2 Yohanes 1:1-13

 Hamemetsitsi la, le agbalẽ sia ŋlɔm na aƒenɔ tiatia la kple viawo, ame siwo melɔ̃ vevie, eye menye nye ɖeɖe ko o, ke ame siwo katã va nya nyateƒea la hã,  le nyateƒe si kpɔtɔ le mía me ta, eye anɔ anyi kpli mí tegbee.  Amenuveve, nublanuikpɔkpɔ kple ŋutifafa si tso Mawu, Fofo la, kple Yesu Kristo, Fofo la ƒe Vi la gbɔ, nanɔ anyi kpli mí, le nyateƒe kple lɔlɔ̃ me.  Dzi dzɔam ŋutɔ, elabena mekpɔ viwòwo dometɔ aɖewo wole zɔzɔm le nyateƒe la me, abe ale si ko míexɔ sedede tso Fofo la gbɔ ene.  Eya ta fifia la, mele biabiam tso asiwò, aƒenɔ, be míalɔ̃ mía nɔewo; menye se yeye wònye ŋlɔm mele na wò o, ke boŋ esi le mía si tso gɔmedzedzea me ke la koe.  Eye nu si lɔlɔ̃ fia ye nye esi: be míayi edzi azɔ le eƒe sededewo nu. Esiae nye sedede la, abe ale si miesee tso gɔmedzedzea mee ene, be ele be miayi edzi azɔ le eme.  Elabena ameblela geɖewo le xexea me, ame siwo meʋua Yesu Kristo me be eva le ŋutilã me o. Esiae nye ameblela kple Kristo ƒe futɔ la.  Minɔ ŋudzɔ ɖe mia ɖokui ŋu, be miagabu nu si míewɔ dɔ kpɔ la o, ke boŋ be miaxɔ fetu blibo la.  Ame sia ame si ʋlina be yeayi ŋgɔ, gake menɔa Kristo la ƒe nufiafia la me o la, Mawu mele esi o. Ame si nɔa nufiafia sia me la nye ame si si Fofo la kple Vi la siaa le. 10  Ne ame aɖe va mia gbɔ, eye metsɔ nufiafia sia vae o la, migaxɔe ɖe miaƒe aƒewo me alo alɔ̃ gbe nɛ gbeɖegbeɖe o. 11  Elabena ame si lɔ̃ gbe nɛ la nye gomekpɔla le eƒe dɔwɔwɔ vɔ̃ɖiawo me. 12  Togbɔ be nya geɖewo li maŋlɔ na mi hã la, nyemedi be mazã agbalẽ kple nuŋlɔtsi atsɔ aŋlɔe o, gake mele mɔ kpɔm be mava mia gbɔ ahaƒo nu kpli mi ŋkume kple ŋkume, bene miaƒe dzidzɔ nade blibo. 13  Nɔviwònyɔnu, ame tiatia la, ƒe viwo do gbe na wò.

Etenuŋɔŋlɔ