Dɔwɔwɔwo 13:1-52

13  Ke le Antioxia la, nyagblɔɖilawo kple nufialawo nɔ hame si nɔ dua me la me: Barnaba kple Simeon si woyɔna be Niger, kple Lukio si tso Kirene, kple Manahem, si kple nutomedziɖula Herodes wofia nui ɖekae, kpakple Saul.  Esi wonɔ subɔsubɔdɔ wɔm na Yehowa hetsia nu dɔna la, gbɔgbɔ kɔkɔe la gblɔ be: “Miɖe Barnaba kple Saul ɖe vovo nam le ameawo katã dome, hena dɔ si ta meyɔ wo ɖo la.”  Ale wotsi nu dɔ hedo gbe ɖa, eye woda woƒe asiwo ɖe wo dzi, eye woɖe mɔ na wo wodzo.  Ale ame siawo, siwo gbɔgbɔ kɔkɔe la dɔ la, yi Seleukia, eye tso afi ma woɖo tɔdziʋu yina Kipro.  Eye esi wova ɖo Salami la, wote Mawu ƒe nya la gbɔgblɔ le Yudatɔwo ƒe ƒuƒoƒewo. Yohanes hã nɔ wo ŋu abe kpeɖeŋutɔ ene.  Esi wotsa le ƒukpo blibo la dzi va ɖo keke Pafo ke la, wodo go ŋutsu aɖe, si nye afakala kple aʋatsonyagblɔɖila, si nye Yudatɔ aɖe si ŋkɔe nye Bar Yesu,  eye wònɔ nutomegãdziɖula Sergio Paulo, si nye ŋutsu nyanu aɖe la ŋu. Esi ŋutsu sia yɔ Barnaba kple Saul va eɖokui gbɔ la, edi vevie be yease Mawu ƒe nya la.  Gake afakala Elima (nenemae woɖea eƒe ŋkɔa gɔmee) te tsitretsitsi ɖe wo ŋu, eye wònɔ didim be yeatrɔ nutomegãdziɖula la tso xɔse la ŋu.  Esi gbɔgbɔ kɔkɔe la yɔ Saul, si wogayɔna be Paulo fũu la, enɔ ekpɔm gãa, 10  eye wògblɔ be: “Oo, wò, ame si yɔ fũu kple amefuflu ɖe sia ɖe ƒomevi, kple nu vɔ̃ɖi ɖe sia ɖe ƒomevi, wò, Abosam ƒe vi, wò, nu dzɔdzɔe ɖe sia ɖe ƒe futɔ, màdzudzɔ Yehowa ƒe mɔ dzɔdzɔewo gɔglɔ̃ oa? 11  Eya ta azɔ kpɔ ɖa! Yehowa ƒe asi va dziwò, eye wò ŋku agbã, eye màgakpɔ ɣe ƒe keklẽ o hena ɣeyiɣi aɖe.” Enumake afu kple viviti dze edzi, eye wònɔ togodoe dom henɔ amewo dim be woalé yeƒe alɔnu akplɔ ye. 12  Eye esi nutomegãdziɖula la kpɔ nu si dzɔ la, ezu xɔsetɔ, elabena Yehowa ƒe nufiafia wɔ nuku nɛ ale gbegbe. 13  Azɔ ŋutsuawo ɖo tɔdziʋu tso Pafo kpe ɖe Paulo ŋu, eye wova ɖo Perge si le Pamfilia. Gake Yohanes trɔ le wo yome yi Yerusalem. 14  Ke hã, woawo ya woyi mɔzɔzɔa dzi tso Perge va ɖo Antioxia le Pisidia, eye esi woyi ƒuƒoƒe la le sabat ŋkeke dzi la, wobɔbɔ nɔ anyi. 15  Esi woxlẽ Se la kple Nyagblɔɖilawo na ameawo vɔ la, ƒuƒoƒea dzi kpɔlawo ɖo ame ɖe wo, gblɔ be: “Ŋutsuwo, nɔviwo, ne dzideƒonya aɖe le mia si na ameawo la, migblɔe.” 16  Tete Paulo tso, eye esi wòwɔ asi na ameawo la, egblɔ be: “Ŋutsuwo, Israel viwo, kple mi ame bubu siwo vɔ̃a Mawu, miɖo to. 17  Israel dukɔ sia ƒe Mawu la tia mía tɔgbuiwo, eye wòdo dukɔ la ɖe dzi esime wonye amedzrowo le Egipte nyigba dzi, eye wòtsɔ abɔ sesẽ kplɔ wo dzoe le afi ma. 18  Eye wòdo dzi nɔ te ɖe woƒe nuwɔnawo nu le gbedadaƒo anɔ ƒe blaene sɔŋ. 19  Esi wòtsrɔ̃ dukɔ adre le Kanaan nyigba la dzi vɔ la, edzidze nu ɖe woƒe anyigba la dzi hemae na wo: 20  esiawo katã anɔ ƒe alafa ene kple blaatɔ̃ kloe. “Eye le nu siawo megbe la, etsɔ ʋɔnudrɔ̃lawo na wo, va se ɖe nyagblɔɖila Samuel dzi. 21  Gake tso ɣemaɣi la, wobia fia, eye Mawu tsɔ Kis vi Saul, si nye ŋutsu aɖe tso Benyamin toa me la, na wo ƒe blaene. 22  Eye esi wòɖee ɖa megbe la, ena David tsi tsitre be wòanye fia na wo, ame si ŋu wòɖi ɖase le gblɔ be: ‘Mekpɔ David, Isai vi la, ŋutsu si dze nye dzi ŋu, si awɔ nu siwo katã medi la.’ 23  Tso ame sia ƒe dzidzime me le eƒe ŋugbedodo la nu la, Mawu kplɔ ɖela, si nye Yesu, vae na Israel, 24  esime Yohanes, do ŋgɔ na Ame ma ƒe vava la, ɖe gbeƒã nyɔnyrɔxɔxɔ si nye dzesi na dzimetɔtrɔ na Israel dukɔ blibo la katã megbe. 25  Gake esi Yohanes nɔ eƒe duɖimekekea nu wum la, egblɔna be: ‘Ame kae miesusu be menye? Menye nyee nye ame ma o. Ke boŋ, kpɔ ɖa! Ame aɖe le megbenye gbɔna, ame si ƒe afɔwo nyemedze aɖe afɔkpa le o.’ 26  “Ŋutsuwo, nɔviwo, mi Abraham ƒe ƒomea me tɔwo kple ame bubu siwo le mia dome siwo vɔ̃a Mawu, woɖo xɔxɔ sia ƒe nya la ɖe mí. 27  Elabena Yerusalem nɔlawo kple woƒe dziɖulawo menya Ame sia o, gake esi wonɔ ʋɔnu drɔ̃m la, wona nya siwo Nyagblɔɖilawo gblɔ la va eme, nya siwo woxlẽna míesena le Sabat ɖe sia ɖe dzi, 28  eye togbɔ be womekpɔ naneke si dze ku o hã la, wobia Pilato be wòawui. 29  Ke esi wowɔ nu siwo katã woŋlɔ ɖi tso eŋu wu enu la, woɖee le atia ŋu, eye wotsɔe mlɔ ŋkuɖodziyɔdo aɖe me. 30  Gake Mawu fɔe ɖe tsitre tso ame kukuwo dome; 31  eye ame siwo tso Galilea yi Yerusalem kplii la kpɔe ŋkeke geɖe, ame siwo nye eƒe ɖasefowo na ameawo fifia. 32  “Eya ta míele nya nyui si ku ɖe ŋugbe si wodo na tɔgbuiawo ŋu la gblɔm na mi, 33  be Mawu na wòva eme bliboe na mí ame siwo nye wo viwo esi wòfɔ Yesu ɖe tsitre; abe ale si woŋlɔe ɖe psalmo evelia me ene, be: ‘Vinyee nènye, mezu Fofowò egbe sia.’ 34  Eye nyateƒenya si wònye be, efɔe ɖe tsitre tso ame kukuwo dome bene magatrɔ ayi nyunyɔ me azɔ o la, egblɔe ale: ‘Matsɔ dɔmenyonu siwo mewɔ na David lɔlɔ̃tɔe, siwo nɔa anyi ɖaa la, ana mi.’ 35  Esia tae wògblɔ le psalmo bubu me be: ‘Màɖe mɔ be ame si wɔa nuteƒe na wò la nakpɔ nyunyɔ o.’ 36  Elabena David wɔ Mawu ƒe lɔlɔ̃nu si wòɖe gblɔ kɔtɛ la le ye ŋutɔ ŋɔli, eye wòdɔ alɔ̃ le ku me, eye wotsɔe mlɔ tɔgbuiawo gbɔ, eye wòkpɔ nyunyɔ. 37  Gake ame si Mawu fɔ ɖe tsitre ya mekpɔ nyunyɔ o. 38  “Eya ta nɔviwo, esia nenɔ nyanya na mi, be to Ame sia dzi la, wole gbeƒã ɖem nu vɔ̃wo tsɔtsɔ ke na mi; 39  eye be le nu siwo katã me womate ŋu abu mi fɔmaɖilawoe to Mose ƒe se la dzi o la, wobua ame sia ame si xɔna sena la fɔmaɖilae to Ame sia ya dzi. 40  Eya ta mikpɔ nyuie, be nya si wogblɔ ɖe Nyagblɔɖilawo me la nagava mia dzi o, be: 41  ‘Mikpɔe, mi vlodolawo, eye newɔ nuku na mi, eye mibu, elabena mele dɔ aɖe wɔm le miaƒe ŋkekeawo me, dɔ si dzi miaxɔ ase gbeɖe o, ne ame aɖe gblɔ eŋu nya na mi tsitotsito kura gɔ̃ hã.’” 42  Ke esi wonɔ go dom la, ameawo te kukuɖeɖe vevie be woagagblɔ nya siawo na yewo ake le sabat si ava ɖe eyome la dzi. 43  Ale, esi ƒuƒoƒea me tɔwo kaka la, Yudatɔwo kple ame siwo trɔ dzi me zu Yudatɔwo, siwo dea ta agu na Mawu la, dometɔ geɖewo kplɔ Paulo kple Barnaba ɖo, eye esi wonɔ nu ƒom na wo la, wote nuxɔxlɔ̃ wo be woayi edzi anɔ Mawu ƒe amenuveve la me. 44  Le sabat si kplɔe ɖo dzi la, du bliboa katã kloe va ƒo ƒu be yewoase Yehowa ƒe nya. 45  Esi Yudatɔwo kpɔ amehaawo la, woyɔ fũu kple ŋuʋaʋã, eye wote busunyawo gbɔgblɔ ɖe nya siwo gblɔm Paulo nɔ la ŋu. 46  Eye Paulo kple Barnaba tsɔ dzideƒo ƒo nu gblɔ be: “Ehiã be woagblɔ Mawu ƒe nya la na mi gbã. Gake esi miele asi tumee ɖa tso mia gbɔ, eye miebu mia ɖokui be yewodze na agbe mavɔ o ta la, kpɔ ɖa! Míele tɔtrɔm ɖe dukɔwo ŋu. 47  Le nyateƒe me la, Yehowa de se na mí gblɔ be: ‘Meɖo wò abe dukɔwo ƒe kekeli ene, be nànye xɔxɔ na amewo va se ɖe anyigba ƒe seƒe ke.’” 48  Esi dukɔwo me tɔwo se nya sia la, wote dzidzɔkpɔkpɔ, eye wodo Yehowa ƒe nya la ɖe dzi, eye ame siwo si dzi ƒe nɔnɔme nyui le hena agbe mavɔ kpɔkpɔ la zu xɔsetɔwo. 49  Gawu la, woyi edzi nɔ Yehowa ƒe nya la tsɔm nɔ nuto blibo la katã me yim. 50  Gake Yudatɔwo de zi nyɔnu bubume, siwo dea ta agu na Mawu, kple dua me ame ŋkutawo me, eye wohe yometiti va Paulo kple Barnaba dzi, eye wonya wo le woƒe nutoawo me. 51  Ame siawo ʋuʋu ke le woƒe afɔwo ŋu, eye wodzo yi Ikonio. 52  Eye dzidzɔ kple gbɔgbɔ kɔkɔe nɔ nusrɔ̃lawo yɔm fũu ɣesiaɣi.

Etenuŋɔŋlɔ