Dɔwɔwɔwo 12:1-25

12  Le ɣeyiɣi ma tututu lɔƒo me la, fia Herodes do asi ɖa hete ŋlɔmiwɔwɔ le hame la me tɔ aɖewo ŋu.  Etsɔ yi wu Yakobo, Yohanes nɔvi.  Esi wòkpɔ be edze Yudatɔwo ŋu ta la, elé Petro hã. (Abolo maʋãmaʋã ƒe ŋkekeawo mee.)  Eye esi eƒe asi su edzi la, edee gaxɔ me, eye wòtsɔe de asi na asrafowo ƒe hatsotso ene siwo ɖɔa li wo nɔewo, siwo dometɔ ɖe sia ɖe me ame ene le la, be woadzɔ eŋu, elabena eɖoe be yeakplɔe ava dukɔa ŋkume le ŋutitoto la megbe.  Eya ta wonɔ Petro ŋu dzɔm le gaxɔa me; gake hame la nɔ gbe dom ɖa vevie na Mawu ɖe eta.  Ke le zã si do ŋgɔ na ŋkeke si dzi Herodes akplɔe ava dukɔa ŋkume me la, Petro nɔ alɔ̃ dɔm henɔ babla le kɔsɔkɔsɔ eve me le asrafo eve dome, eye dzɔla siwo nɔ ʋɔtrua nu la nɔ gaxɔa ŋu dzɔm.  Gake kpɔ ɖa! Yehowa ƒe dɔla va tsi tsitre ɖi, eye kekeli aɖe klẽ ɖe gaxɔa me le afi si wònɔ. Esi wòƒo Petro ƒe axadame la, enyɔe hegblɔ be: “Fɔ kaba!” Eye kɔsɔkɔsɔawo ge le asi ŋu nɛ.  Mawudɔla la gblɔ nɛ be: “Bla ali dzi, eye nàdo wò afɔkpawo.” Ewɔe nenema. Mlɔeba egblɔ nɛ be: “Do wò awudziwui la, eye nàkplɔm ɖo.”  Eye wòdo go hekplɔe ɖo, gake menya be nu ŋutɔŋutɔe nu si nɔ dzɔdzɔm to mawudɔlaa dzi la nye o. Le nyateƒe me la, esusu be ŋutega kpɔmee yenɔ. 10  Esi woto dzɔla gbãtɔwo kple eveliawo ŋu la, wova ɖo gagbo si nu wotona yia dua me la gbɔ, eye agboa ŋutɔ ʋu na wo le eɖokui si. Eye esi wodo go la, wozɔ ɖo mɔdodo aɖe dzi, eye enumake mawudɔla la dzo le egbɔ. 11  Eye esi Petro nyɔ le eɖokui me la, egblɔ be: “Azɔ menyae vavã be Yehowa dɔ eƒe dɔla ɖa, eye wòɖem tso Herodes si, kple nu siwo katã Yudatɔwo nɔ mɔ kpɔm na la me.” 12  Eye esi wòbu eŋu vɔ la, eyi Yohanes si wogayɔna be Marko la dada Maria ƒe aƒe me, afi si ame geɖewo ƒo ƒu ɖo nɔ gbe dom ɖa le. 13  Esi wòƒo agboa la, dɔlanyɔnuvi aɖe si ŋkɔe nye Roda la do va be yeakpɔ ɖa be ame kae hã, 14  eye esi wòkpɔe dze sii be Petro ƒe gbee la, le dzi si dzɔe ta la, meʋu agboa o, ke boŋ eƒu du yi aƒea me ɖaka eta be Petro le tsitre ɖe agbo la nu. 15  Wogblɔ nɛ be: “Èle aɖaʋa dzem.” Gake eyi edzi nɔ gbɔgblɔm na wo kakaɖedzitɔe be nyateƒee. Wote gbɔgblɔ be: “Eƒe mawudɔlae.” 16  Gake Petro kpɔtɔ nɔ afi ma nɔ agbo la ƒom. Esi woʋui la, wokpɔe, eye gbɔgblɔ bu ɖe wo. 17  Gake ewɔ asi na wo be woazi ɖoɖoe, eye wògblɔ ale si Yehowa ɖee do goe tso gaxɔ la me na wo tsitotsito, eye wògblɔ be: “Mika nya siawo ta na Yakobo kple nɔviawo.” Tete wòdo go, eye wòdzo yi teƒe bubu. 18  Esi ŋu ke la, menye dzidzi vi aɖee ƒo asrafoawo le nu si anya dzɔ ɖe Petro dzi la ŋuti o. 19  Herodes dii tsitotsito, eye esi menɔ ekpɔm o la, eku nu me tso asrafoawo ŋu, eye wòɖe gbe be woakplɔ wo ayi aɖahe to na wo; eye wòdzo le Yudea yi Kaisarea, eye wònɔ afi ma ɣeyiɣi vi aɖe. 20  Ke dɔme nɔ evem vevie ɖe Tirotɔwo kple Zidontɔwo ŋu. Eya ta wowɔ ɖeka va egbɔ, eye esi wokpɔ Blasto, ame si nye fia ƒe aƒe dzi kpɔla wòda asi ɖe edzi na wo vɔ la, wobiae be yewoawɔ ŋutifafa kplii, elabena fia ƒe nuɖuɖu mee woɖea ɖe le naa woƒe dukɔa. 21  Gake le ŋkeke ɖoɖi aɖe dzi la, Herodes do fiawu, eye wòbɔbɔ nɔ ʋɔnudrɔ̃zikpui la dzi, eye wòte nuƒoƒo na wo. 22  Tete ame siwo kpe ta la te ɣlidodo be: “Mawu aɖe ƒe gbee, menye amegbetɔ tɔe o!” 23  Enumake Yehowa ƒe dɔla ƒoe, elabena metsɔ bubu na Mawu o; eye ŋɔwo ɖui wòku. 24  Gake Yehowa ƒe nya yi edzi nɔ tsitsim henɔ ta kekem. 25  Ke esi Barnaba kple Saul wɔ kpekpeɖeŋudɔ la vɔ le Yerusalem la, wotrɔ gbɔ, eye wokplɔ Yohanes, si wogayɔna be Marko la, ɖe asi.

Etenuŋɔŋlɔ