1 Tesalonikatɔwo 5:1-28
5 Ke le ɣeyiɣiwo kple azãgbewo ŋu la, nɔviwo, mehiã be míaŋlɔ naneke aɖo ɖe mi o.
2 Elabena mia ŋutɔwo mienyae nyuie be, Yehowa ƒe ŋkeke la gbɔna abe ale si tututu fiafitɔ vana le zã me ene.
3 Ne wole gbɔgblɔm be: “Ŋutifafa kple dedienɔnɔ!” la, ekema tsɔtsrɔ̃ kpata ava wo dzi kpoyi abe ale si fuɖuame va lilia funɔ ene; eye womate ŋu asi le mɔ aɖeke nu o.
4 Gake miawo la, nɔviwo, miele viviti me o, bene ŋkeke ma naɖi ɖe mi abe ale si wòaɖi ɖe fiafitɔwo ene o,
5 elabena mi katã mienye kekeli ƒe viwo kple ŋkeke ƒe viwo. Míenye zã alo viviti tɔ o.
6 Eya ta migana míanɔ alɔ̃ dɔm abe ale si ame susɔeawo le alɔ̃ dɔm ene o, ke boŋ mina míanɔ ŋudzɔ, eye míanɔ mo xexi.
7 Elabena ame siwo dɔa alɔ̃ la, zã mee wodɔa alɔ̃, eye ame siwo mua aha la, zã mee womua aha.
8 Gake mí ame siwo nye ŋkeke tɔwo la, mina míanɔ mo xexi, eye míado xɔse kple lɔlɔ̃ ƒe akɔtakpoxɔnu la, eye míaɖɔ xɔxɔ ƒe mɔkpɔkpɔ abe gakuku ene;
9 elabena Mawu tia mí, menye na dziku o, ke boŋ na ɖeɖekpɔkpɔ to mía Aƒetɔ Yesu Kristo dzi.
10 Eku ɖe mía ta, bene míele ŋu loo alo míele alɔ̃ dɔm o, míanɔ agbe kpakplii ɖekae.
11 Eya ta miyi edzi mianɔ akɔ fam na mia nɔewo, eye mianɔ mia nɔewo tum ɖo, abe ale si ko miele ewɔm vavã hã ene.
12 Azɔ míele kuku ɖem na mi, nɔviwo, be miade bubu ame siwo le dɔ wɔm sesĩe le mia dome, eye wole mia dzi kpɔm le Aƒetɔ la me hele nu xlɔ̃m mi la ŋu;
13 eye be miade bubu geɖe wo ŋu le lɔlɔ̃ me, le woƒe dɔwɔwɔ ta. Minɔ anyi kple mia nɔewo le ŋutifafa me.
14 Gawu la, míele nu xlɔ̃m mi, nɔviwo: migbe nya na ame siwo le zɔzɔm sakasaka la, miƒo nu na luʋɔ siwo lé blanui la akɔfafatɔe, mikpe ɖe gbɔdzɔgbɔdzɔtɔwo ŋu, migbɔ dzi ɖi blewu na amewo katã.
15 Mikpɔ egbɔ be ame aɖeke nagaɖo vɔ̃ vɔ̃ teƒe na ame aɖeke o, ke boŋ miti nyuididi na mia nɔewo kple ame bubuwo katã yome ɣesiaɣi.
16 Minɔ dzidzɔkpɔkpɔ dzi ɖaa.
17 Minɔ gbe dom ɖa madzudzɔmadzudzɔe.
18 Mida akpe le nu sia nu ŋuti. Elabena esiae nye Mawu ƒe lɔlɔ̃nu na mi le Kristo Yesu me.
19 Migatsi gbɔgbɔ la ƒe dzo la o.
20 Migado vlo nyagbɔgblɔɖiwo o.
21 Mido nuwo katã kpɔ; milé ɖe nu si nyo la ŋu.
22 Mitsri vɔ̃ɖinyenye ɖe sia ɖe ƒomevi.
23 Ŋutifafa ƒe Mawu la ŋutɔ nakɔ mia ŋu bliboe. Eye neva eme, nɔviwo, be miaƒe gbɔgbɔ kple luʋɔ kple ŋutilã nanɔ blibo le go sia go me, eye woakpɔ wo ta mokakamanɔŋui le mía Aƒetɔ Yesu Kristo ƒe anyinɔɣi la.
24 Nyateƒetɔe ame si le mia yɔm la nye, eye awɔe hã.
25 Nɔviwo, miyi edzi mianɔ gbe dom ɖa ɖe mía ta.
26 Mitsɔ nugbugbɔ kɔkɔe do gbe na nɔviawo katã.
27 Mele se dem na mi vevie le Aƒetɔ la me be, miaxlẽ agbalẽ sia na nɔviawo katã.
28 Mía Aƒetɔ Yesu Kristo ƒe amenuveve nanɔ anyi kpli mi.
