blibo la me kpakple dukɔwo, be ele be woatrɔ dzi me, eye woatrɔ ɖe Mawu ŋu to dɔ siwo dze dzimetɔtrɔ la wɔwɔ me. 21  Nu siawo tae Yudatɔwo lém le gbedoxɔa me hete kpɔ be yewoawum ŋutasesẽtɔe ɖo. 22  Ke hã, esi wònye mexɔ kpekpeɖeŋu si tso Mawu gbɔ ta la, meyi edzi le ɖase ɖim na ame ŋkutawo kple ame tsɛwo siaa va se ɖe egbe sia, gake nyemele nya aɖeke gblɔm o, negbe nu siwo Nyagblɔɖilawo kple Mose gblɔ be wogbɔna dzɔdzɔ ge la ko, 23  be ele be Kristo la nakpe fu, eye esi wònye eyae anye ame gbãtɔ si woafɔ ɖe tsitre tso ame kukuwo dome ta la, aɖe gbeƒã kekeli na ame siawo kple dukɔwo siaa.” 24  Ke esi wònɔ nya siawo gblɔm tsɔ nɔ eɖokui ta ʋlim la, Festo tsɔ gbe sesẽ gblɔ be: “Paulo, èle aɖaʋa dzem! Nu geɖe sɔsrɔ̃ na nèle aɖaʋa dzem!” 25  Gake Paulo gblɔ be: “Nyemele aɖaʋa dzem o, Bubutɔ Festo, ke boŋ nyateƒenya siwo me susu le la gblɔm mele. 26  Le nyateƒe me la, fia si mele nu ƒom na dzinɔameƒotɔe la nya nu siawo nyuie; elabena meka ɖe edzi be nu siawo dometɔ ɖeka teti hã mele ɣaɣla ɖee o, elabena menye bebe mee wowɔ nu sia le o. 27  Fia Agripa, èxɔa Nyagblɔɖilawo dzi senaa? Menya be èxɔa wo dzi sena.” 28  Gake Agripa gblɔ na Paulo be: “Esusɔ vie ko nàƒoe ɖe nunye be mazu Kristotɔ.” 29  Ke Paulo gblɔ nɛ be: “Madi be Mawu nawɔe be, eɖanye fifia o, eɖanye ɣeyiɣi didi aɖe megbe o, menye wò ɖeɖe ko o, ke boŋ ame siwo katã le nye nyawo sem egbea hã, miazu abe nye ene, negbe babla siawo koe naganɔ eme o.” 30  Eye fia la tso, eye nutomefia la kple Bernike kpakple ame siwo katã nɔ anyi kpli wo hã tso. 31  Gake esi wote yi adzɔge vie la, wote gbɔgblɔ na wo nɔewo be: “Ame sia mewɔ naneke si dze ku alo bablawo o.” 32  Gawu la, Agripa gblɔ na Festo be: “Ne ɖe ŋutsu sia mebia be Kaisaro nagbugbɔ nya la adrɔ̃ na ye o la, anye ne woate ŋu aɖe asi le eŋu hafi.”

Etenuŋɔŋlɔ