Dɔwɔwɔwo 23:1-35

23  Esi Paulo nɔ Sanhedrin la me tɔwo kpɔm tututu la, egblɔ be: “Ŋutsuwo, nɔviwo, metsɔ dzitsinya si ŋuti kɔ bliboe la zɔ le Mawu ŋkume va se ɖe ŋkeke sia dzi.”  Esi wògblɔ esia la, nunɔlagã Anania ɖe gbe na ame siwo tsi tsitre ɖe egbɔ la be, woaƒo nugbɔ nɛ.  Tete Paulo gblɔ nɛ be: “Mawu aƒo wò, wò gli si wosi akalo na. Ðe nènɔ anyi, be yeadrɔ̃ ʋɔnum le Se la nu, eye le ɣeyiɣi ma ke me la, nèle Se la dzi dam, hele gbe ɖem be woaƒoma?”  Ame siwo tsi tsitre ɖe afi ma la gblɔ be: “Mawu ƒe nunɔlagã la dzum nèlea?”  Eye Paulo gblɔ be: “Nɔviwo, nyemenya be nunɔlagãe wònye o. Elabena woŋlɔ ɖi be: ‘Mele be nàgblɔ nya vlo aɖeke ɖe wò dukɔ dzi ɖula ŋu o.’”  Ke esi Paulo de dzesii be akpa ɖeka nye Zadukitɔwo, gake akpa evelia nye Farisitɔwo la, edo ɣli le Sanhedrin la gblɔ be: “Ŋutsuwo, nɔviwo, Farisitɔ kple Farisitɔwo ƒe vi menye. Ame kukuwo ƒe tsitretsitsi ŋuti mɔkpɔkpɔ la tae wole ʋɔnu drɔ̃mem ɖo.”  Esi wògblɔ esia la, nyaʋiʋli ɖo Farisitɔwo kple Zadukitɔwo dome, eye ameha gã la dome ma.  Elabena Zadukitɔwo gblɔna be tsitretsitsi loo, alo mawudɔla, alo gbɔgbɔ aɖeke, meli o, gake Farisitɔwo ya gblɔna le dutoƒo be wo katã woli.  Eya ta ɣli ɖi hoo, eye agbalẽfiala siwo le Farisitɔwo ƒe akpa dzi la tso, eye wote nyahehe dzikutɔe be: “Míekpɔ vɔ̃ aɖeke le ame sia ŋu o; gake ne gbɔgbɔ aɖe alo mawudɔla aɖee ƒo nu nɛ la, . . .” 10  Azɔ esi nyaʋiʋli la nu va sẽ ɖe edzi la, aʋafiagã la vɔ̃ be woava vuvu Paulo, eye wòɖe gbe be asrafoha la naɖi aɖahee tso wo dome, eye woakplɔe ava asrafowo nɔƒe la. 11  Gake le zã si kplɔe ɖo me la, Aƒetɔ la va tsi tsitre ɖe egbɔ, eye wògblɔ be: “Lé dzi ɖe ƒo! Elabena ale si nèle ɖase ɖim tsitotsito tso ŋunye le Yerusalem la, nenema kee wòle be nàɖi ɖase le Roma hã.” 12  Ke esi ŋu ke la, Yudatɔwo ɖo nugbe heka atam ƒo fi de wo ɖokui be, ne yewomewu Paulo o kpa, yewomaɖu nu alo ano nu o. 13  Ame siwo ɖo nugbe heka atam alea la sɔ gbɔ wu ame blaene; 14  eye woyi nunɔlawo ƒe tatɔwo kple amegãwo gbɔ gblɔ be: “Míeka atam heƒo fi de mía ɖokui be ne míewu Paulo o kpa, míade naneke nu me o. 15  Eya ta mia kple Sanhedrin la mina nu si ta wòle be aʋafiagã la nakplɔe aɖi ava mia gbɔ la me nakɔ nɛ, abe ɖe miedi be yewoaku nya siwo ku ɖe eŋu la me tsitotsito wu ene. Gake hafi wòate ava la, míanɔ klalo be míabu mo nɛ.” 16  Ke hã, Paulo nɔvinyɔnu ƒe viŋutsu se woƒe xadede la ŋu nya, eye wòva asrafowo nɔƒe la heka eta na Paulo. 17  Eya ta Paulo yɔ asrafomegãwo dometɔ ɖeka va egbɔ gblɔ nɛ be: “Kplɔ ɖekakpui sia yi aʋafiagã la gbɔ, elabena nya aɖe le esi wòagblɔ nɛ.” 18  Eya ta ŋutsu sia kplɔe yi aʋafiagã la gbɔ, eye wògblɔ be: “Gamenɔla Paulo yɔm va eɖokui gbɔ, eye wòbia be makplɔ ɖekakpui sia va gbɔwò, elabena nya aɖe le esi wòagblɔ na wò.” 19  Aʋafiagã la lé eƒe alɔnu, eye wòkplɔe ɖe kpɔe hete ebiabia be: “Nya ka tae nèbe yeaka nam?” 20  Egblɔ be: “Yudatɔwo wɔ ɖeka ɖo tame be yewoabia be nàkplɔ Paulo aɖi ava Sanhedrin la etsɔ, abe ɖe wole didim be yewoaku eƒe nyaa me tsitotsito wu tsã ene. 21  Nya ka kee woɖagblɔ o, mègaɖe mɔ woaƒo nya ɖe nuwò o, elabena wo dometɔ siwo wu blaene de xa ɖi nɛ, eye woka atam ƒo fi de wo ɖokui be, yewomaɖu nu alo ano nu o va se ɖe esime yewowui hafi; eye azɔ wole klalo, hele lalam be yewoaxɔ mɔɖeɖe tso gbɔwò.” 22  Eya ta aʋafiagã la do mɔ ɖekakpuia, gake ede se nɛ gbã be: “Mègatoe na ame aɖeke be yegblɔ nya siawo nam o.” 23  Eye wòyɔ asrafomegãwo dometɔ eve gblɔ be: “Midzra asrafo alafa eve ɖo ne woayi Kaisarea, kple sɔdola blaadre kpakple akplɔdala alafa eve, le zã ƒe gaƒoƒo etɔ̃lia* dzi. 24  Midzra agbatsɔlãwo hã ɖo, be woakɔ Paulo ɖe wo dzi, ne woakplɔe ayi na nutomefia Felike dedie.” 25  Eye wòŋlɔ agbalẽ si me nyawo yi ale: 26  “Klaudio Lisia ye le agbalẽ sia ŋlɔm ɖo ɖe Bubutɔ Nutomefia Felike: Medo gbe na wò! 27  Yudatɔwo lé ŋutsu sia, eye wowui kloe, gake mekplɔ asrafoha aɖe va do ɖe wo dzi le vo me hexɔ nɛ, elabena mese be Romatɔe wònye. 28  Eye esi medi be manya nu si ta wole enu tsom ɖo ta la, mekplɔe ɖi va woƒe Sanhedrin la. 29  Mekpɔe be woawo ŋutɔ ƒe Se la ŋu nyaʋiʋliwo tae wotso enu ɖo, gake nutsotso aɖeke mele eŋu, si dze ku alo bablawo o. 30  Gake esi wova fi tofi nam le nugbe aɖe si ɖo ge wole ɖe ŋutsu sia ŋuti ŋu ta la, mele eɖom ɖe wò enumake, eye meɖe gbe na enutsolawo be woava gblɔ nya siwo wotsɔ ɖe eŋu la le ŋkuwòme.” 31  Ale asrafo siawo kplɔ Paulo yi Antipatre le zã me, abe ale si wode se na wo ene. 32  Esi ŋu ke la, woɖe mɔ na sɔdolawo be woayi mɔzɔzɔa dzi kplii, gake woawo ya wotrɔ gbɔ va asrafowo nɔƒe la. 33  Sɔdolaawo ge ɖe Kaisarea, eye wotsɔ agbalẽ la na nutomefia la, eye wotsɔ Paulo hã de esi. 34  Eya ta exlẽe, eye wòbia be nuto ka mee wòtso hã, eye wòva nya be etso Kilikia. 35  Egblɔ nɛ be: “Ne nuwòtsolawo hã va ɖo la, ekema mase nya sia nya si le asiwò.” Eye wòde se be woadzɔ eŋu le Herodes ƒe fiasã la me.

Etenuŋɔŋlɔ

Zã ga 9 lɔƒo.