2 Korintotɔwo 8:1-24

8  Ke nɔviwo, míana mianya Mawu ƒe amenuveve, si wòna hame siwo le Makedonia,  be le dodokpɔ gã aɖe si va wo dzi esime wonɔ fukpekpe me tom me la, wokpɔ dzidzɔ manyagblɔ hewɔ dɔmenyonunana geɖe, togbɔ be woda ahe kolikoli hã.  Elabena wowɔ esia le woƒe ŋutete nu, ɛ̃, mele ɖase ɖim be, wowɔe wògbɔ woƒe ŋutete ŋu gɔ̃ hã,  esi wotso le wo ɖokui si nɔ kukuɖeɖe dzi na mí vevie, be míana mɔnukpɔkpɔ yewo yewoana nu dɔmenyotɔe, eye be yewoakpɔ gome le subɔsubɔdɔ si wɔm wonɔ na ame kɔkɔewo la me.  Eye menye ale si míekpɔ mɔ nɛ la ɖeɖe ko o, ke boŋ wotsɔ wo ɖokui na Aƒetɔ la gbã, kple míawo hã to Mawu ƒe lɔlɔ̃nu me.  Esia na míede dzi ƒo na Tito be, esi wònye eyae nye ame si dze egɔme xoxo le mia dome la, ele be wòawu miaƒe dɔmenyonunana la nu ƒoƒoƒu nu.  Ke hã, abe ale si miegba go le nuwo katã me, le xɔse kple nya kple sidzedze kple veviedodo katã kpakple lɔlɔ̃ sia si míeɖe fia mi me ene la, migba go le dɔmenyonunana sia hã me.  Nyemele egblɔm abe see wònye dem mele na mi ene o, ke boŋ le esi menya ame bubuwo ƒe veviedodo, eye be mado miaƒe lɔlɔ̃ ƒe vavãnyenye kpɔ tae.  Elabena mienya mía Aƒetɔ Yesu Kristo ƒe amenuveve la be, togbɔ be kesinɔtɔ wònye hã la, eva zu ame dahe le mia ta, bene miato eƒe ahedada me azu kesinɔtɔwo. 10  Eye mele susu aɖe dom ɖa le esia ŋu: elabena viɖe le nya sia ŋu na mi, elabena ƒe ɖekae nye esia la, menye ɖekoe miedi be yewoawɔe o, ke boŋ miedze egɔme hã; 11  ke azɔ la, miwu ewɔwɔ hã nu, bene ale si ko ewɔwɔ ƒe didia nɔ mia me la, miawu enu hã le nu siwo le mia si la nu. 12  Elabena ne didia nya li ko la, wokpɔa ŋudzedze ɖe eŋu le nu si le ame si la nu, menye le nu si mele ame si o la nu o. 13  Elabena nyemedi be wòanɔ bɔbɔe na ame bubuwo, gake wòasesẽ na miawo ya o; 14  ke boŋ be nuwo nasɔ, eye miaƒe nu siwo sɔ gbɔ tsi edzi la, naxɔ ɖe wo tɔ ƒe mademade teƒe fifia, bene woƒe nu siwo sɔ gbɔ tsi edzi la hã nava xɔ ɖe mia tɔ ƒe mademade teƒe, bene nuwo nasɔ pɛ. 15  Abe ale si woŋlɔe ɖi ene be: “Ame si si nu geɖe le la mekpɔe wògbɔ edzi o, eye ame si si nu geɖe mele o la tɔ mele ʋɛ akpa o.” 16  Ke woada akpe na Mawu, be ena Tito hã do vevie nu ɖe mia ta nenema ke le eƒe dzi me; 17  elabena le nyateƒe me la, ewɔ nu ɖe dzideƒo la nu, gake esi wònye eƒe didi vevi xoxo ta la, etso le eɖokui si dze mɔ gbɔna mia gbɔ. 18  Gake míele nɔviŋutsu aɖe, si ŋuti kafukafu kaka ɖe hamewo katã me le nya nyui la ta la, dɔm ɖa kpe ɖe eŋu. 19  Menye ema ɖeɖe koe o, ke boŋ hameawo tiae hã be wòanye míaƒe mɔzɔhati le dɔmenyonunana sia, si ŋuti dɔ wòle be míawɔ hena Aƒetɔ la ƒe ŋutikɔkɔe la ŋu, bene míaɖo kpe edzi be míele klalo. 20  Ale míele mɔ xem na esia, be ame aɖeke nagakpɔ vodada le mía ŋu le lɔlɔ̃nu faa nunana gbogbo sia, si ŋuti dɔ wɔwɔ wode mía si, la gome o. 21  Elabena “míekpɔa nuwo katã gbɔ le anukwareɖiɖi me, menye le Yehowa ŋkume ɖeɖe ko o, ke boŋ le amegbetɔwo ŋkume hã.” 22  Gawu la, míele mía nɔvi si míedo kpɔ enuenu le nu geɖewo me, eye míekpɔe be edoa vevie nu la dɔm kpe ɖe wo ŋu, eye fifia la, egale vevie dom nu wu le kakaɖedzi gã si le esi ɖe mia ŋu ta. 23  Gake ne ame aɖe abia nya aɖe tso Tito ŋu la, nye zɔhɛ kple hadɔwɔlae wònye le miaƒe nyonyo ta; alo ne mía nɔviŋutsuawo ŋu ye la, apostolowoe wonye na hameawo kple Kristo ƒe ŋutikɔkɔe. 24  Eya ta miɖo kpe lɔlɔ̃ si le mia si, kple nu si me míeƒo adegbe le mia ŋu ɖo la dzi na wo, le hameawo ŋkume.

Etenuŋɔŋlɔ